ខេត្តកំពត ៖ អ្នកលក់ដូរនៅផ្សារសោមចិន រអ៊ូរទាំរឿងរកកន្លែងលក់មិនបាន ព្រោះតែគេយកដីផ្សារធ្វើតូបអស់ ។ ហើយអ្នកលក់កំប៉ិកកំប៉ុកដែលមកពីឃុំនានាក្នុងស្រុកកំពង់ត្រាច ក៏តែងតែនាំគ្នាយកបន្លែ និងនំ ត្រី…
ខេត្តកំពត ៖ អ្នកលក់ដូរនៅផ្សារសោមចិន រអ៊ូរទាំរឿងរកកន្លែងលក់មិនបាន ព្រោះតែគេយកដីផ្សារធ្វើតូបអស់ ។ ហើយអ្នកលក់កំប៉ិកកំប៉ុកដែលមកពីឃុំនានាក្នុងស្រុកកំពង់ត្រាច ក៏តែងតែនាំគ្នាយកបន្លែ និងនំ ត្រី សាច់ផ្សេងៗមកលក់នៅផ្សារសោមចិននេះ ស្ថិតនៅចំណុចត្រង់ផ្លូវថ្នល់បំបែកជា៣ ក្នុងភូមិបឹងធំ ឃុំអង្គសូរភី ស្រុកកំពង់ត្រាច ខេត្តកំពត។
ហើយផ្សារសោមចិននេះ មិនមែនជាដីផ្សារធំនោះទេ ចំណែកអ្នកលក់ដូរក៏មិនបានលក់ពេញមួយថ្ងៃដែរ គឺលក់ដូរតែ២ទៅ៣ម៉ោងប៉ុណ្ណោះ ខណៈពេលដែលអស់អ្នកទិញ។ ហើយអ្នកលក់ដូរជាច្រើននាក់ក៏មិនហ៊ានចេញមុខឱ្យអ្នកយកព័ត៌មានថតរូបភាពទេ ប៉ុន្តែអ្នកលក់ដូរទាំងនោះ សុទ្ធតែមានចិត្តខឹង និងនាំគ្នានិយាយថា ផ្សារតាសោមចិនតូចចង្អៀត ហើយមានអ្នកយកដីផ្សារធ្វើតូបធំៗ ថែមទាំងទៅលក់ពីមុខតូបពួកគាត់ ដើម្បីមិនឱ្យពួកគាត់លក់។ ហើយបើសិនជាពួកគាត់នាំគ្នាចូលទៅលក់នៅខាងក្នុងជ្រៅពេក ច្បាស់ជាគ្មានអ្នកណាចូលទៅទិញនោះទេ។
ក្រោយមកអ្នកលក់ដូរទាំងនោះ ក៏នាំគ្នាចេញមកលក់ដូរនៅមុខមណ្ឌលសុខភាពអង្គសូរភី តែលក់ដូរបានរយៈពេលខ្លីប៉ុណ្ណោះ ក៏ត្រូវបានអ្នកគ្រប់គ្រងនៅមណ្ឌលសុខភាពធ្វើរបងដាក់សំណាញ់ងាយស្រួលបិទបើក ដោយមិនឱ្យអ្នកលក់ដូរបន្តលក់នៅខាងមុខមណ្ឌលជាប់នឹងផ្លូវជាតិលេខ៣៣ ទៅកំពង់ត្រាចនោះឡើយ។
ស្របពេលនោះ ក៏មានអ្នកគ្រូពេទ្យម្នាក់បានចេញមុខមកអះអាងប្រាប់ដែរថា ពួកអ្នកលក់ដូរទាំងនោះ គឺលក់ដូរហើយ ថែមទាំងចោលសំរាមរាយប៉ាយពេញមុខមណ្ឌល ទើបគ្រូពេទ្យចំណាយលុយធ្វើរបងបាំងមិនឱ្យអ្នកលក់ដូរបន្តចូលទៅលក់នៅមុខមណ្ឌលទៀតទេ។
លុះនៅព្រឹកមិញនោះដែរ គឺថ្ងៃទី២២ ខែកុម្ភៈ ឆ្នាំ២០២១ នគរបាលប៉ុស្តិ៍អង្គសូរភី ក៏បានចេញមកប្រាប់ពលរដ្ឋដែរថា កុំអោយពួកគាត់ប្រជ្រៀតគ្នាលក់ដូរក្បែរបងសំណាញ់របស់មណ្ឌលសុខភាពអី វាអាក្រក់ភ្នែកមើលណាស់។ ម្យ៉ាងទៀត ខ្លាចនឹងមានគ្រោះថ្នាក់ចរាចរណ៍ផងដែរ។
សូមបញ្ជាក់ថា ផ្សារសោមចិននេះ កាលពី៤០ឆ្នាំមុន ឯកឧត្តមសោមចិន បានមកកាន់តំណែងជាចៅហ្វាយខេត្តកំពត ហើយដីនេះ គឺមានទំនាស់គ្នាមួយរវាងពលរដ្ឋ និងពលរដ្ឋដែលចែកគ្នាមិនដាច់សោះ ទើបឯកឧត្តមបានដកយកដីដែលមានជម្លោះនោះមកទុកជាកន្លែងផ្សារឱ្យប្រជាពលរដ្ឋលក់ដូរមកទាល់សព្វថ្ងៃនេះ។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ