រាជធានីភ្នំពេញ ៖ ស្ត្រីម្នាក់ឈឺពោះគ្រប់ខែសម្រាលកូន តែអត់មានថវិកា ត្រូវបានកម្លាំងអង្គភាព៧១១ ជួយសង្គ្រោះបញ្ជូនទៅមន្ទីរពេទ្យបង្អែកពោធិ៍ចិនតុង កាលពីវេលាម៉ោង៤និង៣០នាទីទៀបភ្លឺ ថ្ងៃទី២២ ខែកុម្ភៈ ឆ្នាំ២០២១…
រាជធានីភ្នំពេញ ៖ ស្ត្រីម្នាក់ឈឺពោះគ្រប់ខែសម្រាលកូន តែអត់មានថវិកា ត្រូវបានកម្លាំងអង្គភាព៧១១ ជួយសង្គ្រោះបញ្ជូនទៅមន្ទីរពេទ្យបង្អែកពោធិ៍ចិនតុង កាលពីវេលាម៉ោង៤និង៣០នាទីទៀបភ្លឺ ថ្ងៃទី២២ ខែកុម្ភៈ ឆ្នាំ២០២១ ស្ថិតនៅភូមិផ្លាំង សង្កាត់កំបូល ខណ្ឌកំបូល ។
ស្ត្រីខាងលើនេះមានឈ្មោះ ក្រឹក ស៊ីណា អាយុ៣៥ឆ្នាំ មានប្តីឈ្មោះ ឈីន ពិសី អាយុ៣៦ឆ្នាំ ទាំង២នាក់គឺជាកម្មករសំណង់ ស្នាក់នៅការដ្ឋានសំណង់ក្នុងភូមិ-ឃុំកើតហេតុខាងលើ និងមានស្រុកកំណើតនៅភូមិគរ ឃុំព្រៃស្វាយ ស្រុកមោងឫស្សី ខេត្តបាត់ដំបង ព្រមទាំងមានកូនប្រុសម្នាក់អាយុ១០ឆ្នាំកំពុងរៀននៅសាលាជិតការដ្ឋានសំណង់ទៀតផង ។
តាមសំដីបុរសជាប្តីបានរៀបរាប់ប្រាប់ថា គាត់បានស្រលាញ់គ្នា នឹងចាប់ដៃគ្នាជាគូអនាគតអស់រយៈពេលជាង១០ឆ្នាំមកហើយ ដោយបង្កើតបានកូនប្រុសម្នាក់អាយុ១០ឆ្នាំ ។ ចំណែកជីវភាពគ្រួសាររបស់គាត់ក្រលំបាក មិនមានផ្ទះសម្បែងទេ ហើយកាលពីមុននៅស្រុកកំណើតគាត់នឹងគ្រួសារនៅចាំដីឱ្យគេ លុះបច្ចុប្បន្នមកធ្វើជាកម្មករសំណង់នៅការដ្ឋានខាងលើនេះ ។
បុរសជាប្តីបានបញ្ជាក់ទៀតថា ហេតុតែជីវភាពខ្វះខាត ប្រពន្ធរបស់គាត់បានធ្វើការជាកម្មករសំណង់ជាមួយគាត់ទាំងពពោះធំអស់រយៈពេលចំនួន៧ខែ រហូតទាល់តែធ្វើការលែងកើត ទើបសំរាកឈប់ធ្វើការ ។
បុរសជាប្តីបានបន្តទៀតថា ខណៈពេលប្រពន្ធរបស់គាត់ឈប់ធ្វើការពេលជិតគ្រប់ខែ ជីវភាពរបស់គាត់រឹតតែខ្វះខាត ណាមួយផ្គត់ផ្គង់ជីវភាពគ្រួសារ មានកូនតូចរៀនផង និងណាមួយត្រូវផ្តល់ប្រាក់ឱ្យឪពុកម្ដាយនៅស្រុកទៀត គឺពិតជាពិបាកមែនទែន ។ លុះរហូតដល់ប្រពន្ធគ្រប់ខែឈឺពោះសម្រាលកូន គាត់ក៏អត់មានលុយទៀត មិនដឹងគិតយ៉ាងម៉េចឡើយ ប៉ុន្តែគ្រានោះបានអ្នកជិតខាងជួយទូរស័ព្ទហៅរថយន្តសង្គ្រោះរបស់ក្រុមអង្គភាព៧១១ មកជួយដឹកយកទៅមន្ទីរពេទ្យបង្អែកពោធិ៍ចិនតុង តែមិនទាន់សម្រាលកូននៅឡើយទេ គឺកំពុងតែរង់ចាំសម្រាល ។
ជាចុងក្រោយ បុរសជាប្តីបានលើកដៃសំពះអំពាវនាវដល់សប្បុរសជនទាំងអស់ សូមមេត្តាជួយក្រុមគ្រួសារគាត់ផង ព្រោះអីគាត់មិនមានថវិកាសំរាប់ឲ្យប្រពន្ធគាត់ដែលកំពុងរង់ចាំ សម្រាលកូននេះទេ ។ ហើយនេះជាលេខទូរស័ព្ទទំនាក់ទំនងផ្ទាល់របស់សាម៉ី គឺ ៖ ០៦៨ ៨៧២ ៧៩០ និង ០៦៩ ៣៣៤ ២៩៩ ៕
ចែករំលែកព័តមាននេះ