រាជធានីភ្នំពេញ ៖ ប្រឈមតម្លៃស្វាយធ្លាក់ចុះថ្លៃខ្លំាង ក្រសួងកសិកម្ម រុក្ខាប្រមាញ់ និងនេសាទបានស្នើឲ្យកសិករអ្នកដំាស្វាយ ទៅចុះបញ្ជីកសិដ្ឋានដំាស្វាយសម្រាប់ការនាំចេញនៅអគ្គនាយកដ្ឋានកសិកម្ម ដើម្បីងាយស្រួលទទួលបានព័ត៌មាន និងសេវាបណ្តុះបណ្តាលបច្ចេកទេស ក្នុងការបង្កើនផលិតភាពនិងគុណភាពផ្លែស្វាយតាមស្តង់ដារ ព្រមទំាងរៀបចំចងក្រងជាបណ្តុំអាជីវកម្មស្វាយ សម្រាប់ទំានក់ទំនងជាមួយក្រុមក្នុងស្រុកនិងក្រៅស្រុកដើម្បីចុះកិច្ចសន្យាប្រមូលទិញធ្វើការកែច្នៃនិងនាំចេញ ។
រដូវនេះស្វាយកំពុងប្រមូលផល ។ ពលរដ្ឋអ្នកដាំស្វាយ មានចម្ការតូច ធំ បានរអ៊ូពីតម្លៃស្វាយធ្លាក់ចុះខ្លំាងនិងគ្មានអ្នកទិញតែម្តង។ អ្នកដំាស្វាយខ្លះថាស្វាយកែវរមៀតបច្ចុប្បន្ននេះ មួយគីឡូមានតម្លៃតែពី ១០០ទៅ ៣០០រៀលប៉ុណ្ណោះ ។ កាលពីឆ្នាំមុនពលរដ្ឋថាអាចលក់បានជាង ១ពាន់រៀលក្នុងមួយគីឡូក្រាម ។
ក្នុងសេចក្តីប្រកាសព័ត៌មាន របស់ក្រសួងកសិកម្មនៅថ្ងៃនេះបានបញ្ជាក់ថា តម្លៃស្វាយប្រែប្រួលមិនទៀតទាត់ ទៅតាមរដូវកាល ទំហំផ្គត់ផ្គង់ តម្រូវការទីផ្សារជាដើម ។ ក្រសួងបានបញ្ជាក់ថាខ្លួនបានខិតស្វែងរកទីផ្សារឲ្យកសិករយ៉ាងខ្លំាងនាពេលកន្លង ក្នុងនោះបានចរចាជាមួយសាធារណរដ្ឋកូរ៉េ ចិន និងជប៉ុនជាដើម ។ ប៉ុន្តែការនាំស្វាយទៅកាន់ទីផ្សារអន្តរជាតិ ត្រូវគោរពតាមលក្ខណ្ឌតម្រូវភូតគាមអនាម័យ ប្រទេសនាំចូល ។ ការងារនីតិវិធីក្រសួងបានធ្វើជាមួយប្រទេសទំាងនោះខ្លះ ហើយចំនុចខ្លះកំពុងដំណើរការ ។ បើតាមក្រសួងថាទីផ្សារអន្តរជាតពិសេសនៅប្រទេសចិនតម្លៃស្វាយបានធ្លាក់ចុះ ដោយក្នុងមួយគីឡូក្រាមថ្លៃជាងមួយដុល្លារបន្តិចបន្តួចប៉ុណ្ណោះ ។
កាលពីដើមខែកុម្ភៈនេះ លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា ដំណាំស្វាយកែវរមៀតគឺជាដំណាំកសិ-ឧស្សាហកម្ម មួយក្នុងចំណោមដំណាំកសិ-ឧស្សាហកម្មផ្សេងទៀតដែលមានសក្តានុពលសម្រាប់ធ្វើការនាំចេញទៅកាន់ទីផ្សារអន្តរជាតិ ជាពិសេសប្រទេសចិន និងកូរ៉េជាលក្ខណៈស្រស់ និងក្រៀម។ លោកថា យោងតាមរបាយការណ៍របស់អគ្គនាយកដ្ឋានកសិកម្មកាលពីថ្ងៃទី ១៦ ខែធ្នូ ឆ្នាំ ២០២០ បានឱ្យដឹងថា បច្ចុប្បន្ននៅទូទាំងប្រទេសមានផ្ទៃដីដាំដុះស្វាយសរុបចំនួន ១២៤ ៣១៩ហិកតាផ្ទៃដីប្រមូលផលមានចំនួន ៩១ ៣៩៨ហិកតា ដោយទទួលទិន្នផលជាមធ្យមចំនួន ១៦តោនក្នុងមួយហិកតានៅមួយរដូវ ដែលមានបរិមាណផលសរុបចំនួន១ ៤៤៨ ៦៧៧តោន ។
ក្នុងឆ្នាំ ២០២០កន្លងទៅ ការនាំចេញផ្លែស្វាយស្រស់ទៅកាន់ទីផ្សារក្រៅប្រទេសមានចំនួន ៩៥៧ ៦៨០តោន ក្នុងនោះចំនួន ១០៧ ៦៨០តោន បាននាំចេញដោយមានវិញ្ញាបនបត្រភូតគាមអនាម័យ និងចំនួន ៨៥០ ០០០តោន បាននាំចេញដោយគ្មានវិញ្ញាបនបត្រភូតគាមអនាម័យ ។ ដោយឡែក ក្នុងឆ្នាំ ២០២១ គិតត្រឹមខែមករា ការនាំចេញផ្លែស្វាយស្រស់មានវិញ្ញាបនបត្រភូតគាមអនាម័យបានចំនួនប្រមាណ ១១ ៦៣៨តោន និងគ្មានវិញ្ញាបនបត្រភូតគាម អនាម័យចំនួនប្រមាណជា ១៨ ០០០តោន លោករដ្ឋមន្រ្តីបញ្ជាក់ថានេះតាមប្រភពពីអ្នកប្រមូលទិញ-លក់បន្តឱ្យឈ្មួញនាំចេញ ។
កសិករដាំស្វាយនៅស្រុកស្រីសន្ធរខេត្តកំពង់ចាម បាននិយាយថាស្វាយដែលពលរដ្ឋនាំ ហាក់គ្មានអ្នកទិញនោះឡើយ ។ ពួកគាត់បាននិយាយថាស្វាយដែលបាននាំចេញទៅក្រៅប្រទេសកន្លងមក ទំនងជាស្វាយដែលក្រុមហ៊ុនធំៗ ពិសេសក្រុមហ៊ុនចិន គេមកដាំស្វាយនៅកម្ពុជាហើយនាំ ទៅប្រទេសគេតែម្តង ចំណែកដំណំាដែលកសិករដំាដុះគេពុំទទួលទិញឡើយ ។ នៅក្នុងការឆ្លើយតបសេចក្តីប្រកាសព័ត៌មាន របស់ក្រសួងកសិកម្មពលរដ្ឋបានសួរថាតើការចុះបញ្ជីអាចជួយឲ្យមានស្វាយមានតម្លៃខ្ពស់ដែលឬទេនិងថាតើការចុះបញ្ជីត្រូវចំណាយថវិកាដែលឬអត់ ៕
ចែករំលែកព័តមាននេះ