រាជធានីភ្នំពេញ ៖ ជនសង្ស័យម្នាក់ធ្វើសកម្មភាពឆក់ទូរស័ព្ទពីស្រី្ត២នាក់កំពុងជិះម៉ូតូមកពីផ្ទះប្អូនថ្លៃបានសម្រេច ប៉ុន្តែត្រូវជនរងគ្រោះស្រែកឆោឡោបង្កការភ្ញាក់ផ្អើលដល់ប្រជាពលរដ្ឋនាំគ្នាដេញស្ទាក់ចាប់ឃាត់ខ្លួនបានភ្លាមៗ រួចប្រគល់ទៅឱ្យសមត្ថកិច្ចចាត់ការតាមច្បាប់ ។
ហេតុការណ៍៍ខាងលើនេះបានបង្កអោយមានការភ្ញាក់ផ្អើលកើតឡើងកាលពីវេលាម៉ោង៧និង៣០នាទីយប់ថ្ងៃទី២២ ខែកុម្ភៈ ឆ្នាំ២០២១ ត្រង់ចំណុចតារាងបាល់មួយកន្លែង តាមបណ្ដោយផ្លូវបេតុង ស្ថិតក្នុងភូមិត្រពាំងជ្រៃ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ។
ជនសង្ស័យឈ្មោះ សាន្ត ប៊ុនសៀង ភេទប្រុស អាយុ២២ឆ្នាំ មុខរបរបុគ្គលិកហាងនៅម្តុំផ្លូវ២០០៤ ស្នាក់នៅភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ មានស្រុកកំណើតនៅភូមិត្រពាំងកក់ ឃុំធំខាងត្បូង ស្រុកត្រាំកក់ ខេត្តតាកែវ ។ រីឯម៉ូតូមួយគ្រឿងដែលជនសង្ស័យជិះធ្វើសកម្មភាពម៉ាកហុងដាឌ្រីម ស៊េរីឆ្នាំ២០១៥ឡើងតែម២០២០ ពណ៌ខ្មៅ ពាក់ស្លាកលេខ ភ្នំពេញ 1DJ-1099 ។
ចំណែកជនរងគ្រោះទាំង២នាក់ ក្នុងនោះម្នាក់ឈ្មោះ ផេង សុភឿ ភេទស្រី អាយុ២៨ឆ្នាំ មុខរបរកម្មកររោងចក្រ និងម្នាក់ទៀតឈ្មោះ វ៉ាស្រី ហ័រ ភេទស្រី អាយុ២១ឆ្នាំ មុខរបរនៅផ្ទះ ។ ជនរងគ្រោះទាំង២នាក់រស់នៅភូមិឃុំកើតហេតុជាមួយគ្នា។ ជនរងគ្រោះទាំង២នាក់ជិះម៉ូតូមួយគ្រឿងម៉ាកស៊ុយហ្ស៊ុយគីលែត ពណ៌សលាយខៀវ ពាក់ស្លាកលេខ ក្រចេះ 1E-0763 ។
តាមប្រភពព័ត៌មានពីជនរងគ្រោះបានបញ្ជាក់ប្រាប់ថា នៅមុនពេលកើតហេតុ ពួកគាត់បានជិះម៉ូតូមួយគ្រឿងត្រឡប់មកពីផ្ទះប្អូនថ្លៃ ក្នុងគោលបំណងទៅផ្ទះជួលវិញ ខណៈពេលកំពុងតែជិះម៉ូតូធ្វើដំណើរមកដល់ចំណុចកើតហេតុខាងលើ ស្រាប់តែលេចមុខជនសង្ស័យម្នាក់ជិះម៉ូតូមួយគ្រឿងមកក្បែរពួកគាត់ ហើយលូកដៃឆក់យកទូរស័ព្ទដែលទុកនៅក្នុងថតម៉ូតូខាងមុខបានសម្រេច រួចជិះគេចខ្លួន ។
តាមប្រភពដដែលបានបន្តថា ភ្លាមៗនោះពួកគាត់ស្រែក ចោរៗ បង្កការភ្ញាក់ផ្អើលដល់ប្រជាពលរដ្ឋឆោឡោនាំគ្នាដេញតាមចាប់ ធ្វើឱ្យជនសង្ស័យភ័យក៏ជិះម៉ូតូគេចពីប្រជាពលរដ្ឋទៅទាក់នឹងសំណាញ់តារាងបាល់ទះ បណ្ដាលឲ្យជ្រុលទៅបុកបង់អង្គុយលេងធ្វើឲ្យដួលក្រោកមិនរួច ហើយក៏៏ត្រូវប្រជាពលរដ្ឋនាំគ្នាចាប់ឃាត់ខ្លួនបានភ្លាមៗប្រគល់ទៅសមត្ថកិច្ចយកទៅសួរនាំនៅប៉ុស្តិ៍រដ្ឋបាលកាកាបទី២។ ចំណែកបង់អង្គុយលេងវិញរងការខូចខាតបែកខ្ទិចអស់ទាំងស្រុង ។ ចំណែកម៉ូតូជនសង្ស័យរងការខូចខាតផ្នែកខាងមុខបន្តិចបន្តួចប៉ុណ្ណោះ។
ក្រោយពេលកើតហេតុ បន្ទាប់ពីសមត្ថកិច្ចបានសួរនាំ ជនសង្ស័យបានឆ្លើយសារភាពថា ខ្លួនពិតជាបានធ្វើសកម្មភាពឆក់ងទូរស័ព្ទដៃរបស់ស្រី្តរងគ្រោះប្រាកដមែន បន្ទាប់មកសមត្ថកិច្ចបានកសាងសំណុំរឿងបញ្ជូនទៅផ្នែកជំនាញខណ្ឌចាត់ការទៅតាមនិតិវិធីបន្ត។ ចំណែកទូរស័ព្ទ ត្រូវបានសមត្ថកិច្ច ប្រគល់អោយទៅស្រី្តរងគ្រោះវិញ ៕
ចែករំលែកព័តមាននេះ