​ខេត្តសៀមរាប៖ ​មន្ត្រីនគរបាលចរាចរណ៍ បានឱ្យដឹង​ថា រថយន្តចំនួន ៤គ្រឿង បានបុកត​គ្នា នៅផ្លូវ ៦០ ម៉ែត្រ ខាងជើង​សណ្ឋាគារស្នាយលីង ជាប់នឹងភ្លើង​ស្តុបខាងកើតផ្សារលើធំថ្មី។ ក្រោយកើតហេតុ ម្ចាស់ឡាន​ បាន​ចុះមកប្រកែកគ្នា រកខុសត្រូវ។ ប៉ុន្តែ​នៅមិនត្រូវគ្នា ក៏ហៅសមត្ថកិច្ច ឱ្យទៅជួយ​មើលសភាពការណ៍ ហើយក៏នៅ​មិនត្រូវគ្នា ក៏ឱ្យប៉ូលិស យកឡានទាំង ៤គ្រឿង មកទុកនៅគោលដៅ​ប្រចាំការ​ជាប់មាត់ស្ទឹង​ ខាងលិច​មុខសួនច្បារព្រះរាជដំណាក់ ព្រះអង្គចេក ព្រះអង្គចម។

​​ហេតុការណ៍គ្រោះថ្នាក់ចរាចណ៍ ដែល​រថយន្តបុកតកន្ទុយគ្នានេះ បានកើតឡើង នៅម៉ោងប្រមាណជាង ០៧យប់ថ្ងៃទី១៤ ខែកុម្ភ: ឆ្នាំ២០២១ ស្ថិតនៅភូមិចុងកៅស៊ូ សង្កាត់ស្លក្រាម ក្រុងសៀមរាប។

​​​ប្រភពពីមន្ត្រីជំនាញ បានបន្តថា រថយន្តបង្កហេតុមុនគេ ម៉ាកលុចស៊ីស RX៣០០ ស្រវឹងស្រា បានបើកបុក​រថយន្តហាយឡែនឌ័រពីក្រោយ ហើយហាយឡែនឌ័រ ក៏បន្តទៅ​បុករថយន្ត​ម៉ាកធុនត្រា ហើយធុនត្រា ក៏បានបុក​បន្តរថយន្តសាំយ៉ុង។

​ប្រភពបានបញ្ជាក់ទៀតថា រថយន្តបង្កហេតុ បើកបរមកពីទិសខាងជើង មកទិសខាង​ត្បូង មកដល់ចំណុចខាងលើ ក៏បុកបន្តគ្នាតែម្ដង។

​​​​ប្រភពបញ្ជាក់បន្ថែមថា រថយន្តបង្កហេតុ ​ម៉ាកRX៣០០ ពាក់ស្លាកលេខ ភ្នំពេញ 2Q 5597 រថយន្តហាយឡែនឌ័រ ពាក់ស្លាកលេខ ភ្នំពេញ 2AC 7684 រថយន្តធុនត្រា ពាក់ស្លាកលេខ សៀមរាប 2B 5542។ រថយន្ត សាំយ៉ុង ស្លាកលេខ ភ្នំពេញ 2AH 6540។

​មន្ត្រីនគរបាល បានបញ្ជាក់បន្ថែមទៀតថា ករណីនេះ បានសម្របសម្រួលគ្នាបញ្ចប់អស់ហើយ នៅថ្ងៃទី១៥ ខែកុម្ភ: ឆ្នាំ​២០២១នេះ នៅគោលដៅប្រចាំការ​ជាប់មាត់ស្ទឹង ពីខាងលិច មុខសួនច្បារព្រះរាជដំណាក់ ព្រះអង្គចេក ព្រះអង្គចម ដោយម្ចាស់ឡាន ព្រមព្រៀង យកឡាន ទៅជួសជួលរៀងៗខ្លួន​៕ ដោយ៖ ច័ន្ទ រស្មី