ខេត្តស្វាយរៀង ៖ បុរសម្នាក់បានស្លាប់ភ្លាមៗ នៅនឹងកន្លែងកើតហេតុ ខណៈជនរងគ្រោះកំពុងជិះម៉ូតូ តាមដងផ្លូវ ។
បើតាមសមត្ថកិច្ចបានឲ្យដឹងថា គ្រោះថ្នាក់ចរាចរណ៍នេះ បង្កឡើងដោយជនស្រវឹងស្រា ហើយបើកបររថយន្តមួយគ្រឿងម៉ាក់ lexus RX300 បើកលឿនដូចហោះទៅបុកជនរងគ្រោះទាំងកម្រោល បណ្តាលឲ្យស្លាប់ភ្លាមៗ នៅនិងកន្លែង រួចជនបង្កបើករថយន្តគេចខ្លួនពីកន្លែងកើតហេតុ ក៏ប៉ុន្តែត្រូវសមត្ថកិច្ចតាមចាប់ឃាត់ខ្លួនបានឲ្យមកទទួលខុសត្រូវនៅមុខច្បាប់ ។
ករណីគ្រោះថ្នាក់ចរាចរណ៍នេះ បានកើតឡើង កាលពីវេលាម៉ោង៤និង៣៥នាទីរសៀល ថ្ងៃទី១៤ ខែកុម្ភៈឆ្នាំ២០២១ នៅលើកំណាត់ផ្លូវជាតិលេខ៣១៦D ស្ថិតក្នុងភូមិ ព្រៃតាញ៉យ ឃុំខ្សែត្រស្រុកកំពង់រោទិ៍ ខេត្តស្វាយរៀង ។
សមត្ថកិច្ចបានបន្តថា មុនពេលកើតហេតុគេឃើញមានម៉ូតូ១គ្រឿង ម៉ាកហុងដាឌ្រីម C125 ឆ្នាំ2016 ពណ៌ខ្មៅ ពាក់ផ្លាកលេខស្វាយរៀង 1 L.8013 លេខតួ.ម៉ាស៊ីន ៩៦០១១៤៩ បានធ្វើដំណើរពីទិសខាងជើងមកត្បូង បើកបរដោយឈ្មោះ ទិត សាប៊ូ ភេទប្រុស អាយុ៦៨ឆ្នាំ មានទីលំនៅភូមិកោះត្រាច ឃុំថ្មីស្រុកកំពង់រោទិ៍ ខេត្តស្វាយរៀង ។
លុះមកដល់ចំណុចកើតហេតុខាងលើ ត្រូវរថយន្តម៉ាក lexus RX ៣០០ ពណ៌ស កាំម៉ៃ ពាក់ស្លាកលេខស្វាយរៀង 2B1312 បើកបររថយន្តដោយឈ្មោះ ហែន.នឿន ភេទប្រុស អាយុ៣៤ឆ្នាំ មានទីលំនៅភូមិបុស្សឃុំមេសថ្ងក ស្រុកចន្ទ្រា ខេត្តស្វាយរៀង ធ្វើដំណើរពីត្បូងទៅជើងបញ្ច្រាសទិសគ្នា យ៉ាងលឿនក៏រេចង្កូតមកបុកជនរងគ្រោះ បណ្ដាលឲ្យស្លាប់នៅកន្លែងកើតហេតុតែម្តង ។
ក្រោយពីបង្កហេតុជនបង្កបានបើករថយន្តរត់គេចខ្លួនពីកន្លែងកើតហេតុ តែត្រូវកម្លាំងសមត្ថកិច្ចឃាត់បានទាំងរថយន្ត និងអ្នកបើកបរ ។ បច្ចុប្បន្នសពជនរងគ្រោះបានប្រគល់ឲ្យសាច់ញាតិ ធ្វើបុណ្យតាមប្រពៃណី ។ ចំណែកអ្នកបើកបរនឹងរថយន្តត្រូវបានសមត្ថកិច្ចឃាត់ខ្លួននៅប៉ុស្តិ៍នគបាលរដ្ឋបាលឃុំខ្សែត្រ ដើម្បីសាកសួរហើយសមត្ថកិច្ចបានធ្វើការផ្លុំជាតិអាកុលឃើញ មាន០,៨៥៥mg/L.។
សមត្ថកិច្ចបានកសាងសំណុំរឿងបញ្ជូនមកស្នងការដ្ឋាននគបាលខេត្ត ដើម្បីចាត់ការតាមនីតិវិធី ។ ចំណែកម៉ូតូខូចធ្ងន់រថយន្តខូចស្រាល មូលហេតុអ្នកបើកបរក្នុងស្ថានភាពស្រវឹង និងបើកបររថយន្តដោយប្រើល្បឿនលឿនមិនប្រកាន់ស្ដាំខ្វះការប្រុងប្រយ័ត្ន ៕
ចែករំលែកព័តមាននេះ