ខេត្តស្ទឹងត្រែង៖ ស្ទឹងត្រែង ជាខេត្តមួយ ស្ថិតនៅភាគឦសាននៃប្រទេសកម្ពុជា ដែលសម្បូទៅដោយសម្បត្តិធនធានធម្មជាតិ ព្រៃឈើ សត្វព្រៃ រ៉ែ ក៏ដូចប្រព័ន្ធ​ទន្លេដ៏មានសារៈសំខាន់ បានបង្កើតនូវប្រព័ន្ធអេកូឡូស៊ី​ ទឹកសាបមួយ​ដ៏ចម្បង សម្រាប់មច្ឆាជាតិ និងបានផ្តល់ជាទេសភាពយ៉ាងល្អប្រណិតសម្រាប់ទាក់ទាញ​ភ្ញៀវ​ទេសចរជាតិ និងអន្តរជាតិ។

​ខេត្តស្ទឹងត្រែង មានតំបន់រ៉ាមសារមួយកន្លែង គឺតំបន់រ៉ាមសារខេត្តស្ទឹងត្រែង ដែលជាតំបន់ដីសើម មានសារៈសំខាន់ជាលក្ខណៈអន្តរជាតិ ដោយតំបន់នេះ ស្ថិតនៅចំងាយ ៥គីឡូម៉ែត្រ ចាប់ពីទីរួមខេត្ត លាត សន្ធឹង​តាមបណ្តាលដងទន្លេមេគង្គ ពីត្បូង ទៅជើង រហូតដល់ព្រំប្រទល់ប្រទេសឡាវ។ រ៉ាមសារខេត្តស្ទឹងត្រែង​ ជាតំបន់សំបូរ ដោយ​ព្រៃលិចទឹក ដែលជាជម្រកដ៏សំខាន់ និងជាជង្រុក​ចំណីអាហារដ៏សម្បូបែបរបស់ពពួល ថនិកសត្វ សត្វស្លាបទឹក មច្ឆាជាតិ និងជីវចម្រុះជាច្រើនទៀត។

​ឯកឧត្តម ស៊្រុន ដារិទ្ធិ រដ្ឋលេខាធិការ ក្រសួងបរិស្ថាន មានប្រសាសន៍​ថា យើងត្រូវការពារតំបន់សើម​ឱ្យ​គង់វង្ស ព្រោះវាជាតំបន់អាចធ្វើកសិកម្ម តំបន់ដីសើម ជាអាងស្តុកទឹកភ្លៀងបានច្រើនលើសលប់ រុក្ខជាតិក្នុងតំបន់ដីសើម វាជួយកាត់បន្ថយទឹកជំនន់ វាដើរតួនាទីយ៉ាងសំខាន់ក្នុងការ ការពារខ្យល់ព្យុះ ដោយកាត់បន្ថយខ្យល់បោកខ្លាំង វាជាប្រភពទឹកជាតំបន់ជីវចម្រុះ ជារមណីយដ្ឋាន និងជាកន្លែងទេសចរ ហើយក៏បានផ្តល់​ផលិតផលជាច្រើន សម្រាប់ជីវភាពរស់នៅរបស់ប្រជាពលរដ្ឋ នៅក្នុងមូលដ្ឋាន។

​​​លោក អេង ភីរ៉ុង ប្រធានមន្ទីរបរិស្ថានខេត្តស្ទឹងត្រែង បានមានប្រសាសន៍ថា​ ទន្លេនៅខេត្តស្ទឹងត្រែង ដែលមានប្រភពតំបន់ខ្ពង់រាប សម្បូរទៅដោយ​ជួរភ្នំធំៗ អន្លង់ទឹកជ្រៅ កោះខ្សាច់ជាច្រើន និងមានព្រៃលិចទឹកដុះកណ្តាលទន្លេ ដែលបង្កលក្ខណៈ​ល្អដល់ការពងកូន និងបន្តពូជដល់ពពួកត្រី និងសត្វព្រៃជា​ច្រើន ប្រភេទ ក្នុងនោះ រួមមានប្រភេទថនិកសត្វ ប្រហែលចំនួន ១៨ប្រភេទ សត្វល្មូន ៤២ប្រភេទ ត្រីលើសពី ១៣០ និងប្រភេទផ្សេងៗទៀត ហើយតំបន់រ៉ាមសារ ជាជំរកដ៏សំខាន់របស់ត្រី​ប៉ាសេអ៊ី ដែលមិនមានវត្តមាននៅខេត្តដទៃ ជាតំបន់ដែលទាក់ចិត្តភ្ញៀវទេសចរ មកកំសាន្តសប្បាយ លំហែកាយ និងសំរាប់បោះតង់ ដេកកំសាន្ត គយគន់ទេសភាពព្រៃលិចទឹក និងសត្វស្លាបហើរទាំងវង់ៗ ក្នុងពេលរសៀល មុនថ្ងៃរាបលិច។

លោក អន ប៉ាវសឿន ប្រធានមន្ទីរទេសចរណ៍​ខេត្ត បានគូសបញ្ជាក់ថា​ ភ្ញៀវទេស​ចរជាតិ និងអន្តរជាតិ មកទស្សនាកំសាន្តតាមរមណីយដ្ឋានទេសចរណ៍ និង​សហគមន៍ទេសចរណ៍ ក្នុងឱកាសបុណ្យចូលឆ្នាំ ប្រពៃណី​ប្រជាជនចិន និងវៀតណាម នៅក្នុងខេត្តស្ទឹងត្រែង សម្រាប់រយៈពេល ៤ ថ្ងៃ ចាប់ពីថ្ងៃទី​១១- ១២-១៣-១៤ ខែកុម្ភៈ ឆ្នាំ២០២១  មានភ្ញៀវទេសចរជាតិ​ចំនួន ១០​៨៣១នាក់ និង​ភ្ញៀវអន្តរជាតិចំនួន ៣០ នាក់ ​បាន​មកលេងកំសាន្តនៅខេត្តស្ទឹងត្រែង តាមរមណីយដ្ឋានទេសចរណ៍​ធម្មជាតិនានា។ មានភ្ញៀវទេសចរខ្លះ ធ្វើដំណើរទៅលេង និងបោះតង់ នៅតាមកោះ​​តាមដងទន្លេមេគង្គ ដែល​ជាតំបន់ព្រៃលិចទឹក រ៉ាមសារ​៕​ ដោយ៖ ពុយ វឌ្ឍនា