សហរដ្ឋអាមេរិក ៖ កំពូលកីឡាករវាយកូនហ្គោលរបស់សហអាមេរិក គឺលោក Tiger Woods បានរងរបួសជើងទាំងសងខាងយ៉ាងធ្ងន់ធ្ងរ ក្រោយជួបហេតុការណ៍គ្រោះថ្នាក់ចរាចរណ៍ក្រឡាប់រថយន្តរបស់គាត់នៅព្រឹកថ្ងៃអង្គារ៍ ទី២៣ ខែកុម្ភៈ…
សហរដ្ឋអាមេរិក ៖ កំពូលកីឡាករវាយកូនហ្គោលរបស់សហអាមេរិក គឺលោក Tiger Woods បានរងរបួសជើងទាំងសងខាងយ៉ាងធ្ងន់ធ្ងរ ក្រោយជួបហេតុការណ៍គ្រោះថ្នាក់ចរាចរណ៍ក្រឡាប់រថយន្តរបស់គាត់នៅព្រឹកថ្ងៃអង្គារ៍ ទី២៣ ខែកុម្ភៈ ឆ្នាំ២០២១ (ពេលវេលានៅសហរដ្ឋអាមេរិក) នៅទីក្រុងឡូសអាន់ជឺលេស (Los Angeles) រដ្ឋកាលីហ្វ័រញ៉ា (California) នេះបើតាមការចេញផ្សាយពីសារព័ត៌មាន CNN នៅប៉ុន្មានម៉ោងមុននេះ។
នាយកដ្ឋានតម្រួតប្រចាំតំបន់ (The LA County Sheriff) បានបញ្ជាក់ថា ពួកគេទទួលបានសេចក្តីរាយការណ៍ពីអ្នកនៅតំបន់កើតហេតុនោះនាវេលាម៉ោងប្រមាណ ៧និង១២នាទីព្រឹក ខណៈមានរថយន្តមួយគ្រឿងជួបគ្រោះថ្នាក់ចរាចរណ៍ បណ្តាលឱ្យខូចខាតយ៉ាងធ្ងន់ធ្ងរ ។ ហើយម្ចាស់ជើងឯកវាយកូនហ្គោល១៥លើក វ័យ៤៥ឆ្នាំរូបនេះ ត្រូវបានជួយសង្គ្រោះដោយក្រុមពន្លត់អគ្គីភ័យ និងក្រុមគ្រូពេទ្យ។
លោក Alex Villanueva ប៉ូលិសប្រចាំតំបន់បានប្រាប់ឱ្យដឹងថា លោក Woods មិនអាចឈរដោយខ្លួនឯងបានទេ ប៉ុន្តែគេនៅដឹងខ្លួនពេលជួយសង្គ្រោះចេញពីកន្លែងកើតហេតុមុនពេលត្រូវបញ្ជូនទៅកាន់មជ្ឈមណ្ឌលវេជ្ជសាស្ត្រ Harbor-UCLA ។
ជាបឋមអ្នកតំណាងរបស់កំពូលកីឡាករ Tiger Woods គឺលោក Mark Steinberg បានបញ្ជាក់ថាគាត់កំពុងទទួលការវះកាត់ ហើយព័ត៌មានលម្អិតអំពីការរងរបួសរបស់គាត់ នឹងត្រូវជម្រាបជូននៅពេលក្រោយ៕
ចែករំលែកព័តមាននេះ