រាជធានីភ្នំពេញ ៖ នៅព្រឹកថ្ងៃទី២៣ ខែកុម្ភៈ ឆ្នាំ២០២១នេះ ក្រសួងសុខាភិបាលបានប្រកាសអំពីការរកឃើញនូវករណីវិជ្ជមានកូវីដ១៩ ចំនួន២៥ ករណី ដែលភាគច្រើន គឺជាការឆ្លងក្នុងសហគមន៍…
រាជធានីភ្នំពេញ ៖ នៅព្រឹកថ្ងៃទី២៣ ខែកុម្ភៈ ឆ្នាំ២០២១នេះ ក្រសួងសុខាភិបាលបានប្រកាសអំពីការរកឃើញនូវករណីវិជ្ជមានកូវីដ១៩ ចំនួន២៥ ករណី ដែលភាគច្រើន គឺជាការឆ្លងក្នុងសហគមន៍ ហើយអ្វីដែលគួរឲ្យកត់សម្គាល់នោះ គឺមានបុរសជនជាតិចិនមួយរូបដែលកើតកូវីដ១៩ «មិនអាចទាក់ទងបាន» ។
វិជ្ជមានកូវីដ១៩ ទាំង ២៥ ករណី គឺមាន ២៣ ករណីជាប់ទាក់ទងព្រឹត្តិការណ៍ ២០ កុម្ភៈ ដែលមានជនជាតិចិនប្រុស-ស្រី ចំនួន ២១រូប និងខ្មែរ ២រូប ។ អ្វីដែលក្រសួងសុខាភិបាលបានបញ្ជាក់នោះ គឺថាអ្នកកើតកូវីដ-១៩ ចំនួន ២១នាក់ ត្រូវបានដាក់សម្រាកព្យាបាលនៅមណ្ឌលសុខភាពចាក់អង្រែ ។
ក្រសួងសុខាភិបាលបានបន្តថា ប៉ុន្តែអ្នកជំងឺ២នាក់ទៀត គឺមាន ស្ត្រីខ្មែរអាយុ៤២ ឆ្នាំដែលមានអាសយដ្ឋានស្នាក់នៅខណ្ឌឬស្សីកែវ រាជធានីភ្នំពេញ «មិនព្រមទៅសម្រាកព្យាបាលនៅមន្ទីរពេទ្យដោយសម្អាងគាត់មានកូនតូចនៅជាមួយ ដែលអាជ្ញាធរមានសមត្ថកិច្ច និងមន្ត្រីសុខាភិបាលកំពុងសម្របសម្រួល ។ តែអ្នកជំងឺជាបុរសជនជាតិចិនមួយរូប អាយុ២៣ឆ្នាំ មានអាស័យដ្ឋានស្នាក់នៅភ្នំពេញ «មិនអាចទាក់ទងបាន» ។
ជាមួយគ្នានោះផងដែរ លោកស្រី ឱ វណ្ណឌីន រដ្ឋលេខាធិការនិងជាអ្នកនាំពាក្យក្រសួងសុខាភិបាលនៅព្រឹក ថ្ងៃទី ២៣ ខែកុម្ភៈនេះផងដែរ បានស្នើសុំបងប្អូនអ្នកបើកតាក់ស៊ី រត់កង់បី ដែលបានដឹកមនុស្សចេញចូលនៅទីទាំងចំនួន ២៣ ដែលក្រសួងបានប្រកាសសូមចូលរួមមកធ្វើតេស្តរកកូវីដ ១៩ ដើម្បីទប់ស្កាត់ និងបង្ការនូវការឆ្លង និងការរីករាលដាលនៃជំងឺកូវីដ ១៩ ។
សម្តេចតេជោ ហ៊ុន សែន នាយករដ្ឋមន្ត្រីកម្ពុជានៅក្នុងសារសម្លេងពិសេសកាលពីរាត្រីថ្ងៃទី ២២ កុម្ភៈ បានអំពាវនាវដល់ ដល់បងប្អូនរត់តាក់ស៊ី រត់កង់បី រត់ផាស់អាប់គ្រប់ប្រភេទ សុំចូលរួមយកសំណាក ដើម្បីទប់ស្កាត់បង្ការការរីករាលដាលកូវីដ១៩ ព្រោះពេលនេះ «ព្រឹត្តិការណ៍ ២០កុម្ភៈ» ដែលកើតនៅកណ្តាលរាជធានីភ្នំពេញលើកនេះ មានសភាពធ្ងន់ធ្ងរជាងពេលមុនៗ រហូតឈានដល់ការបិទនូវទីតាំងជាច្រើនកន្លែង និងការបិទសាលារៀនរដ្ឋ និងឯកជនរយៈពេល ២ សប្តាហ៍ជាថ្មី ៕
ចែករំលែកព័តមាននេះ