រាជធានីភ្នំពេញ ៖ បុរសម្នាក់បានស្លាប់ពេលបញ្ជូនទៅសង្គ្រោះ បន្ទាប់ពីជិះម៉ូតូហុងដាស្គូពីមួយគ្រឿងបោះពួយយ៉ាងលឿនមិនប្រយ័ត្នក៏ជ្រុលទៅបុករថយន្តតូយ៉ូតាព្រូសមួយគ្រឿងទៀតដែលកំពុងបត់ឆ្វេងត្រឡប់ក្រោយ កាលពីវេលាម៉ោង៩យប់ ថ្ងៃទី២២ ខែកុម្ភៈ ឆ្នាំ២០២១ ខាងមុខវិហារចិន(លោកតាម្ចាស់ស្រុក) តាមបណ្ដោយផ្លូវជាតិលេខ២…
រាជធានីភ្នំពេញ ៖ បុរសម្នាក់បានស្លាប់ពេលបញ្ជូនទៅសង្គ្រោះ បន្ទាប់ពីជិះម៉ូតូហុងដាស្គូពីមួយគ្រឿងបោះពួយយ៉ាងលឿនមិនប្រយ័ត្នក៏ជ្រុលទៅបុករថយន្តតូយ៉ូតាព្រូសមួយគ្រឿងទៀតដែលកំពុងបត់ឆ្វេងត្រឡប់ក្រោយ កាលពីវេលាម៉ោង៩យប់ ថ្ងៃទី២២ ខែកុម្ភៈ ឆ្នាំ២០២១ ខាងមុខវិហារចិន(លោកតាម្ចាស់ស្រុក) តាមបណ្ដោយផ្លូវជាតិលេខ២ ស្ថិតក្នុងសង្កាត់ចាក់អង្រែលើ ខណ្ឌមានជ័យ។ សពជនរងគ្រោះមានឈ្មោះ ចាន់ ប៊ុនណា ភេទប្រុស អាយុ៤០ឆ្នាំ មុខរបរបុគ្គលិកធនាគារ ABA ស្នាក់នៅបុរីពិភពថ្មីកំបូល ស្ថិតក្នុងសង្កាត់កំបូល ខណ្ឌកំបូល។
តាមប្រភពព័ត៌មានបានឲ្យដឹងថា នៅមុនពេលកើតហេតុគេឃើញបុរសម្នាក់បើកបររថយន្តមួយគ្រឿងម៉ាក តូយ៉ូតាព្រូស ពណ៌ស ពាក់ស្លាកលេខ ភ្នំពេញ2BH-0744 ដឹកកូនប្រុសស្រីចំនួនបីនាក់រួមដំណើរជាមួយ ធ្វើដំណើរតាមបណ្ដោយផ្លូវជាតិលេខ២ ទិសដៅពីជើងទៅត្បូង។ លុះដល់ចំណុចកើតហេតុ រថយន្តក៏បានបត់ឆ្វេងបំណងត្រឡប់ទៅក្រោយ តែខណៈពេលដែលបត់ជិតផុតទៅហើយ។ ស្រាប់តែមានម៉ូតូមួយគ្រឿងទៀតម៉ាក ហុងដាស្គូពី ពណ៌ទឹកប្រាក់ ពាក់ស្លាកលេខ ភ្នំពេញ 1HI-2612 បើកបរដោយបុរសម្នាក់ ក្នុងល្បឿនយ៉ាងលឿន ក្នុងទិសដៅបញ្ច្រាសទិសគ្នាជាមួយរថយន្ត។
រួចក៏ជ្រុលទៅបុករថយន្តចំទ្វារខាងមុខចំហៀងខាងស្ដាំពេញទំហឹងបណ្តាលឲ្យក្រពឹតរងការខូចខាត។ ចំណែកឯម៉ូតូបានរងការខូចខាតវៀចតួផ្នែកខាងមុខ និងបុរសដែលជាអ្នកបើកបរបានរងរបួសសន្លប់ស្ដូកស្ដឹង។ បន្ទាប់មកក៏មានរថយន្តរបស់គ្លីនិកឯកសួគាបានមកដឹកយកជនរងគ្រោះយកទៅធ្វើការសង្គ្រោះភា្លមៗតែម្តង។ តែជាអកុលសខណៈពេលដែលដឹកទៅដល់គ្លីនិកបុរសរងគ្រោះបានដាច់ខ្យល់ស្លាប់បាត់ទៅហើយ។
ក្រោយពេលកើតហេតុសមត្ថកិច្ចមូលដ្ឋានក៏បានទំនាក់ទំនងស្វែងរកសាច់ញាតិសពជនរងគ្រោះ និងបានប្រគល់សពទៅឲ្យសាច់ញាតិដឹកយកទៅធ្វើបុណ្យទៅតាមប្រពៃណីនៅផ្ទះ។ ដោយឡែករថយន្ត និងម៉ូតូត្រូវបានសមត្ថកិច្ចជំនាញធ្វើការវាស់វែងយកទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញដើម្បីរង់ចាំធ្វើការដោះស្រាយទៅតាមផ្លូវច្បាប់ជាបន្តទៀតនៅពេលក្រោយ៕ ដោយ ៖ យឹម ឈឿន
ចែករំលែកព័តមាននេះ