រាជធានីភ្នំពេញ ៖ ភ្លាមៗក្រោយពីកម្ពុជាបានរកឃើញនូវការផ្ទុះឡើងការឆ្លងជំងឺកូវីដ ១៩ ក្នុងសហគមន៍ជាលើកទី ៣ ដែលពាក់ព័ន្ធភាគច្រើនលើជនជាតិចិន និងវៀតណាម ប្រមុខដឹកនាំរាជរដ្ឋាភិបាលបានចាត់វិធានការណ៍ក្តៅៗជាបន្ទាន់ ដើម្បីទប់ស្កាត់ការរីករាលដាលនៃវីរុសនេះទៅក្នុងសហគមន៍បន្ថែមទៀត…
រាជធានីភ្នំពេញ ៖ ភ្លាមៗក្រោយពីកម្ពុជាបានរកឃើញនូវការផ្ទុះឡើងការឆ្លងជំងឺកូវីដ ១៩ ក្នុងសហគមន៍ជាលើកទី ៣ ដែលពាក់ព័ន្ធភាគច្រើនលើជនជាតិចិន និងវៀតណាម ប្រមុខដឹកនាំរាជរដ្ឋាភិបាលបានចាត់វិធានការណ៍ក្តៅៗជាបន្ទាន់ ដើម្បីទប់ស្កាត់ការរីករាលដាលនៃវីរុសនេះទៅក្នុងសហគមន៍បន្ថែមទៀត រហូតឈានដល់ដាក់កម្លាំងឡោមព័ន្ធទីតាំងសំខាន់ៗមួយចំនួននៅតំបន់កោះពេជ្រ ក្លឹបកម្សាន្តអ៊ិន៨ ក៏ដូចជាអគារអាផាតមិនជាច្រើនកន្លែងផងដែរ ។
ក្នុងនោះផងដែរ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានចេញថ្លែងសារពិសេសជុំវិញព្រឹត្តិការណ៍សហគមន៍២០កុម្ភៈ ដោយដាក់ចេញនូវវិធានការណ៍សំខាន់ៗចំនួន ៦ចំណុច និងស្នើសុំពលរដ្ឋខ្មែរ កុំឲ្យមានការរើសអើងជនជាតិចិន និងជនបរទេសដែលត្រូវបានរកឃើញវិជ្ជមានកូវីដ ១៩ នៃព្រឹត្តិការណ៍សហគមន៍លើកទី៣ នេះ ដែលកាលពីថ្ងៃទី ២០ កុម្ភៈ កម្ពុជាបានរកឃើញករណីវិជ្ជមានកូវីដ ១៩ ដែលជាការនាំចូលនិងព្រឹត្តិការណ៍សហគមន៍២០កុម្ភៈ មានដល់ទៅ ៣២ ករណីនោះ ។
សម្តេចបានថ្លែងថា «ក្នុងស្ថានភាពបែបនេះ ខ្ញុំសូមអំពាវនាវចំពោះបងប្អូនជនរួមជាតិរបស់យើង» យោគយល់ និងបានដឹងនូវវិធានការឆ្លើយតបទាំង ៦ ចំណុចដែលសម្តេចតេជោបានដាក់ចេញភ្លាមៗនាថ្ងៃប្រកាសអំពីការផ្ទុះឡើងនៃព្រឹត្តិការណ៍២០កុម្ភ៖ រួមមាន ៖
១ – សូមការយោគយល់ អំពីធុរកិច្ច ក៏ដូចជាការស្នាក់នៅរបស់ប្រជាពលរដ្ឋ ដោយតម្រូវឲ្យមានបិទអគារ បិទក្លឹបកម្សាន្ត និងបិទតំបន់មួយចំនួនជាចាំបាច់
២ – ត្រូវយកសំណាក ដើម្បីធ្វើតេស្ត សម្រាប់អ្នកនៅក្នុងតំបន់ទាំងនេះ ហើយបន្ទាប់ពីការធ្វើតេស្តហើយ គឺត្រូវធ្វើចត្តាឡីស័កចំនួន ១៤ ថ្ងៃ
៣- ស្វែងរកអ្នកពាក់ព័ន្ធជាមួយនឹងក្លឹបកម្សាន្ត N8
៤- ត្រូវធ្វើចត្តាឡីស័កសម្រាប់អ្នក ដែលមានការពាក់ព័ន្ធទាំងអស់
៥- សម្តេចតេជោ សូមអំពាវនាវចំពោះអ្នកដែលពាក់ព័ន្ធទាំងអស់ ដែលមានការពាក់ព័ន្ធជាមួយនឹងក្លឹប កម្សាន្ត N8 និងពាក់ព័ន្ធជាមួយអ្នក ដែលមានជំងឺឆ្លងរយៈពេល ១៤ ថ្ងៃកន្លងផុតទៅនេះ ត្រូវម្ចាស់ការមកយកសំណាកដើម្បីពិនិត្យ
៦- សម្រាប់ការអំពាវនាវចំពោះប្រជាពលរដ្ឋទូទៅនៅក្នុងរាជធានីភ្នំពេញ និងក៏ដូចជាតំបន់ដទៃទៀត ត្រូវបង្កើនការប្រុងប្រយ័ត្ន ហើយរឹតបន្តឹងនៅក្នុងការអនុវត្តនូវវិធានការ «៣ការពារ» និង «៣កុំ» ជាដាច់ខាត ។
សូមបញ្ជាក់ថា គិតត្រឹមព្រឹកថ្ងៃទី ២១ ខែកុម្ភៈនេះ មានមនុស្សប្រមាណជាង ៤០នាក់ហើយដែលត្រូវបានរកឃើញថា វិជ្ជមានកូវីដ ១៩ នៃព្រឹត្តិការណ៍សហគមន៍២០កុម្ភៈ ៕
ចែករំលែកព័តមាននេះ