រាជធានីភ្នំពេញ ៖ បុរសវ័យចំណាស់ម្នាក់ជិះម៉ូតូគុបជ្រុងមួយគ្រឿងដោយមានដឹកដែកចងភ្ជាប់នឹងកែបម៉ូតូផងនោះ បានព្យាយាមបើកវ៉ាជែង ស្រាប់តែដែកនោះក៏ទាក់នឹងកាងមុខរថយន្តម៉ាកឡិចស៊ីសLX470មួយគ្រឿង ដែលកំពុងឈប់រង់ចាំស្តុប បណ្ដាលឲ្យធ្លាក់រងការខូចខាត ហើយក៏ត្រូវម្ចាស់រថយន្តទាមទារសំណងខូចខាត ប៉ុន្តែភាគីខាងបុរសចំណាស់ជាអ្នកបើកបរម៉ូតូក៏លើកដៃសំពះសុំទោស និងថាគាត់គ្មានលទ្ធភាពសងនោះទេ ។
ហេតុការណ៍ខាងលើនេះ បានបង្កឲ្យមានការភ្ញាក់ផ្អើលកាលពីវេលាម៉ោង៧និង៣០នាទីយប់ថ្ងៃទី១៩ ខែកុម្ភៈ ឆ្នាំ២០២១ ត្រង់ចំណុចស្តុបបាគូ តាមបណ្ដោយផ្លូវ២១៧ ស្ថិតក្នុង ខណ្ឌដង្កោ រាជធានីភ្នំពេញ ។
រថយន្តមួយគ្រឿងដែលរងការខូចខាតខាងលើម៉ាកឡិចស៊ីសLX470 ពណ៌ទឹកប្រាក់ ពាក់ស្លាកលេខ ភ្នំពេញ 2L-9568 បើកបរដោយបុរសម្នាក់មិនស្គាល់អត្តសញ្ញាណ និងស្ត្រីម្នាក់ជាអ្នករួមដំណើរមិនស្គាល់អត្តសញ្ញាណនោះទេ ។ ចំណែកភាគីម៉ូតូមួយគ្រឿងម៉ាកគុបជ្រុង ពណ៌ខៀវ ពាក់ស្លាកលេខ ភ្នំពេញ1GI-8121 បើកបរដោយបុរសវ័យចំណាស់ម្នាក់មិនស្គាល់អត្តសញ្ញាណ ។
តាមប្រភពព័ត៌មានបានឲ្យដឹងថា នៅមុនពេលកើតហេតុ គេឃើញបុរសម្នាក់និងស្ត្រីម្នាក់ជិះរថយន្តមួយគ្រឿងម៉ាកឡិចស៊ីសLX470 ធ្វើដំណើរតាមបណ្ដោយផ្លូវ២១៧ ក្នុងទិសដៅពីត្បូងទៅជើង លុះមកដល់ត្រង់ចំណុចស្តុបកើតហេតុខាងលើ ភ្លើងស្តុបក៏លោតក្រហម ហើយរថយន្តក៏បានឈប់រង់ចាំភ្លើងពណ៌បៃតង ដើម្បីបន្តដំណើរទៅមុខទៀត។
តាមប្រភពព័ត៌មានបានបន្តថា ស្របពេលនោះដែរ ស្រាប់តែមានម៉ូតូមួយគ្រឿងម៉ាកគុបជ្រុង ដែលបើកបរដោយបុរសវ័យចំណាស់ម្នាក់ ធ្វើដំណើរក្នុងទិសដៅស្របទិសគ្នា មកពីក្រោយរថយន្ត ដោយម៉ូតូម៉ាកគុបនោះក៏មានដឹកដែកប្រវែងប្រមាណកន្លះម៉ែត្រចងដាក់ទទឹងកែបម៉ូតូខាងក្រោយ ហើយបានព្យាយាមបើកវ៉ាជែងខាងឆ្វេងរថយន្ត ដោយមិនប្រយ័ត្នក៏ធ្វើឲ្យដែកដែលចងដាក់នៅកែបម៉ូតូនោះបានទាក់នឹងកាងខាងមុខរថយន្ត ធ្វើឲ្យដាច់ធ្លាក់រងការខូចខាត តែមិនបង្កឲ្យមានអ្នករងរបួសនោះទេ។
តាមប្រភពព័ត៌មានបានបន្តថា បន្ទាប់មកក៏មានសមត្ថកិច្ចមូលដ្ឋានបានចុះមកជួយធ្វើការអន្តរាគមន៍ភ្លាមៗ និងបានឲ្យភាគីទាំងពីរធ្វើការចរចាដោះស្រាយគ្នាផងដែរ។ ពេលនោះបុរសវ័យចំណាស់ដែលជាអ្នកបើកបរម៉ូតូ ក៏បានលើកដៃសំពះសុំទោសម្ចាស់រថយន្ត និងនិយាយរៀបរាប់ពីទុក្ខលំបាករបស់ខ្លួនទាំងទឹកភ្នែកប្រាប់ទៅម្ចាស់រថយន្តថាគាត់គ្មានលទ្ធភាពសងនោះទេ។ ប៉ុន្តែភាគីខាងរថយន្តមិនព្រមនោះទេ គឺបានទាមទារឲ្យអ្នកបើកបរម៉ូតូចេញសំណងខ្លះ ដើម្បីយកទៅជួសជុលរថយន្តឡើងវិញ។
ក្រោយពេលកើតហេតុ បន្ទាប់ពីសមត្ថកិច្ចជួយធ្វើការសម្របសម្រួលអស់រយៈប្រមាណជាងមួយម៉ោង ទើបភាគីខាងម្ចាស់រថយន្តក៏បានទន់ចិត្ត ព្រមលើកលែងទោសឲ្យអ្នកបើកបរម៉ូតូ ដោយព្រមយករថយន្តទៅធ្វើការជួសជុលដោយខ្លួនឯង ដើម្បីបញ្ចប់រឿងតែម្តង៕
ចែករំលែកព័តមាននេះ