រាជធានីភ្នំពេញ ៖ គិតមកត្រឹមព្រឹកថ្ងៃទី២២ នេះ មានទីតាំង២៣កន្លែងក្នុងខណ្ឌចំនួន ៧ ក្នុងរាជធានីភ្នំពេញ ត្រូវបានបិទទាំងស្រុងក្នុង «ព្រឹត្តិការណ៍សហគមន៍ ២០កុម្ភៈ»…
រាជធានីភ្នំពេញ ៖ គិតមកត្រឹមព្រឹកថ្ងៃទី២២ នេះ មានទីតាំង២៣កន្លែងក្នុងខណ្ឌចំនួន ៧ ក្នុងរាជធានីភ្នំពេញ ត្រូវបានបិទទាំងស្រុងក្នុង «ព្រឹត្តិការណ៍សហគមន៍ ២០កុម្ភៈ» ក្នុងនោះផងដែរក្រសួងបន្តរកឃើញអ្នកឆ្លងជំងឺកូវីដ-១៩ថ្មីចំនួន ៣៥នាក់ ដែលក្នុងនោះពាក់ព័ន្ធនឹងព្រឹត្តិការណ៍ឆ្លងក្នុងសហគមន៍មានចំនួន ៣១នាក់ មានទាំងជនជាតិចិន ខ្មែរ និងកូរ៉េ ។
ក្រសួងសុខាភិបាលក៏បានឲ្យដឹងផងដែរថា ទីតាំងទាំង ២៣ កន្លែង ស្ថិតនៅក្នុងទឹកដីខណ្ឌចំការមន, បឹងកេងកង, ដូនពេញ, ៧មករា, ទួលគោក, ជ្រោយចង្វា និងខណ្ឌពោធិ៍សែនជ័យ ហើយទីតាំងដែលត្រូវបានបិទ ភាគច្រើនស្ថិតក្នុងទឹកដីខណ្ឌចំការមន ចំនួន ៦ ទីតាំង បន្ទាប់មកគឺខណ្ឌបឹងកេងកង ខណ្ឌដូនពេញ និងខណ្ឌ ៧ មករា ។
ទីតាំងទាំង ២៣ កន្លែង ដែលស្ថិតក្នុងទឹកដីខណ្ឌចំនួន ៧ ក្នុងរាជធានីភ្នំពេញ គឺមានទាំងក្លឹបកម្សាន្ត អគារអាផាតមិន ខារ៉ាអូខេ និងសាលារៀន ។
ជាមួយគ្នានោះផងដែរ ក្រសួងសុខាភិបាលបានអំពាវនាវ និងក្រើនរម្លឹកជុំវិញព្រឹត្តិការណ៍សហគមន៍ ២០ កុម្ភៈ សូមឲ្យប្រជាពលរដ្ឋទាំងអស់ទូទាំងប្រទេស ជាពិសេសអ្នករស់នៅក្រុងភ្នំពេញ និងខេត្តកណ្តាល ត្រូវប្រកាន់យកនូវការប្រុងប្រយ័ត្នខ្លួនជាប់ជានិច្ច គ្រប់គ្រងក្រុមគ្រួសារឲ្យបានល្អ និងចូលរួមអនុវត្តវិធានការការពារខ្លួនឲ្យបានខ្ជាប់ខ្ជួន ។
ក្រសួងសុខាភិបាលបានបញ្ជាក់ថា «តាមការរុករកស្រាវជ្រាវ បានបង្ហាញថា ស្ថានភាពនៃការចម្លងក្នុងសហគមន៍ជាពេលនេះ មានលក្ខណៈធំជាង និងសាំញ៉ាំជាងព្រឹត្តិការណ៍សហគមន៍ ២៨ វិច្ឆិកា ហើយវិធានការ និងអន្តរាគមន៍នានាពេលនេះ បានដាក់ចេញជាបណ្តើរៗ គឺអាស្រ័យទៅតាមស្ថានភាពនៃការរកឃើញវត្តមានវីរុសកូវីដ-១៩ នៅតាមទីតាំងនិមួយៗ (localized interventions) ដើម្បីទប់ស្កាត់ការចម្លងបន្តវីរុសកូវីដ-១៩ នៅក្នុងសហគមន៍ទ្រង់ទ្រាយធំធេង» ៕
ចែករំលែកព័តមាននេះ