រាជធានីភ្នំពេញ ៖ មានករណីអគ្គិភ័យបានឆាបឆេះហ្គារ៉ាសជួសជុលរថយន្តមួយកន្លែងបណ្តាលឱ្យខូចខាតរថយន្តអស់ចំនួន៥គ្រឿង តែមិនបណ្តាលឱ្យមនុស្សណាម្នាក់រងគ្រោះថ្នាក់នោះទេ ដែលហេតុការណ៍នេះបានបង្កការភ្ញាក់ផ្អើលដល់សមត្ថកិច្ចហៅរថយន្តពន្លត់អគ្គីភ័យចុះមកជួយបាញ់ទឹកពន្លត់ កាលពីវេលាម៉ោង១០និង៣៥នាទីយប់ថ្ងៃទី១៩ ខែកុម្ភៈ ឆ្នាំ២០២១ នៅចំណុចហ្គារ៉ាស់ជួសជុលរថយន្តក្នុងដីវាលមួយកន្លែង តាមផ្លូវវេងស្រេង ស្ថិតក្នុងភូមិជ្រៃកោង សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។
ម្ចាស់ហ្គារ៉ាសជួសជុលរថយន្តខាងលើឈ្មោះ ចំរើន ភេទប្រុស អាយុ៤៥ឆ្នាំ មុខរបរជាងជួសជុលរថយន្ត ។
តាមប្រភពពត៌មានពីសមត្ថកិច្ចនគរបាលប៉ុស្តិ៍ចោមចៅ២បានអោយដឹងថា ហ្គារ៉ាសជួសជុលរថយន្តខាងលើនេះជួសជុលរថយន្តគ្រប់ប្រភេទ មានទីតាំងនៅក្នុងដីឡូត៍ធំមួយកន្លែង ។ នៅមុនពេលកើតហេតុ ម្ចាស់មិនបាននៅកន្លែងកើតហេតុទេ តែអ្នកជិតខាងដែលសំរាកនៅជិតកន្លែងកើតហេតុបានឮសូរសំឡេងទុស្សេខ្សែភ្លើង បន្ទាប់មកស្រាប់តែមានអគ្គិភ័យឆាបឆេះយ៉ាងសន្ធោសន្ធៅភ្លាមៗតែម្តង ។
តាមប្រភពដដែលបានបន្តថា ខណៈពេលភ្លាមៗនោះដែរ អ្នករស់នៅជិតកន្លែងកើតហេតុនាំគ្នាភ័យរត់ចេញពីកន្លែងកើតហេតុអស់ ចំណែករថយន្តខ្លះដែលឈប់ចតនៅចំណុចកើតហេតុខាងលើត្រូវបានគេនាំគ្នាបើកចេញទាំងភ័យស្លន់ស្លោ ខណៈពេលនោះដែរក៏មានផ្ទុះបំពង់ហ្គាសផងដែរ ដោយឡែករថយន្តមួយចំនួនទៀតមិនបានបើកចេញក៏ត្រូវអណ្តាតភ្លើងឆាបឆេះអស់ចំនួន៥គ្រឿង ក្នុងនោះរថយន្តដែលខូចចំនួន៤គ្រឿង និងរថយន្តថ្មីមួយគ្រឿង ព្រមទាំងឆេះខូចខាតអស់សម្ភារៈមួយចំនួនទៀត ។
តាមប្រភពដដែលបានបន្តទៀតថា ភ្លាមៗនោះដែរ ប្រជាពលរដ្ឋបានទាក់ទងទៅសមត្ថកិច្ចនគរបាលប៉ុស្តិ៍ឱ្យចុះមកជួយអន្តរាគមន៍ និងបានទាក់ទងទៅផ្នែកជំនាញពន្លត់អគ្គីភ័យរបស់ស្នងការរាជធានីភ្នំពេញឱ្យមកជួយអន្តរាគមន៍បាញ់ពន្លត់ភ្លាមៗផងដែរ ។ ក្នុងនោះផងដែរ ដោយមានរថយន្តពន្លត់អគ្គីភ័យរបស់អង្គភាព៧១១(ង៧០)នឹងរថយន្តពន្លត់អគ្គីភ័យរបស់ស្រាបៀរបានមកជួយអន្តរាគមន៍ ជាបន្តបន្ទាប់ផងដែរ ។
សមត្ថកិច្ចនគរបាលប៉ុស្តិ៍បានបន្តទៀតថា ក្នុងប្រតិបត្តិការកំលាំងជំនាញគ្រប់អង្គភាព បានបាញ់ទឹកពន្លត់អស់រយៈពេលកន្លះម៉ោង ទើបភ្លើងបានរត់រលត់ភ្លាមៗទៅវិញ ។
អគ្គីភ័យខាងលើនេះបានប្រើប្រាស់រថយន្តការិយាល័យអគ្គិភ័យចំនួន៧គ្រឿង ប្រើប្រាស់ទឹកអស់៥រថយន្ត ក្នុងនោះរថយន្តពន្លត់អគ្គិភ័យរបស់កងពលតូចលេខ ង៧០ ចំនួន ៤គ្រឿង ប្រើប្រាស់ទឹកអស់២រថយន្ត និងរថយន្តពន្លត់អគ្គិភ័យរបស់ក្រុមហ៊ុន ស្រាបៀរចំនួន ១គ្រឿង ។ អណ្តាតភ្លើងបានរលត់ទៅវិញនៅវេលាម៉ោង១១និង៣០នាទីយប់ថ្ងៃដដែល ។ ចំពោះមូលហេតុដែលបណ្តាលឲ្យមានអគ្គីភ័យនេះកើតឡើង សមត្ថកិច្ចបានឲ្យដឹងថា មកពីឆ្លងចរន្តអគ្គិសនី តែមិនបង្កឲ្យមនុស្សណាម្នាក់រងរបួស ហើយភ្លើងក៏មិនបានឆេះឆ្លងរាលដាលដល់ផ្ទះអ្នកជិតខាងនោះទេ ៕
ចែករំលែកព័តមាននេះ