រាជធានីភ្នំពេញ ៖ បុរសម្នាក់ត្រូវបានប្រជាពលរដ្ឋនាំគ្នាដេញចាប់ឃាត់ខ្លួនបាននៅក្នុងវត្តព្រែកព្នៅ បន្ទាប់ពីធ្វើសកម្មភាពចាប់បង្ខំសេពសន្ថវៈលើក្មេងស្រីអាយុ៤ឆ្នាំម្នាក់ក្នុងបន្ទប់ជួលរបស់ខ្លួន ហើយត្រូវបានអ្នកជិតខាងឃើញទាន់ស្រែកផ្អើលឆោឡោ។
ហេតុការណ៍ខាងលើនេះបានបង្កឲ្យមានការភ្ញាក់ផ្អើលកាលពីវេលាម៉ោង៤និង៣០នាទីរសៀលថ្ងៃទី១៧ ខែកុម្ភៈ ឆ្នាំ ២០២១ នៅចំណុចបន្ទប់ជួលរបស់ជនសង្ស័យ ស្ថិតក្នុងខណ្ឌព្រែកព្នៅ រាជធានីភ្នំពេញ។
ជនសង្ស័យឈ្មោះប្រាក់ ព្រែក អាយុ២៧ឆ្នាំ មុខរបរមិនពិតប្រាកដ ស្នាក់នៅបន្ទប់ជួលកន្លែងកើតហេតុខាងលើ ។ ចំណែកក្មេងស្រីរងគ្រោះមានអាយុ៤ឆ្នាំ។
តាមប្រភពពីក្រុមគ្រួសាររបស់ក្មេងស្រីរងគ្រោះបានអោយដឹងថា នៅមុនពេលកើតហេតុ ក្មេងស្រីខាងលើបានរត់លេងហើយចូលទៅក្នុងបន្ទប់ជួលរបស់ជនសង្ស័យរូបនោះ ខណៈឃើញឱកាសល្អហើយស្ងាត់ ជនសង្ស័យរូបនោះក៍បានបិទទ្វារបន្ទប់ធ្វើសកម្មភាពចាប់ក្មេងស្រីរងគ្រោះតែម្តង។
តាមប្រភពដដែលបានអោយដឹងទៀតថា ពេលនោះអ្នកជិតខាងបានឃើញជនសង្ស័យរូបនោះបិទទ្វារបន្ទប់ ដោយមានការសង្ស័យក៏បានទៅអើតមើល ស្រាប់តែឃើញជនសង្ស័យកំពុងតែធ្វើសកម្មភាពចាប់បង្ខំសេពសន្ថវៈលើក្មេងស្រីរងគ្រោះ ។ បន្ទាប់ពីឃើញហេតុការណ៍យ៉ាងដូច្នេះ អ្នកជិតខាងក៍បានស្រែកឆោឡោ ធ្វើអោយជនសង្ស័យរូបនោះភ័យស្លន់ស្លោលើកខោស្លៀកស្ទើរមិនទាន់ ហើយស្ទុះរត់ចេញពីបន្ទប់ ។ ភ្លាមៗនោះបង្កអោយមានការភ្ញាក់ផ្អើលដល់អ្នកក្បែរខាងរាប់សិបនាក់នាំគ្នាដេញតាម និងឈានទៅដល់ការចាប់ឃាត់ខ្លួនបាន ខណៈពេលដែលជនរូបនោះរត់គេចខ្លួនចូលទៅក្នុងវត្តព្រែកព្នៅ។
បន្ទាប់ពីចាប់ឃាត់ខ្លួនរួច ក៍បានប្រគល់ទៅអោយនគរបាលប៉ុស្តិ៍ ព្រែកព្នៅ និងបញ្ជូនទៅកានអធិការដ្ឋានខណ្ឌព្រែកព្នៅ ដើម្បីសាកសួរនិងចាត់ការតាមច្បាប់ ។ ជុំវិញករណីខាងលើនេះដែរ នគរបាលពុំបានផ្តល់ព័ត៌មានលំអិតឡើយ ៕
ចែករំលែកព័តមាននេះ