សហរដ្ឋអាមេរិក ៖ ក្រោយការហោះហើរអស់ពេល៧ខែមកយានរ៉ូបូPERSERVERANCEរបស់អង្គការNASAអាមេរិក បានចុះកាលពីថ្ងៃទី១៨កុម្ភៈលើភពព្រះអង្គារ៍ ក្នុងក្របខណ្ឌនៃបេសកកម្មមួយ សំដៅតាមរុករកដាននៃជិវិតពីបុរាណលើភពក្រហមនោះ។
ទីភ្នាក់ងារអវកាសអាមេរិកNASAរាយការណ៍នាថ្ងៃទី១៨កុម្ភៈថាយាន PERSERVERANCEបានចុះលើផ្ទៃភពព្រះអង្គារក្រោយការធ្វើដំណើរអស់ពេល៧ខែ ដែលនោះជាជោគជ័យដ៏ត្រចះត្រចង់មួយ សម្រាប់NASA ដោយកំណត់ពីការចាប់ផ្ដើមបេសកកម្មមួយដែលប្រើពេលដល់ច្រើនឆ្នាំ។ កន្លែងចុះចតរបស់យាននោះគឹនៅចំណុចមួយ គេហៅថាJEZEROដែលពួកអ្នកវិទ្យាសាស្ត្រគិតថាទីនោះកាលពី៣,៥ពាន់លានឆ្នាំមុនជាបឹងមួយ។ យានបានចុះត្រង់កន្លែងរដិបរដុបបំផុត ដែលនៅទីនោះយាននេះនឹងប្រមូលបណ្ដាភស្ដុតាងដាននៃជីវិតបុរាណនៅភពព្រះអង្គារ៍។
លោកSWATI MOHANទទួលបន្ទុកត្រួតពិនិត្យប្រតិបត្តិការយាននោះ នៅមន្ទីរពិសោធន៍ក្នុងទីក្រុងប៉ាសាឌីណារដ្ឋកាលីហ្វ័រនីញ៉ា ប្រកាសពីការចុះចតដោយជោគជ័យនៃយានរ៉ូបូនេះ។ ក្រុមរបស់លោកដែលមានវត្តមាននៅជាមួយគ្នាផ្ទុះក្ដីសប្បាយ ពេលទទួលបានព័ត៌មាននោះ។
ក្រោយហោះចូលក្នុងបរិយាកាសភពព្រះអង្គារ ក្នុងកម្ពស់២០.០០០គីឡូម៉ែត្រម៉ោង យាននោះ ទទួលកម្ដៅកើនដល់១.៣០០អង្សាសេ។ យានរ៉ូបូការពារដោយខែលការពារកម្ដៅ ហើយពេលចូលដល់ភពព្រះអង្គារ យានរ៉ូបូត្រូវបានទម្លាក់ចុះជាមួយឆ័ត្រដ៏ពិសេសធំមួយ។ ឧបករណ៍ទប់៨ទីបំផុតបានជួយទប់ឲ្យវាធ្លាក់មកក្រោមយឹតៗ មុនពេលយានបញ្ចេញកង់ទាំង៦របស់វា ដែលភ្ជាប់នឹងខ្សែកាបដ៏វែង សម្រូតចុះរហូតដល់ដីភពក្រហម។
ក្រុមរបស់NASAនាបណ្ដាថ្ងៃខាងមុខត្រូវតាមដានពិនិត្យថាតើយាននោះនិងបណ្ដាឧបករណ៍ មិនរងការខូតខាតនិងមានដំណើរការត្រឹមត្រូវ។ យានរ៉ូបូ PERSERVERANCE ជាយានទី៥ទៅកាន់ភពព្រះអង្គារ។ យានទីមួយទៅកាន់ភពនោះក្នុងឆ្នាំ១៩៩៧ ហើយយានទៅកាន់ភពព្រះអង្គារទាំងអស់ សុទ្ធតែជារបស់អាមេរិក។ ក្នុងចំណោមយានទាំងនេះ យានមួយកំពុងមានសកម្មភាពលើភពនោះនៅឡើយគឹយានCURIOSITY៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ