រាជធានីភ្នំពេញ ៖ ក្រសួងសុខាភិបាលកម្ពុជា នៅព្រឹកថ្ងៃទី២៣ ខែកុម្ភៈ បានប្រកាសឲ្យដឹងថា កំណើននៃការឆ្លងវីរុសកូវីដ-១៩ នៃព្រឹត្តិការណ៍សហគមន៍២០កុម្ភៈ «នៅតែបន្តកើនឡើង» នៅឡើយ…
រាជធានីភ្នំពេញ ៖ ក្រសួងសុខាភិបាលកម្ពុជា នៅព្រឹកថ្ងៃទី២៣ ខែកុម្ភៈ បានប្រកាសឲ្យដឹងថា កំណើននៃការឆ្លងវីរុសកូវីដ-១៩ នៃព្រឹត្តិការណ៍សហគមន៍២០កុម្ភៈ «នៅតែបន្តកើនឡើង» នៅឡើយ ជាក់ស្តែងគិតត្រឹមព្រឹកថ្ងៃទី២៣ ខែកុម្ភៈនេះ គឺមានអ្នកកើតកូវីដ១៩ ឆ្លងក្នុងសហគមន៍ឡើងដល់៩៩ករណី ។
ធ្ងន់ធ្ងរជាងនេះទៅទៀតនោះ បើទោះបីជាប្រទេសកម្ពុជា មិនទាន់មានករណីបាត់បង់ជីវិតដោយសារតែជំងឺកូវីដ-១៩ ក៏ដោយ «តែហានិភ័យនៃការចម្លងវីរុសដ៏កាចសាហាវនេះនៅតែមានខ្ពស់ ហើយស្ថានភាពបច្ចុប្បន្ន គឺមានសភាពរាតត្បាតធំជាង និងសាំញុំាជាង ព្រឹត្តិការណ៍សហគមន៍ ២៨វិច្ឆិកា កន្លងទៅ ជាពិសេសគឺការចម្លងប្រភេទវីរុសបំប្លែងថ្មី ដែលការចម្លងរបស់វាមានសភាពកាចសាហាវ និងលឿនជាងធម្មតា» ។
ក្រសួងសុខាភិបាលបានគូសបញ្ជាក់ថា នៅថ្ងៃទី២២ ខែកុម្ភៈ វេលាម៉ោង៦និង៣០នាទីរសៀល លទ្ធផលពីវិទ្យាស្ថានប៉ាស្ទ័រកម្ពុជា បានបញ្ជាក់នូវការវិភាគឃើញអ្នកជំងឺ០៣នាក់ មានឆ្លងវីរុសកូវីដ-១៩ (ប្រភេទ SAR-Cov-2 UK Variant) ។
ក្រសួងសុខាភិបាលបានបន្ថែមទៀតថា «បុគ្គលទាំងបីនាក់នេះ ម្នាក់មានអាសយដ្ឋាននៅសង្កាត់ទន្លេបាសាក់ ខណ្ឌចំការមន រាជធានីភ្នំពេញ និងពីរនាក់ទៀតជាអ្នកនៅក្លឹបកំសាន្ត N8 ។ ករណីឆ្លងលឿនបែបនេះ នឹងមានលទ្ធភាពអាចបន្តឆ្លងនៅក្នុងសហគមន៍ ប្រសិនបើប្រជាពលរដ្ឋយើងមិនបានយកចិត្តទុកដាក់បន្តអនុវត្តន៍វិធានការណ៍សុខាភិបាលដែលក្រសួងធ្លាប់បានចេញសេចក្តីណែនាំក្រើនរំលឹកអំពាវនាវជារឿយៗដែរ» ។
សូមបញ្ជាក់ថា គិតត្រឹមព្រឹកថ្ងៃទី២៣ ខែកុម្ភៈ ឆ្នាំ២០២១ កម្ពុជារកឃើញអ្នកឆ្លងកូវីដ ១៩ សរុប៥៩៣នាក់ និងអ្នកជាសះស្បើយមានចំនួន៤៧៥នាក់ និងអ្នកកំពុងព្យាបាលនៅតាមមន្ទីរពេទ្យរាជធានី-ខេត្តមានចំនួន ១១៦ នាក់ ។ ក្នុងនោះអ្នកកើតកូវីដ -១៩ នៃព្រឹត្តិការណ៍សហគមន៍ ២០កុម្ភៈ មានការកើនឡើងដល់ ៩៩ នាក់ហើយ ភាគច្រើនជាជនជាតិចិន ៕
ចែករំលែកព័តមាននេះ