ខេត្តកំពង់ធំ ៖ ម្តាយរវល់មើលកូនប្អូន កូនប្រុសក៏បានលង់ទឹកស្រះស្លាប់ ដែលហេតុការណ៍កុមារលង់ទឹកស្រះស្លាប់យ៉ាងអាណោចអធម៌នេះបានកើតឡើង នៅរសៀលថ្ងៃទី១៩ ខែកុម្ភៈ ឆ្នាំ២០២១ នៅចំណុចស្រះទឹកមួយកន្លែងខាងក្រោយផ្ទះ ជនរងគ្រោះចំងាយប្រហែលជា៥០ម៉ែត្រ…
ខេត្តកំពង់ធំ ៖ ម្តាយរវល់មើលកូនប្អូន កូនប្រុសក៏បានលង់ទឹកស្រះស្លាប់ ដែលហេតុការណ៍កុមារលង់ទឹកស្រះស្លាប់យ៉ាងអាណោចអធម៌នេះបានកើតឡើង នៅរសៀលថ្ងៃទី១៩ ខែកុម្ភៈ ឆ្នាំ២០២១ នៅចំណុចស្រះទឹកមួយកន្លែងខាងក្រោយផ្ទះ ជនរងគ្រោះចំងាយប្រហែលជា៥០ម៉ែត្រ ស្ថិតក្នុងភូមិស្លាកែត ឃុំក្រវ៉ា ស្រុកបារាយណ៍ ខេត្តកំពង់ធំ ។
សពកុមាររងគ្រោះឈ្មោះ ដុង រាត្រី ភេទប្រុស អាយុ៥ឆ្នាំ មានឪពុកឈ្មោះ ឈួន ចន្ទ្រា អាយុ២៨ឆ្នាំ និងម្ដាយឈ្មោះ ជឹម សុភ័ណ្ឌ អាយុ២៨ឆ្នាំ ។
យោងតាមការឲ្យដឹងពីស្ត្រីជាម្ដាយរបស់ក្មេងរងគ្រោះប្រាប់ថា មុនពេលកើតហេតុ កូនរបស់គាត់ វានៅអង្គុយលេងជាមួយនឹងគាត់ តែដោយសារគាត់រវល់នឹងមើលថែទាំកូនតូចម្នាក់ទៀតនោះ មួយសន្ទុះក្រោយមកក៏បាត់កូនប្រុសគាត់ ស្រាប់តែមានស្ត្រីម្នាក់យាំ អាយុ៣៩ឆ្នាំ ជាអ្នករស់នៅភូមិជាមួយគ្នា ដើរមកសួរនាងថា មានបាត់កូនទេ គាត់ឃើញមានស្បែកជើង និងអាវកូនក្មេងនៅលើគោកក្បែរមាត់ស្រះទឹកខាងក្រោយផ្ទះឯណោះ តែបាត់មិនឃើញមនុស្សនោះទេ ។
នៅពេលឮដូច្នេះ ខ្លួននាងក៏ស្ទុះដើរទៅរកកូនក៏ប្រទះឃើញស្បែកជើង និងអាវកូននៅក្នុងទឹកជាប់មាត់ស្រះខាងក្រោយផ្ទះ នាងក៏ពឹងឈ្មោះ សែម ខុម អាយុ៤៩ឆ្នាំ នៅភូមិជាមួយគ្នាឲ្យជួយមុជទឹករាវរកទើបឃើញសពកូនរបស់នាងលង់ទឹកស្លាប់មែន ។
តាមការពិនិត្យដោយផ្ទាល់ពីលោកគ្រូពេទ្យ លោកមេឃុំក្រវ៉ា និងលោកមេភូមិស្លាកែត យើងសន្និដ្ឋានថា ក្មេងរងគ្រោះពិតជាស្លាប់ដោយសារលង់ទឹក មិនមានពាក់ព័ន្ធនឹងបទល្មើសព្រហ្មទណ្ឌឡើយ ។
ក្រោយពិនិត្យសពចប់សព្វគ្រប់ សមត្ថកិច្ចយើងបានប្រគល់សាកសព ជូនគ្រួសាររងគ្រោះដើម្បីធ្វើបុណ្យតាមប្រពៃណី ៕
ចែករំលែកព័តមាននេះ