រាជធានីភ្នំពេញ ៖ សម្ដេច ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ បានចេញបញ្ជាឲ្យយកគ្រូបង្រៀនទាហានម្នាក់មកធ្វើចត្តាឡីស័កជាបន្ទាន់ ក្រោយពីសង្ស័យឆ្លងជំងឺកូវីដ-១៩ ។
តាមរយៈសារសំឡេងរបស់សម្ដេច ទៀ បាញ់ នៅថ្ងៃទី២២ ខែកុម្ភៈ ឆ្នាំ២០២១ បានឲ្យដឹងថា «មានបញ្ហាមួយដែលសំខាន់ជាងគេបំផុត ដោយសារវិជ្ជបណ្ឌិតម្នាក់គាត់បើកគ្លីនិក ហើយគាត់ព្យាបាលអ្នកកើតកូវីដ-១៩ ហ្នឹង ហើយឥឡូវនឹងមានបញ្ហាធំបំផុតដែលគាត់ទៅបង្រៀនពេទ្យយើងទាំងកាំភ្លើងធំផង មនុស្សផង សាលាបច្ចេកទេសផង ពេទ្យទៅរៀន ទាំងប៉ុន្មាន ត្រូវដាក់ចត្តាឡីស័កទាំងអស់ មុនបង្អស់យកវិជ្ជបណ្ឌិតដែលបង្រៀនយកមកឃុំ ត្រួតពិនិត្យយកសំណាក់ទៅពិនិត្យភ្លាមៗ» ។
សម្ដេចបន្ដថា «ប្រសិនបើគាត់ឆ្លងមែនទែនយើងកុនហើយ វិជ្ជបណ្ឌិតរបស់យើងទាំងអស់ គឺឥឡូវផ្អាកទាំងអស់ធ្វើចត្តាឡីស័កទាំងអស់ នៅកន្លែងកាំភ្លើងធំនៅវិទ្យាស្ថានតេជោ នៅកន្លែងមួយចំនួនទៀតទាំងអស់នឹង គឺយកដាក់ចត្តាឡីស័កទាំងអស់» ។
សម្ដេចបន្ដថា ការងារបន្ទាន់ត្រូវយកវិជ្ជបណ្ឌិតម្នាក់ទៅធ្វើចត្តាឡីស័កជាមុនសិន ដើម្បីមានវិធានការបន្ដទៀត ហើយត្រូវធ្វើយ៉ាងត្រឹមត្រូវបំផុត ។ សម្ដេចថា ត្រូវផ្អាកទាំងអស់កន្លែងដែលវិជ្ជបណ្ឌិតទៅបង្រៀន ដោយឡែកកន្លែងផ្សេងៗទៀត មិនជាប់ពាក់ព័ន្ធត្រូវដំណើរការជាធម្មតា ។
សូមរំលឹកថា គិតត្រឹមថ្ងៃទី២២ ខែកុម្ភៈ ឆ្នាំ២០២១នេះ កម្ពុជារកឃើញអ្នកឆ្លងកូវីដ១៩ ចំនួន៥៦៨នាក់ ក្នុងនោះ អ្នកជាសះស្បើយ ចំនួន៤៧៥នាក់ និងអ្នកជំងឺ ចំនួន៩៣នាក់ កំពុងសម្រាកនៅមន្ទីរពេទ្យ ។
ព្រឹត្តិការណ៍២០ កុម្ភៈ ត្រូវបានក្រសួងរកអ្នកឆ្លងជំងឺកូវីដ១៩ ជាបន្តបន្ទាប់ក្នុងនោះជនជាតិចិន មានអត្រារកឃើញច្រើនឆ្លងជំងឺកូវីដ១៩ ៕
ចែករំលែកព័តមាននេះ