រាជធានីភ្នំពេញ ៖ ក្រោយកម្លាំងមានសមត្ថកិច្ចដាក់បារ៉ាស់បិទយ៉ាងតឹងរ៉ឹងមិនអោយមានអ្នកណាម្នាក់ចេញ ឬចូលទៅក្នុងកោះពេជ្របាន ពាក់ព័ន្ធទៅនឹងករណីជំងឺកូវីដ១៩ ព្រឹត្តិការណ៍ ២០កុម្ភៈ កាលពីថ្ងៃម្សិលមិញនោះ នាថ្ងៃទី២១ ខែកុម្ភៈ…
រាជធានីភ្នំពេញ ៖ ក្រោយកម្លាំងមានសមត្ថកិច្ចដាក់បារ៉ាស់បិទយ៉ាងតឹងរ៉ឹងមិនអោយមានអ្នកណាម្នាក់ចេញ ឬចូលទៅក្នុងកោះពេជ្របាន ពាក់ព័ន្ធទៅនឹងករណីជំងឺកូវីដ១៩ ព្រឹត្តិការណ៍ ២០កុម្ភៈ កាលពីថ្ងៃម្សិលមិញនោះ នាថ្ងៃទី២១ ខែកុម្ភៈ ឆ្នាំ ២០២១នេះដែរ គេសង្កេតឃើញថា ត្រង់ចំណុចស្ពាននាគភ្លោះកោះពេជ្រ គឺបានបើកអោយអ្នកដំណើរធ្វើការចេញ-ចូលដោយសេរីជាធម្មតាទេ តែចំណែកឯច្រកចូលតាមស្ពានហង្ស និងស្ពានឥន្ធនូ និងតាមបណ្តាផ្លូវមួយចំនួននៅតែដាក់បារ៉ាស់ និងកម្លាំងមានសមត្ថកិច្ចឈរយាមហាមមិនអោយចេញ-ចូលឡើយ។
តែការអនុញ្ញាតិអោយចេញ ឬចូលទៅក្នុងកោះពេជ្រនេះដែរបានដោយសេរីសំរាប់តែជនជាតិខ្មែរយើងប៉ុណ្ណោះ ប៉ុន្តែសំរាប់ជនជាតិចិន និងជនបរទេសផ្សេងៗទៀត គឺនៅមិនទាន់អនុញ្ញាតិឡើយ ។ ចំណែកឯកម្មវិធីអពាហ៍ពិពាហ៍វិញ ក៏ឱ្យដំណើរការបានជាធម្មតាផងដែរ។
បើតាមសន្តិសុខកោះពេជ្រម្នាក់ បានប្រាប់ឱ្យដឹងថា ក្នុងថ្ងៃនេះដែរ នៅចំណុចស្ពាននាគភ្លោះ គឺបើកដំណើរការអោយមានអ្នកចេញ ឬចូលបានជាធម្មតា តែការចេញ-ចូលបាននេះ សម្រាប់តែជនជាតិខ្មែរយើងតែប៉ុណ្ណោះ ចំណែកឯជនជាតិចិន និងជនបរទេសផ្សេងៗទៀត គឺនៅបន្តមិនអនុញ្ញាតិអោយចេញ-ចូលបានឡើយ។
ហើយការចេញចូលបាននេះ គឺមាននៅស្ពាននាគភ្លោះតែមួយគត់ រីឯផ្លូវស្ពានហង្ស និងស្ពានឥន្ធនូ នៅបិទដដែល ចំណែកបរិវេណខាងក្នុងកោះពេជ្រវិញ គេបិទមិនអោយឆ្លងកាត់តែកន្លែងក្បែរៗអគារមួយចំនួនដែលពាក់ព័ន្ធមួយផ្នែកទេ ក្រៅពីនោះ គឺអាចជិះចូលបានទាំងអស់ និងមិនបិទកោះពេជ្រទាំងស្រុងឡើយ។
តាមប្រភពដដែលបានប្រាប់បន្តទៀតថា ចំណែកឯកម្មវិធីអាពាហ៍ពិពាហ៍វិញ គឺនៅបើកជា ធម្មតា ហើយក៏មានអគារខ្លះកំពុងតែឃើញគេរៀបចំតុបតែងរង់ចាំទទួលភ្ញៀវនាពេលល្ងាចនេះ និងមានកម្មវិធីអពាហ៍ពិពារហ៍មួយចំនួនទៀតក៏បានធ្វើការរំសាយមិនរៀបចំដោយខ្លួនឯងផងដែរ។
រីឯកាលពីថ្ងៃទី២០ ម្សិលមិញនេះ ក៏មានរោងការចំនួនពី៦ទៅ៧រោងដែរ ដែលនៅបើកទទួលភ្ញៀវ ដោយមានភ្ញៀវពី៦០%ទៅ៧០%ប៉ុណ្ណោះ បាននាំគ្នាមកចូលរួម ដោយខ្លះមកហូប និងខ្លះទៀតគ្រាន់តែចូលមកចងដៃ រួចក៏ត្រឡប់ទៅវិញ ទំនងជាមិនអាចចោលបាននិងចេះតែនាំគ្នាមកចូលរួមទៅ តាមមើល? ហើយក៏មានរោងការចំនួន២រោងទៀតក៏បានធ្វើការរំសាយផងដែរ។
កម្លាំងមានសមត្ថកិច្ចដែលឈរជើងយាមប្រចាំការនៅកោះពេជ្រ ក៏បានប្រាប់ឱ្យដឹងដែរថា ពាក់ព័ន្ធទៅនឹងការដាក់បារ៉ាស់ហាមឃាត់នៅមិនអោយជនបទេសផ្សេងៗ ជាពិសេសទៅលើជនជាតិចិន ចេញ ឬចូលនោះទេ ។ ហើយពួកគាត់នៅមិនទាន់បានដឹងច្បាស់ថា នឹងបើកដំណើរការជាធម្មតាវិញនៅពេលណានោះឡើយ? ដោយការហាមឃាត់មិនអោយជនជាតិចិន និងជនបរទេសណាម្នាក់ ចេញ-ចូលទៅក្នុងកោះពេជ្របានឡើយ ។ ចំណែកឯជនជាតិខ្មែរយើងវិញ អាចចេញ-ចូលបានជាធម្មតា រីឯឯរោងការវិញ គឺឃើញនៅដំណើរការបានជាធម្មតា ហើយភ្ញៀវពួកគាត់ក៏អាចអញ្ជើញមកហូបក្នុងកម្មវិធីការនាល្ងាចនេះបានដែរ។
ចែករំលែកព័តមាននេះ