រាជធានីភ្នំពេញ ៖ តម្លៃរថយន្តថ្មីៗនៅលើទីផ្សារប្រទេសកម្ពុជា ត្រូវបានរំពឺងថា នឹងមានការ ធ្លាក់ថ្លៃបន្តិចនៅក្នុងឆ្នាំ ២០២១នេះ ដោយសារតែរាជរដ្ឋាភិបាលបានធ្វើការកែប្រែនូវពន្ធអាករ ពិសេសលើរថយន្តមួយចំនួន ។…
រាជធានីភ្នំពេញ ៖ តម្លៃរថយន្តថ្មីៗនៅលើទីផ្សារប្រទេសកម្ពុជា ត្រូវបានរំពឺងថា នឹងមានការ ធ្លាក់ថ្លៃបន្តិចនៅក្នុងឆ្នាំ ២០២១នេះ ដោយសារតែរាជរដ្ឋាភិបាលបានធ្វើការកែប្រែនូវពន្ធអាករ ពិសេសលើរថយន្តមួយចំនួន ។
យោងតាមអនុក្រឹត្យសម្រេចរបស់រាជរដ្ឋាភិបាលបានបង្ហាញពីការកែប្រែអាករពិសេសដោយបន្ធូរបន្ថយមកនៅទាបជាងមុនលើទំនិញជារថយន្តជាច្រើនបន្ទាត់ ដោយទំនិញខ្លះបាន បញ្ចុះអាករពិសេសពី ៣០ភាគរយនៅត្រឹម ២០ភាគរយ ពី ៦០ ភាគរយមកនៅ ៥០ភាគរយ និងខ្លះពី ៧០ភាគរយនៅត្រឹម ៥៥ភាគរយជាដើម ។
លោក ងន សាំង អគ្គនាយកក្រុមហ៊ុន អ អិម អេ ខេមបូឌា បានមានប្រសាសន៍ថា ការ បញ្ចុះពន្ធរបស់រាជរដ្ឋាភិបាលលើប្រភេទរថយន្តនាំចូលមួយចំនួន បើទោះបីជាមិនទាំងអស់ក្ដី វាក៏អាចធ្វើឱ្យតម្លៃរថយន្តថ្មីមួយចំនួន ដែលរដ្ឋាភិបាលបញ្ចុះពន្ធនោះ មានការធ្លាក់ថ្លៃផងដែរ ។ កត្តានេះ នឹងធ្វើឱ្យកំណើនអ្នកប្រើប្រាស់រថយន្តថ្មីនៅលើទីផ្សារប្រទេសកម្ពុជាមានកំណើន មួយកម្រិតទៀតផងដែរ ។
លោកបន្តថា ក្នុងនាមជាអ្នកនាំចូលរថយន្តថ្មីមកកម្ពុជា គឺពិតជាចង់ឃើញពលរដ្ឋ កម្ពុជាមានលទ្ធភាពប្រើប្រាស់រថយន្តថ្មីកាន់តែច្រើន ដើម្បីសុវត្ថិភាពអ្នកប្រើប្រាស់ ព្រោះថា ការប្រើប្រាស់រថយន្តមួយទឹកដែលមិនប្រវត្តិច្បាស់លាស់វាពិតជាបង្កគ្រោះថ្នាក់ដល់អ្នកប្រើ និងត្រូវចំណាយច្រើនទៅលើសេវាជួសជុលផងដែរ ។ តែបើសិនជាពលរដ្ឋប្រើប្រាស់រថយន្ត ថ្មីចេញពីរោងចក្រច្បាស់លាស់ នឹងមិនព្រួយបារម្ភពីបញ្ហាបច្ចេកទេស និងមិនចំណាយថវិកា ក្នុងការជួសជុលរថយន្តទាំងនោះដែរ ក្នុងរយៈពេលប៉ុន្មានឆ្នាំដំបូង ។
លោកបន្ថែមថា កាលពីមុនពលរដ្ឋកម្ពុជាភាគច្រើនប្រើប្រាស់រថយន្តមួយទឹក ។
បើ តាមស្ថិតិពលរដ្ឋប្រើរថយន្តមួយទឹកកាលពីបីបួនឆ្នាំមុន មានរហូតដល់ជិត ៩០ភាគរយឯ ណោះ តែក្រោយមកដោយសារតែការបន្ធូរបន្ថយពន្ធ ធ្វើឱ្យអ្នកប្រើប្រាស់រថយន្តថ្មីបានកើន ឡើងវិញ ដោយក្នុងនោះពេលបច្ចុប្បន្ននេះ អ្នកប្រើប្រាស់រថយន្តថ្មីមានរហូតដល់ជាង ២០ ភាគរយហើយ ហើយរំពឹងថា កំណើនអ្នកប្រើប្រាស់រថយន្តថ្មីនឹងកើនឡើងបន្ថែមទៀត នៅ ក្នុងឆ្នាំ ២០២១នេះ ដោយសារការបញ្ចុះពន្ធរបស់រដ្ឋាភិបាល ។
លោកបញ្ជាក់ថា កាលពីឆ្នាំ ២០២០ដោយសារតែវិបត្តិកូវីដ ១៩ ធ្វើឱ្យវិស័យនានាត្រូវ បានជួបប្រទះនឹងបញ្ហា ក្នុងនោះវិស័យឧស្សាហកម្មយានយន្តនៅកម្ពុជាក៏មានបញ្ហាដែរ ក្នុង នោះក្រុម អ អិម អេបានធ្លាក់ចុះការនាំចូលប្រមាណ ១០ភាគរយ ហើយក្រុមហ៊ុនផ្សេងៗ ទៀតក៏មានការធ្លាក់ចុះដូចគ្នា ។
សូមបញ្ជាក់ថា កាលពីពេលកន្លងទៅនេះ រដ្ឋាភិបាលបានដំឡើងពន្ធលើការនាំចូល រថយន្តសម្រាប់អ្នកនាំចូលមកប្រើប្រាស់ផ្ទាល់ ដែលមានការសាទរពីក្រុមហ៊ុននាំផ្ដាច់មុខ ហើយកាលពីដើមខែ កុម្ភៈ ២០២១ នេះ រដ្ឋាភិបាលក៏បានប្រកាសបន្ធូរបន្ថយនូវការនាំចូល រថយន្តថ្មីៗជាច្រើនមុខបន្ទាត់ពន្ធ ហើយក៏មានការសាទរពីអ្នកនាំចូលរថយន្តថ្មីមកក្នុងប្រទេ សកម្ពុជា ។
ក្នុងរយៈពេលប៉ុន្មានឆ្នាំកន្លងទៅនេះ កំណើនយានយន្តនៅលើដងវិថីកម្ពុជា ត្រូវបាន មើលឃើញកាន់តែមានច្រើនៗឡើងពីមួយឆ្នាំទៅមួយឆ្នាំ ដែលជាបញ្ហាសម្រាប់ចរាចរណ៍ ជាពិសេសការកកស្ទះចរាចរណ៍ ដែលកើតមានស្ទើររាល់ថ្ងៃ ។ បញ្ហានេះត្រូវបានមន្ត្រីជាន់ខ្ពស់ កម្ពុជាលើកឡើងថា មកពីកត្តាជីវភាពពលរដ្ឋមានការរីកចម្រើន ៕
ចែករំលែកព័តមាននេះ