អ្វីទៅដែលហៅថាតួជីវិត ?
នៅក្នុងគម្ពីរអភិធម្មបានពន្យល់ថា ភ្នែក ត្រចៀក ច្រមុះ អណ្តាត កាយ ចិត្ត រូប សំឡង ក្លិន…
នៅក្នុងគម្ពីរអភិធម្មបានពន្យល់ថា ភ្នែក ត្រចៀក ច្រមុះ អណ្តាត កាយ ចិត្ត រូប សំឡង ក្លិន រស សម្ផស្ស ធម្មារម្មណ៍ និងវេទនាទាំងឡាយដែលសោយតាមទ្វារភ្នែក ទ្វារត្រចៀក ទ្វារច្រមុះ ទ្វារអណ្តាត ទ្វារកាយ គឺជាតួជីវិត ដែលជាដុំភ្លើង ឬជារបស់ក្តៅ ។ តើក្តៅព្រោះអ្វី ? ក្តៅព្រោះភ្លើងកិលេស គឺ រាគៈ ទោសៈ មោហៈ ។
បច្ចុប្បន្នបើទោះជាគ្មានអ្នកណាប្រាប់ ក៏យើងគង់នឹងដឹងបានថា សត្វលោកកំពុងរស់នៅក្នុងកម្តៅ ហើយកម្តៅនេះមានកំណើនកើនជាងមុនកាន់តែឆ្ងាយ ។ សភាពទាំងអស់នេះក៏ព្រោះតែភ្លើងរាគៈ ទោសៈ មោហៈ ដែលអាស្រ័យនៅក្នុងចិត្តរបស់សត្វលោក កាន់តែមានចំហេះខ្លាំងឡើងៗ ដោយហេតុថា សត្វលោកកាន់តែឆ្លាត មានល្បិចកលពិសពុលក្នុងការផ្គុំភ្លើងតណ្ហាឲ្យកាន់តែមានកម្លាំងខ្លាំងឡើងៗជាលំដាប់ ។
សត្វលោករឹតតែមិនដឹងថា ការពន្លត់ភ្លើង រាគៈ ទោសៈ មោហៈ គឺជាចំណុចដ៏ត្រជាក់ដ៏កំពូលរបស់ជីវិតនោះទេ ផ្ទុយទៅវិញគេច្រើនតែស្វែងរកសេចក្តីសប្បាយរីករាយលើបញ្ចកាមគុណ ដែលជាការពង្រីកភ្នក់ភ្លើងឲ្យកាន់តែធំដុតរោលជីវិតឱ្យកាន់តែក្តៅ នេះហើយដែលលោកហៅថាជីវិតជារបស់ក្តៅ ៕ សាន សារិន
ចែករំលែកព័តមាននេះ