រាជធានីភ្នំពេញ ៖ បុរសម្នាក់បើករថយន្តចុះពីលើស្ពានជ្រោយចង្វារ ក្នុងល្បឿនលឿន រួចបុកខឿនឡើងរង្វង់មូលគួចកាណុង កាត់សួនច្បារ បន្តទៅបុកដើមស្លា ៣ដើមទៀត បណ្តាលអោយរថយន្តបាក់កង់ខាងឆ្វេង ទៅមុខលែងរួច ។
ហេតុការណ៍នេះ បង្កភ្ញាក់ផ្អើលកាលពីវេលាម៉ោង០៤និង៤០នាទីថ្ងៃទី១៣ ខែមិថុនា ឆ្នាំ២០២៦ នៅចំណុចសួនច្បារវង្វង់មូលគួចកាណុង ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ ។
តាមការបញ្ជាក់ពីប្រជាពលរដ្ឋ បានអោយដឹងថា មុនកើតហេតុគេឃើញបុរសម្នាក់ បើករថយន្តម៉ាក MG ពណ៌ខ្មៅ ពាក់ស្លាកលេខ ភ្នំពេញ 2CL-2169 បើកបរក្នុងល្បឿនលឿន ទិសដៅចុះពីលើស្ពានជ្រោយចង្វារ លុះមកដល់រង្វង់មូលគួចកាណុង មិនដឹងម្ចាស់រថយន្តមានបញ្ហាអ្វី ក៏ស្រាប់តែបើកបុកខឿន ឆ្លងកាត់វង្វង់មូលគួចកាណុងតែម្តង ។
ប្រភពដដែលបន្តថា លុះពេលបើកឡើងរង្វង់មូល រថយន្តបន្តទៅបុកពីចំហៀង រថយន្តដឹកជញ្ជូនមួយគ្រឿង បង្កការខូចខាត ប៉ុន្តែដោយសារខូចខាតតិចតួចរថយន្តដឹកជញ្ជូន ក៏បើកចេញទៅតែម្តង ព្រោះមិនចង់មានរឿងវែងឆ្ងាយ ។ ចំណែករថយន្តបង្កមិនទាន់អស់ល្បឿន ក៏បន្តទៅបុកខឿន រួចបុកដើមស្លា ចំនួន០៣ដើម ដែលនៅខាងលើសួនច្បារមួយទៀត ដែលនៅក្បែរវង្វង់មូល បណ្តាលអោយរថយន្តដាច់កង់ខាងឆ្វេង បង្កអោយម្ចាស់រថយន្ត រងរបួសបែកចិញ្ចើម ។ ភ្លាមៗ ពលរដ្ឋបានរាយការណ៍ជូនសមត្ថកិច្ច ចុះមកដល់កន្លែងកើតហេតុ អន្តរាគមន៍ និងឃាត់បុរសជាម្ចាស់រថយន្ត យកទៅប៉ុស្តិ៍ដើម្បីសាកសួរផងដែរ ។
ក្រោយកើតហេតុ សមត្ថកិច្ចជំនាញបានចុះមកកាន់ទីតាំងខាងលើ វាស់វែងយករថយន្តទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រងចាំដោះស្រាយពេលក្រោយ ៕
ចែករំលែកព័តមាននេះ