រាជធានីភ្នំពេញ ៖ ជនសង្ស័យ២នាក់បានផ្តួលម៉ូតូទុកចោល រួចរត់គេចខ្លួនបាត់ស្រមោល បន្ទាប់ពីធ្វើសកម្មភាពឆក់កាបូបពីគូស្នេហ៍មួយគូដែលកំពុងជិះម៉ូតូឌុបគ្នាត្រឡប់មកពីញ៉ាំអាហារ តែមិនបានសម្រេច។ ហេតុការណ៍នេះកើតឡើងកាលពីវេលាម៉ោង១រំលងអធ្រាត្រឈានចូលថ្ងៃទី២២ ខែកុម្ភៈ ឆ្នាំ២០២១ ត្រង់ចំណុចទល់មុខអនុវិទ្យាល័យចតុមុខ…
រាជធានីភ្នំពេញ ៖ ជនសង្ស័យ២នាក់បានផ្តួលម៉ូតូទុកចោល រួចរត់គេចខ្លួនបាត់ស្រមោល បន្ទាប់ពីធ្វើសកម្មភាពឆក់កាបូបពីគូស្នេហ៍មួយគូដែលកំពុងជិះម៉ូតូឌុបគ្នាត្រឡប់មកពីញ៉ាំអាហារ តែមិនបានសម្រេច។ ហេតុការណ៍នេះកើតឡើងកាលពីវេលាម៉ោង១រំលងអធ្រាត្រឈានចូលថ្ងៃទី២២ ខែកុម្ភៈ ឆ្នាំ២០២១ ត្រង់ចំណុចទល់មុខអនុវិទ្យាល័យចតុមុខ តាមបណ្ដោយផ្លូវ២០៨កែងនឹងផ្លូវព្រះនរោត្ដម ស្ថិតក្នុងសង្កាត់បឹងរាំង ខណ្ឌដូនពេញ។
តាមប្រភពព័ត៌មានពីស្ត្រីជាជនរងគ្រោះមានឈ្មោះ ធារ៉ា អាយុ៣៣ឆ្នាំ ស្នាក់នៅផ្ទះជួលក្នុងសង្កាត់ទួលទំពូងទី១ ខណ្ឌចំការមន បានរៀបរាប់ប្រាប់ឲ្យដឹងថា នៅមុនពេលកើតហេតុ រូបគាត់ និងបុរសជាសង្សារបានជិះម៉ូតូមួយគ្រឿងម៉ាក ហុងដាស្កុបភី ពណ៌ស សុំមិនបញ្ចេញស្លាកលេខ។ ដោយបានជិះដឹកគ្នាចេញពីញ៉ាំអាហារនៅផ្សារកណ្តាល បំណងត្រឡប់ទៅផ្ទះជួលនៅឯទួលទំពូងវិញ។
ប្រភពដដែលបន្តថា ប៉ុន្តែខណៈពេលធ្វើដំណើរតាមបណ្ដោយផ្លូវ៥១ ទិសដៅពីជើងទៅត្បូង ហើយរូបគាត់ (ស្ត្រីរងគ្រោះ) គឺអង្គុយរួមដំណើរពីក្រោយ និងមានកាបូបស្ពាយចំហៀងជាប់នឹងខ្លួនថែមទៀតផង។
ប្រភពដដែលបន្តថា លុះពេលជិះឌុបគ្នាដល់ចំណុចខាងក្រោយវិទ្យាល័យព្រះស៊ីសុវត្ថិ តាមបណ្ដោយផ្លូវ៥១ ស្ថិតក្នុងសង្កាត់បឹងរាំង ខណ្ឌដូនពេញ ក៏ស្រាប់តែលេចមុខជនសង្ស័យចំនួន២នាក់ជិះម៉ូតូមួយគ្រឿងម៉ាកស៊ុយស៊ីគីនិច ពណ៌ខ្មៅលាយ.ស ពាក់ស្លាកលេខ ភ្នំពេញ1CC-0209 បានជិះតាមពីក្រោយ និងបានធ្វើសកម្មភាពឆក់កាបូបស្ពាយរបស់គាត់ (ស្ត្រីរងគ្រោះ) តែស្ត្រីរងគ្រោះមានស្មារតីរឹង ក៏ស្រវាចាប់កាបូបទាញយកមកវិញ ធ្វើឲ្យជនសង្ស័យឆក់កាបូបរបស់ជនរងគ្រោះមិនបានសម្រេច រួចក៏បន្ថែមល្បឿនជិះរត់គេចខ្លួនចេញពីកន្លែងកើតហេតុ។
ភា្លមៗនោះ ជនរងគ្រោះក៏បានស្រែកថា «ចោរៗ» រួចក៏ជិះដេញតាមពីក្រោយ រហូតដល់ចំណុចកើតហេតុខាងលើស្រាប់តែម៉ូតូរបស់ជនសង្ស័យបានដាច់ខ្សែពានទៅមុខលែងរួច ក្រុមជនសង្ស័យក៏ផ្តួលម៉ូតូទុកចោលរត់គេចខ្លួនបាត់ស្រមោលតែម្តង។ បន្ទាប់មកជនរងគ្រោះក៏បានរាយការណ៍ជូនសមត្ថកិច្ចមូលដ្ឋានឲ្យចុះមកជួយធ្វើអន្តរាគមន៍ផងដែរ។
ក្រោយពេលកើតហេតុសមត្ថកិច្ចមូលដ្ឋានក៏បាននាំជនរងគ្រោះទៅធ្វើការដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលបឹងរាំង និងបានយកម៉ូតូរបស់ជនសង្ស័យទៅរក្សាទុករង់ចាំធ្វើការស្រាវជ្រាវតាមចាប់ក្រុមជនសង្ស័យយកមកផ្តន្ទាទោសទៅតាមផ្លូវច្បាប់៕
ចែករំលែកព័តមាននេះ