រាជធានីភ្នំពេញ ៖ បើទោះបីជាវិស័យកសិកម្មនៅតែជាវិស័យស្នូលសម្រាប់សេដ្ឋកិច្ចកម្ពុជា ប៉ុន្តែការផ្ដល់ឥណទានទៅក្នុងវិស័យមួយនេះនៅតែមានហានិភ័យសម្រាប់គ្រឹះស្ថានហិរញ្ញវត្ថុ ដោយសារតែកត្តាច្រើនរួមផ្សំ ដូចជាការធ្វើកសិកម្មនៅតែពឹងផ្អែកលើធម្មជាតិ ឬធ្វើស្រែប្រវាស់មេឃ ផលិតផលកសិកម្មទទួលបានហើយតែខ្វះខាតទីផ្សារ ធ្វើឱ្យតម្លៃធ្លាក់ជាដើម ដែលនាំឱ្យកសិករពិបាកក្នុងការរកទុនបង្វិលទៅគ្រឹះស្ថានហិរញ្ញវត្ថុវិញបាន ឬក៏យឺតយ៉ាវក្នុងការបង្វិលសងជាដើម ។
ប្រធានសម្ព័ន្ធសហគមន៍កសិកម្មកម្ពុជា លោកឧកញ៉ា ហង់ សុគន្ធ បាននិយាយថា ការធ្វើកសិកម្មតាមបែបកិច្ចសន្យារវាងអ្នកផលិត និងអ្នកទិញនឹងធ្វើឱ្យកសិករងាយស្រួលក្នុងការស្វែងរកឥណទានពីគ្រឹះស្ថានធនាគារនិងមីក្រូហិរញ្ញវត្ថុសម្រាប់ពង្រីកអាជីវកម្ម ។
លោកឧកញ៉ាបាបបន្តថា កសិករដែលបានចងក្រងជាបណ្ដុំ ជាសហគមន៍ គឺមានភាពងាយស្រួលក្នុងការស្វែងរកទីផ្សារសម្រាប់ផលិតផល ហើយនៅពេលមានបណ្ដុំ មានសហគមន៍ត្រឹមត្រូវ នោះអ្នកទិញក៏ហ៊ានក្នុងការធ្វើកិច្ចសន្យាដើម្បីទិញផលិតផលកសិកម្មទាំងនោះពីកសិករ ដែលធ្វើឱ្យកសិករអាចទទួលបានឥណទានពីធនាគារ ឬគ្រឹះស្ថានហិរញ្ញវត្ថុនានា ដើម្បីយកទុនមកពីពង្រីកអាជីវកម្មរបស់ពួកគេកាន់តែងាយស្រួល ។ ព្រោះធនាគារនិងមីក្រូហិរញ្ញវត្ថុក៏មានទំនុកចិត្តខ្ពស់ក្នុងការផ្ដល់ឥណទានទៅកសិករ ដោយសារតែមានក្រុមហ៊ុនចាំទិញផលិតផលកសិកម្មស្រាប់ ។
លោកឧកញ៉ា ហង់ សុគន្ធ បានមានប្រសាសន៍បន្ថែមទៀតថា កម្ចីឥណទានពីគ្រឹះស្ថានធនាគារ ក៏ដូចជាមីក្រូហិរញ្ញវត្ថុ គឺធ្វើឱ្យកសិករមានលទ្ធភាពក្នុងការទិញគ្រឿងចក្រធំៗតម្លៃរាប់ម៉ឺនដុល្លារ ដើម្បីពង្រីករបរកសិកម្មរបស់ខ្លួន ។ ប៉ុន្តែមានកសិករមួយចំនួនបានយកកម្ចីមកប្រើប្រាស់ខុសទិសដៅ ដូច្នេះហើយវាជារឿងចាំបាច់និងត្រូវតម្រូវឲ្យមានការពន្យល់ទៅកសិករឱ្យបានច្បាស់ ថាតើត្រូវយកលុយកម្ចីទាំងនោះមកប្រើប្រាស់បែបណាដើម្បីឱ្យវាកើនឡើងបន្តទៀត ជៀសវាងធ្លាក់ក្នុងបំណុលធ្ងន់កងើបមិនរួច ។
លោក គា បូរាណ ប្រធានសមាគមមីក្រុហិរញ្ញវត្ថុកម្ពុជា បានមានប្រសាសន៍ផងដែរថា ការផ្ដល់ឥណទានទៅលើវិស័យកសិកម្មនៅតែមានហានិភ័យខ្ពស់ តែមីក្រូហិរញ្ញវត្ថុជាច្រើននៅតែផ្ដោតលើវិស័យនេះជាគោលដោយឥណទានភាគច្រើនផ្ដល់ជូនទៅក្នុងវិស័យកសិកម្ម ជាក់ស្ដែងគ្រឹះស្ថានមីក្រូហិរញ្ញវត្ថុ អេអឹមខេ របស់លោកមានឥណទានប្រមាណ ៦០ភាគរយនៃឥណទានសរុប គឺផ្ដល់ជូនក្នុងវិស័យកសិកម្ម ។
លោកបានបន្តថា កត្តាដែលនិយាយថា ការផ្ដល់ឥណទានទៅក្នុងវិស័យកសិកម្មនៅតែមានហានិភ័យខ្ពស់ ដោយសារតែកសិកម្មកម្ពុជាភាគច្រើនពឹងលើធម្មជាតិ បើសិនជារាំង ឬទឹកជំនន់ វានឹងធ្វើឱ្យកសិករខាតបង់ដំណាំ ក៏ប៉ុន្តែកាលពីកម្ពុជាជួបគ្រោះទឹកជំនន់កាលពីចុងឆ្នាំ ២០២០ និងបានបំផ្លាញដំណាំ កសិករជាច្រើនក្តី មីក្រូហិរញ្ញវត្ថុនៅតែបន្តផ្ដល់ទុនដល់កសិករដើម្បីពង្រីកនិងធ្វើកសិកម្មឡើងវិញ ។
រាជរដ្ឋាភិបាលកម្ពុជាក៏បានយកចិត្តទុកដាក់លើវិស័យកសិកម្មនេះដែរ ខណៈឆ្នាំ ២០២០ កន្លងទៅវិស័យកសិកម្មបានរួមចំណែកសេដ្ឋកិច្ចបានច្រើន ជាពិសេសបានទប់នូវការធ្លាក់ចុះនៃសេដ្ឋកិច្ចនិងទប់កំណើនអត្រាភាពក្រីក្រមួយកម្រិតផងដែរ ។
កន្លងមកក្រសួងកសិកម្មរុក្ខាប្រមាញ់និងនេសាទ ក៏បានជំរុញឱ្យកសិករចងក្រងជាសហគមន៍ឱ្យបានច្រើន ដើម្បីងាយស្រួលរកទីផ្សារជូនផលិតផលកសិកម្មដែលទទួលបានទិន្នផលរៀងរាល់ឆ្នាំ និងងាយស្រួលរកដំណោះស្រាយជូនកសិករនៅពេលមានបញ្ហាណាមួយកើតឡើង ។
ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោហ៊ុនសែន នាយករដ្ឋមន្ត្រី នៃព្រះរាជាណាចក្រកម្ពុជាក៏បានអំពាវនាវ និងស្នើឱ្យពលរដ្ឋបាត់បង់ឱកាសការងារក្នុងវិបត្តិកូវីដ-១៩ ចាប់យកវិស័យកសិកម្ម ដើម្បីផ្គត់ផ្គង់លើទីផ្សារក្នុងស្រុក និងឈានទៅដល់ការនាំចេញទៅកាន់ទីផ្សារអន្តរជាតិផងដែរ ៕
ចែករំលែកព័តមាននេះ