រាជធានីភ្នំពេញ ៖ ក្រសួងសុខាភិបាលកម្ពុជានៅព្រឹកថ្ងៃទី ២២ ខែកុម្ភៈ ឆ្នាំ២០២១ បានអំពាវនាវឲ្យបុគ្គលគ្រប់រូបដែលបានចេញ-ចូលទីតាំងចំនួន ២៣ កន្លែងចន្លោះពីថ្ងៃទី ៦ ខែកុម្ភៈ ដល់ថ្ងៃទី ២០ ខែកុម្ភៈ ត្រូវមានភាពស្មោះត្រង់ មិនលាក់លៀម និងស្ម័គ្រចិត្តមកធ្វើតេស្តរកមេរោគកូវីដ-១៩ ឲ្យបានឆាប់រហ័ស ហើយបុគ្គលដែលពាក់ព័ន្ធនឹងព្រឹត្តិការណ៍សហគមន៍នេះ ត្រូវតែដាក់ខ្លួននៅដាច់ដោយឡែករយៈពេល ១៤ ថ្ងៃឲ្យបានត្រឹមត្រូវ ។
គិតមកត្រឹមព្រឹកថ្ងៃទី២២ នេះមានទីតាំង ២៣កន្លែងក្នុងខណ្ឌចំនួន ៧ ក្នុងរាជធានីភ្នំពេញ ត្រូវបានបិទទាំងស្រុងក្នុង «ព្រឹត្តិការណ៍សហគមន៍ ២០កុម្ភៈ» ក្នុងនោះផងដែរ ក្រសួងបន្តរកឃើញអ្នកឆ្លងជំងឺកូវីដ-១៩ ថ្មីចំនួន ៣៥នាក់ ដែលក្នុងនោះពាក់ព័ន្ធនឹងព្រឹត្តិការណ៍ឆ្លងក្នុងសហគមន៍មានចំនួន ៣១នាក់ មានទាំងជនជាតិចិន ខ្មែរ និងកូរ៉េ ។
ក្រសួងសុខាភិបាលបានអំពាវនាវថា «បុគ្គលដែលធ្លាប់បានចេញចូលទីតាំងទាំង ២៣ កន្លែង ឬបុគ្គលពាក់ព័ន្ធទៅនឹងព្រឹត្តិការណ៍ ឬដឹងខ្លួនថា ជាអ្នកប៉ះពាល់ជាមួយអ្នកមានវីរុសកូវីដ-១៩ ត្រូវមានភាពស្មោះត្រង់ មិនលាក់លៀម និងស្ម័គ្រចិត្តមកធ្វើតេស្តរកមេរោគកូវីដ-១៩ នៅរៀងរាល់ម៉ោងធ្វើការ សូមអញ្ជើញមកធ្វើតេស្ត យកវត្ថុសំណាកដើម្បីវិភាគរកវីរុសកូវីដ-១៩ នៅមណ្ឌលសុខភាពចាក់អង្រែនៃរាជធានីភ្នំពេញ ហើយដាក់ខ្លួនដាច់ដោយឡែកពីក្រុមគ្រួសារ ធ្វើចត្តាឡីស័កចំនួន ១៤ ថ្ងៃនៅតាមផ្ទះរៀងៗខ្លួន ព្រមទាំងធ្វើការតាមដានសុខភាពជារៀងរាល់ថ្ងៃ » ។
ក្រសួងសុខាភិបាលបានបន្ថែមថា ប្រសិនបើមានអាការៈមិនស្រួលខ្លួន ដូចជាមានឡើងកំដៅខ្លួន ក្អក ផ្តាសាយ ឈឺបំពង់ក ឬពិបាកដង្ហើមជាដើម សូមហៅទៅលេខទូរស័ព្ទទាន់ហេតុការណ៍ ១១៥ ។
ក្រសួងសុខាភិបាលក៏បានឲ្យដឹងផងដែរថា ទីតាំងទាំង ២៣ កន្លែងស្ថិតនៅក្នុងទឹកដីខណ្ឌចំការមន, បឹងកេងកង, ដូនពេញ, ៧មករា, ទួលគោក, ជ្រោយចង្វា និងខណ្ឌពោធិ៍សែនជ័យ ហើយទីតាំងដែលត្រូវបានបិទ ភាគច្រើនស្ថិតក្នុងទឹកដីខណ្ឌចំការមន ចំនួន ៦ ទីតាំង បន្ទាប់មកគឺខណ្ឌបឹងកេងកង ខណ្ឌដូនពេញ និងខណ្ឌ ៧ មករា ។
ទីតាំងទាំង ២៣ កន្លែងដែលស្ថិតក្នុងទឹកដីខណ្ឌចំនួន ៧ ក្នុងរាជធានីភ្នំពេញ គឺមានទាំងក្លឹបកម្សាន្ត អគារអាផាតមិន ខារ៉ាអូខេ និងសាលារៀន ៕
ចែករំលែកព័តមាននេះ