អង់គ្លេស ៖ Everton បាន​បង្ហាញ​ទម្រង់​លេង​ល្អ​បំផុត​របស់​ខ្លួន​ក្នុង​ជំនួប Merseyside Derby កាលពី​យប់​ម្សិលមិញ​ដោយ​ផ្តួល​ក្រុម​ម្ចាស់ផ្ទះ Liverpool ក្នុង​លទ្ធផល ២-០ នៅ​ឯ​កីឡដ្ឋាន Anfield ជា​លើក​ដំបូង​ចាប់តាំងពី​ឆ្នាំ ១៩៩៩ ។

ខ្សែប្រយុទ្ធ Richarlison និង​ខ្សែបម្រើ​ប្រយុទ្ធ Gylfi Sigurosson គឺជា​អ្នក​សម្រេច​គ្រាប់​ជ័យជម្នះ​សម្រាប់​ជំនួប​មួយ​នេះ​ដោយ​ជួយ Everton មាន​៤០​ពិន្ទុ​ឈរ​នៅ​ចំណាត់ថ្នាក់​ទី​៧ ស្មើ​ពិន្ទុ​គ្នា​ជាមួយ Liverpool ដែល​ឈរ​នៅ​ចំណាត់ថ្នាក់​ទី​៦ និង​មាន​គម្លាត​១៦​ពិន្ទុ​ពី​ក្រុម​កំពូល​តារាង Manchester City គិត​ត្រឹម​ស​ប្តា​ហ៍​ទី​២៥​។

បរាជ័យ​កាលពី​យប់មិញ បាន​ធ្វើ​ឱ្យ Liverpool ធ្លាក់​ក្នុង​កំណត់​ត្រា​អាក្រក់​បំផុត ​ដោយ​ចាញ់​ការ​ប្រកួត​ក្នុង​លី​គ​៤​លើក​ជាប់​ៗ​គ្នា ជា​លើក​ដំបូង​មិន​ធ្លាប់​មាន​ចាប់តាំងពី​ឆ្នាំ​១៩២៣​៕