រាជធានីភ្នំពេញ ៖ យុវជនម្នាក់ត្រូវបានរថយន្តស្ទូចដឹកសសរគ្រឹះមួយគ្រឿងបើកបុក និងកិ.នបែកក្បាលទាំងមួកសុវត្ថិភាព បណ្តាលឱ្យបាត់បង់ជីវិតភ្លាមៗនៅនឹងកន្លែង ។
ហេតុការណ៍ខាងលើនេះបានកើតឡើងកាលពីវេលាម៉ោងប្រមាណ១២ថ្ងៃត្រង់ថ្ងៃទី១៩ ខែ កុម្ភៈ ឆ្នាំ២០២១ នៅចំណុចមុខវត្តកប់ស្រូវ នៅតាមបណ្តោយមហាវិថីឈ្នះ ឈ្នះ ក្នុងភូមិកប់ស្រូវតូច សង្កាត់គោករការ ខណ្ឌព្រែកព្នៅ រាជធានីភ្នំពេញ។
ជនរងគ្រោះដែលបាត់បង់ជីវីតក្នុងគ្រោះថ្នាក់ខាងលើនេះឈ្មោះ ឈាន ឈឺនហឺ ភេទប្រុស អាយុ១៨ឆ្នាំ ជាសិស្សនៅវិទ្យាស្ថានបច្ចេកទេសកម្ពុជា ហៅសាលាកូរ៉េ មានលំនៅភូមិវិហារសួគ៌ត្បូង ឃុំវិហារសួគ៌ ស្រុកខ្សាច់កណ្តាល ខេត្តកណ្តាល ជាអ្នកបើកបរម៉ូតូមួយគ្រឿងម៉ាក MSX ពណ៌សលាយខ្មៅ ពាក់ស្លាកលេខ ភ្នំពេញ១GA.៣១៤៤ ។ ចំណែករថយន្តបង្កជារថយន្តស្ទូចដឹកសសរគ្រឹះ ពណ៌ខៀវ ពាក់ស្លាកលេខ ភ្នំពេញ ៣A-២៨៨៨ អ្នកបើកបរមិនស្គាល់ឈ្មោះ បានរត់គេចខ្លួនបាត់ ដោយទុករថយន្តចោល ។
តាមសាក្សីបានអោយដឹងថា នៅមុនពេលកើតហេតុ គេឃើញយុវជនរងគ្រោះបើកបរម៉ូតូ មួយគ្រឿងក្នុងទិសដៅពីលិចទៅកើត លុះពេលមកដល់ចំណុចកើតហេតុខាងលើ ស្រាប់តែមានរថយន្តស្ទូចមួយគ្រឿងបានបើកចេញពីផ្លូវបេតុងមកពីទិសខាងត្បូង ក៏បុកនិងកិ.នអ្នកបើកបរម៉ូតូ បណ្តាលអោយបែកក្បាលបាត់បង់ជីវិតភ្លាមៗនៅនឹងកន្លែង ។ បន្ទាប់ពីបង្កគ្រោះថ្នាក់រួច រថយន្តនោះបានបើកគេចទៅទិសខាងលិច និងបានបត់ចូលតាមផ្លូវលំបានប្រមាណកន្លះគីឡូម៉ែត្រ ក្នុងភូមិកប់ស្រូវធំមានរោងការមួយកណ្តាលផ្លូវក៍បានឈប់រថយន្តរត់គេចខ្លួនបាត់តែម្តង ។
ក្រោយពេលកើតហេតុ នគរបាលមូលដ្ឋានក៍បានចុះទៅកន្លែងកើតហេតុ ដើម្បីសម្រួលចរាចរណ៍និងបានទាក់ទងទៅនគរបាលចរាចរណ៍ឱ្យចុះទៅវាស់វែងរួចនាំយករថយន្តនិងម៉ូតូបញ្ជូន ទៅកាន់ការិយាល័យ ដើម្បី ដោះស្រាយ ។ ចំណែកសពជនរងគ្រោះត្រូវបានក្រុមគ្រួសារនាំយកទៅធ្វើបុណ្យតាមប្រពៃណី៕
ចែករំលែកព័តមាននេះ