ADផ្ទាំងផ្សព្វផ្សាយពាណិជ្ជកម្ម

Picture

អាជ្ញាធរខេត្តប៉ៃលិន និងភ្ញៀវ​ទេសចរ កោតសរសើរទឹកធ្លាក់​ភ្នំខៀវ ត្រង់កន្លែង ៣៦ជាន់

3 ឆ្នាំ មុន
  • ប៉ៃលិន

ខេត្តប៉ៃលិន​៖ តំបន់រមណីយដ្ឋានទឹកធ្លាក់អូរតាវ៉ៅ ហៅទឹកធ្លាក់ភ្នំខៀវ ​មានចំងាយ​ប្រមាណ ៧ ទៅ ៨គីឡូម៉ែត្រ​ ពីទីរួមខេត្តប៉ៃលិន តាមផ្លូវជាតិលេខ៥៧។ ​អ្វីដែលភ្ញៀវ​ទេសចរ…

ខេត្តប៉ៃលិន​៖ តំបន់រមណីយដ្ឋានទឹកធ្លាក់អូរតាវ៉ៅ ហៅទឹកធ្លាក់ភ្នំខៀវ ​មានចំងាយ​ប្រមាណ ៧ ទៅ ៨គីឡូម៉ែត្រ​ ពីទីរួមខេត្តប៉ៃលិន តាមផ្លូវជាតិលេខ៥៧។ ​អ្វីដែលភ្ញៀវ​ទេសចរ មិនសូវបានឃើញ និងទៅដល់ គឺត្រង់ជាន់ទី៣៦ នៃទឹកធ្លាក់ភ្នំខៀវ ដែល​អាជ្ញាធរ​ខេត្តប៉ៃលិន ដឹកនាំដោយលោកជំទាវ បាន ស្រីមុំ អភិបាលខេត្តប៉ៃលិន បានចាត់ឱ្យមន្រ្តីនៃមន្ទីរជំនាញ យកគ្រឿងចក្រអេស្កាវ៉ាទ័រ ទៅឈូសឆាយ រហូតដល់កន្លែងលេង ដែលស្រស់ស្អាត​ជាងគេ គឺនៅត្រង់ជាន់ទី៣៦ មានទឹក​ជ្រោះខ្ពស់ល្អ​។

ជាក់ស្តែង កាលពីឱកាសបុណ្យចូលឆ្នាំចិនថ្មីៗ​នេះ បន្ទាប់ពីលោកជំទាវ អភិបាល​ខេត្តប៉ៃលិន បានឱ្យក្រុមការងារយកគ្រឿងចក្រឈូសឆាយទៅដល់ខាងលើ គឺសង្កេតឃើញថា មានទេសភាពស្រស់ស្អាត មានដើមឈើធំៗ រុក្ខជាតិបញ្ចេញ​ពណ៌ខៀវខ្ចី និងមានទឹកជ្រោះ​ ហូរធ្លាក់ពីលើភ្នំឥតដាច់។ ពេលភ្ញៀវចុះងូតលេង ​គឺត្រជាក់ត្រជុំ បំបាត់នូវទុក្ខកង្វល់ ថែមទាំងនាំមកនូវស្មារតីភ្លឺស្វាង និងអារម្មណ៍​ស្រស់ស្រាយផងដែរ។

​ភ្ញៀវទេសចរ អាចបើកបរម៉ូតូ និងរថយន្តឡើង ទៅចតនៅផ្នែកខាងលើយ៉ាងងាយ​ស្រួល មិនមានក្បាលថ្ម ដូចកាលពីមុននោះទេ​។ ​

ក្រុមការងារយុវជន ស.ស.យ.កខេត្ត ក៏បាននាំគ្នាសស្រាក់សស្រាំ ខ្លះជួសជុលខ្យុស ខ្លះធ្វើផ្លូវឡើងចុះកន្លែងទឹកជ្រោះ ព្រមទាំងតុបតែងរបមាត់ផ្លូវឱ្យមានភាពស្រស់ស្អាត ទាក់ចិត្តភ្ញៀវទេសចរ ឱ្យចូលទៅលេងឥតជិនណាយនោះឡើយ​។

ក្រុមការងារយុវជនស.ស.យ.កម្នាក់ បានឱ្យដឹងថា នៅថ្ងៃខាងមុខ លោកជំទាវ​អភិបាលខេត្ត នឹង​រៀបចំកន្លែងរមណីយដ្ឋានទឹកធ្លាក់អូរតាវ៉ៅ ហៅភ្នំខៀវនេះ ឱ្យកាន់តែទាក់ទាញពីមួយថ្ងៃទៅមួយថ្ងៃ ដើម្បីស្រូបយកភ្ញៀវទេសចរ ចូលមកលេងខេត្តប៉ៃលិន ឱ្យកាន់តែច្រើនឡើងៗ ដែលអាចជួយឱ្យការលក់​ដូររបស់ប្រជាពលរដ្ឋកាន់តែកាក់កប​។

ម្យ៉ាងវិញទៀត ផ្លូវចូលពីក្លោងទ្វាររហូ​តដល់កន្លែងលេងទឹកជ្រោះ ចម្ងាយប្រមាណ ២គីឡូម៉ែត្រ ត្រូវបានឈូសឆាយរួចរាល់ ហើយនៅថ្ងៃខាងមុខ បើសិនជាមានថវិកា​គ្រប់គ្រាន់ អាជ្ញាធរខេត្ត នឹងចាក់បេតុង ឱ្យបានស្អាត ងាយស្រួលធ្វើដំណើរឡើងចុះ មិនបារម្ភចំពោះបញ្ហារថយន្ត ឬម៉ូតូនោះឡើយ​៕ ដោយ​៖ នីយ៉ា

អត្ថបទសរសេរ ដោយ

កែសម្រួលដោយ