ភាគទី ៩ ៖ ខ្ញុំបានជម្រាបហើយអំពីផលប្រយោជន៍នៃការធ្វើការងារពីចម្ងាយដែលក្រុមការងារវេបសាយសុខភាព health.com.kh បានអនុវត្តន៍ ។ នៅពេលដែលខ្ញុំមានគំនិតអោយធ្វើការពីចម្ងាយ ខ្ញុំគិតចេញពីការកាត់បន្ថយការចំណាយទៅលើការជួលកន្លែងធ្វើការងារទៅលើការបង់លុយភ្លើង លុយទឹក និងការចំណាយផ្សេងទៀតនៅកន្លែងការងារ ។
ប៉ុន្តែការផ្ទុះឡើងនៃការរាតត្បាតមេរោគកូវីដ ១៩ និងការផ្ទុះសហគមន៍នៅកម្ពុជានៅពេលនេះបានប្រាប់យើងថា ក្រុមហ៊ុននានាត្រូវធ្វើកំណែទម្រង់របៀបធ្វើការងាររបស់ បុគ្គលិកដោយអនុញ្ញាតអោយពួកគេធ្វើការពីចម្ងាយក្នុងករណីដែលមិនអាចបំពេញការងារបាននៅកន្លែងធ្វើការដោយសារការរាតត្បាតជំងឺ ឬក៏បញ្ហាផ្សេងទៀតដែលយើងមិនដឹងជាមុន ។
ការធ្វើការ ៨ ម៉ោងក្នុងមួយថ្ងៃនៅកន្លែងធ្វើការប្រហែលជានឹងមិនអាចធ្វើបានជាប់រហូតដូចមុនទេ ដោយសារតែការរាតត្បាតនៃជំងឺ ។ បច្ចុប្បន្នទាំងស្ថាប័នរដ្ឋ និងស្ថាប័នឯកជនបានយល់ច្បាស់ពីភាពចាំបាច់នៃការធ្វើការងារពីចម្ងាយឬក៏តាមអនឡាញ ។ ដូច្នេះការបង្រៀនបុគ្គលិកអោយចេះធ្វើការងារប្រកបដោយការទទួលខុសត្រូវ គឺមានការចាំបាច់ណាស់ដើម្បីអោយពួកគេមានសេរីភាពការងារដោយអាចធ្វើការពីចម្ងាយបាន ។ បើសិនជាក្រុមហ៊ុន ឬស្ថាប័ននានាមិនមានផែនការច្បាស់លាស់ក្នុងការអនុញ្ញាតអោយបុគ្គលិកធ្វើការងារពីចម្ងាយទេនោះ គេនឹងខាតប្រយោជន៍ការងារដូចពេលនេះ ។
អ្នកវិទ្យាសាស្ត្រយល់ថា ការរាតត្បាតនៃជំងឺនឹងអាចកើតមានទៀតនៅពេលអនាគត ដោយតម្រូវអោយមនុស្សលោកត្រូវត្រៀមសម្រាប់ហេតុការណ៍អាក្រក់នោះជាមុន ។ សៀវភៅដែលមានចំណងជើងថា ធ្វើការជាមួយគ្នា នៅកន្លែងណាក៏បាន ឬភាសាអង់គ្លេស Work Together Anywhere បានសរសេរថា មុនពេលផ្លាស់ប្តូរមករកការងារពីចម្ងាយ ដំបូងយើងត្រូវពិនិត្យមើលថា តើពួកគេមានសមត្ថភាពធ្វើទំនាក់ទំនងពីចម្ងាយប្រកដោយប្រសិទ្ឋភាពដែរ ឬ ទេ ? តើពួកគេមានសីលធម៌ការងារដែរ ឬ ទេ ? តើពួកគេយល់ដឹងជាមូលដ្ឋានអំពីការប្រើប្រាស់បច្ចេកវិទ្យាដែរ ឬ ទេ ? ។
តើអ្នកអាចទទួលបានអ្វីពីបទពិសោធន៍នេះ ?
បើសិនជាមិនចង់អោយអាជីវកម្មរបស់អ្នកជាប់គាំងដោយសារតែការបិទដែលបណ្តាលមកពីការរាតត្បាតនៃជំងឺទេនោះ អ្នកត្រូវតែចាប់ផ្តើមគិតដល់ការអនុញ្ញាតអោយ បុគ្គលិកអាចធ្វើការពីចម្ងាយបាន ។ នៅពេលដែលអនុញ្ញាតអោយបុគ្គលិកធ្វើការពីចម្ងាយ ម៉ោងធ្វើការលែងជាបញ្ហាទៀតហើយ ប៉ុន្តែគេត្រូវផ្តោតទៅលើលទ្ឋផលការងារ ។ ការអនុញ្ញាតអោយបុគ្គលិកធ្វើការពីចម្ងាយមិនត្រឹមតែចំណេញសម្រាប់ក្រុមហ៊ុនទេ ប៉ុន្តែវាក៏ចំណេញដល់បុគ្គលិកផងដែរ ។ ពួកគេមិនបាច់ស្ត្រេសរាល់ថ្ងៃ ដោយសារតែការកកស្ទះចរាចរណ៍នៅពេលធ្វើដំណើរមកកាន់កន្លែងធ្វើការងារទេ ។ មិនតែប៉ុណ្ណោះពួកគេក៏អាចលៃលកធ្វើការងារផ្ទះផង និងការងារក្រុមហ៊ុនផងតាមពេលវេលាដែលតម្រូវអោយ ។ ប៉ុន្តែជាថ្មីម្តងទៀតបុគ្គលិកដែលសមនឹងធ្វើការងារពីចម្ងាយ គឺជាបុគ្គលិកដែលមានការទទួលខុសត្រូវ មានភាពស្មោះត្រង់ មានសីលធម៌ការងារ មានជំនាញទំនាក់ទំនងពីចម្ងាយនិងយល់ដឹងជាមូលដ្ខាន អំពីការប្រើប្រាស់បច្ចេកវិទ្យា ។
ដើម្បីកុំអោយថ្លោះធ្លោយ ក្រុមហ៊ុននានាអាចចាប់ផ្តើមការងារពីចម្ងាយនេះសន្សឹមៗ ដោយសាកល្បងលើកបុគ្គលិកដែលមានលក្ខណះសម្បតិ្តខាងលើកដើម្បីបានដឹងពីផលិតភាពការងារ ។ មនុស្សជាច្រើនមានក្តីស្រមៃចង់ធ្វើការងារពីចម្ងាយ ហើយក្រុមហ៊ុនត្រូវតែបំពេញក្តីស្រមៃពួកគេ ។ ពេលនោះទាំងក្រុមហ៊ុន និងបុគ្គលិកនឹងទទួលផលប្រយោជន៍ពីវប្បធម៌ថ្មីនៃការធ្វើការពីចម្ងាយនេះ ៕
ចែករំលែកព័តមាននេះ