ភ្នំពេញ៖ ចាប់ពីថ្ងៃទី១០-១៨ ខែកុម្ភៈ មានអ្នកមកចាក់វ៉ាក់សាំងកូវីដ១៩ សរុបចំនួន ៤៦៦៩នាក់។ ប៉ុន្តែ​អ្នកបានចាក់វ៉ាក់សាំងរួច មានចំនួន ៣៨០៣នាក់។ រីឯ ៨៦៦នាក់ មិនត្រូវបានគ្រូពេទ្យអនុញ្ញាត​ឲ្យ​ចាក់ឡើយ។​ នេះបើតាមលោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល​។

ក្រសួងសុខាភិបាល បានចាប់ផ្តើមយុទ្ធនាការចាក់វ៉ាក់សាំងបង្ការជំងឺកូវីដ១៩ កាលពីថ្ងៃទី១០ ខែកុម្ភៈ ហើយបន្តធ្វើរហូតដល់អស់វ៉ាក់សាំង ៣០ម៉ឺនដូស ដែល​ជាជំនួយ​ជំហានដំបូងរបស់ប្រទេសចិន​។

ដោយឡែក​ក្រសួងការពារជាតិ ក៏បានចាប់ផ្តើម​ចាក់វ៉ាក់សាំង ៣០ម៉ឺនដូស ដែលជាជំនួយរបស់ប្រទេសចិន កាលពីថ្ងៃទី១០ ខែកុម្ភៈ ហើយ​មកដល់ថ្ងៃទី១៧ ខែកុម្ភៈ ក្រសួងការពារជាតិ បានចាក់វ៉ាក់សាំងដល់កងទ័ពបានជាង ១ម៉ឺននាក់​ហើយ៕