ខេត្តកំពត៖ ម្ដាយភ័យរត់ចេញពីផ្ទះ ស្រែកឲ្យអ្នកជិតខាងជួយ ដោយសារតែកូនប្រុស ញៀនថ្នាំ វាយកម្ទេច និងដុតបំផ្លាញទ្រព្យសម្បត្តិក្នុងផ្ទះ។ ហេតុការណ៍នោះ បានកើត​ឡើង នៅ​ភូមិដើមចំរៀក ឃុំស្ដេចគង់ខាងលិច ស្រុកបន្ទាយមាស ខេត្តកំពត។

យុវជន ដែលញៀនថ្នាំញៀន រហូតបែកថ្នាំនោះ ​ឈ្មោះ ពុធ ទំ អាយុ ២៥ឆ្នាំ។ រីឯម្តាយ ឈ្មោះ ឃុនគ្រី អាយុ ៥២ឆ្នាំ។ ​យុវជននោះ បាន​វាយពាងបែកអស់ ៣ ដុតកង់អស់​ ២គ្រឿង និងដុតស្រូវអង្ករ វាយកម្ទេចចានឆ្នាំង មាត់ទ្វារបង្អួចកញ្ចក់ និងសម្ភារៈ​ជាច្រើនទៀត​។

រឿងរ៉ាវកូនប្រុស វាយកម្ទេចបំផ្លាញ​ទ្រព្យសម្បត្តិ នៅក្នុងផ្ទះនេះ បានកើតមានកាលពី​ព្រឹកព្រលឹមថ្ងៃទី១៧ ខែកុម្ភៈ ឆ្នាំ២០២១។

​​ម្តាយយុវជននោះ បានឲ្យដឹងថា កូនប្រុសគាត់ ឈ្មោះ ពុធ ទំ នេះ គឺមានប្រពន្ធ និង​មានកូនប្រុសម្នាក់ រស់នៅខេត្តកោះកុង។ ដោយសាតែបែកថ្នាំជោគជាំពេកនៅកោះកុង ទើបប្រពន្ធ ដឹកតាមរថយន្ត ពីកោះកុង មកប្រគល់អោយ​ម្ដាយ កាលពីចុងខែមករា ឆ្នាំ២០២១។

ស្ត្រីរូបនេះ បានប្រាប់​ថា បន្ទាប់ពីកូនបែកថ្នាំ អុកឡុកក្នុងផ្ទះ គាត់បានប្ដឹង ទៅនគរបាល​ប៉ុស្លិ៍​ស្ដេចគង់ដែរ និងបានប្រាប់ប្រជាការពារភូមិ អោយជួយចាប់កូនប្រុសគាត់។ ទើប​នៅព្រឹកថ្ងៃទី១៧ ​ខែ​កុម្ភៈ​​​នេះ ​នគរបាលប៉ុស្លិ៍​ស្ដេចគង់ និងប្រជាការពារភូមិ​ដើមចំរៀក រួមទាំងមេភូមិជ្រោះតាសោម ស្រុកកំពង់ត្រាច មករកចាប់កូនគាត់ ដែលបែកថ្នាំនោះ។ ប៉ុន្តែពេលមកដល់ កូនប្រុសគាត់ ដែល​បែកថ្នាំនោះ បានរត់ទៅទិសខាងត្បូង បន្តចូល​ព្រៃភ្នំ​បាត់តែម្ដង​ទៅ។ ដោយ៖ កែវ ឆាត