រាជធានីភ្នំពេញ ៖ រថយន្តម៉ាកព្រូសមួយគ្រឿងបើកបរក្នុងល្បឿនលឿន ទើបជ្រុលរេចង្កូតទៅបុកផ្នូរវីរជន និងខឿនសួនច្បារវិមានឯករាជ្យ បណ្តាលឱ្យរងការខូចខាត ចំណែករថយន្តបានរងការខូចខាតយ៉ាងដំណំ ។ ហេតុការណ៍ខាងលើនេះបានកើតឡើងកាលពីវេលាម៉ោង4ទៀបភ្លឺថ្ងៃទី15 ខែកុម្ភៈ…
រាជធានីភ្នំពេញ ៖ រថយន្តម៉ាកព្រូសមួយគ្រឿងបើកបរក្នុងល្បឿនលឿន ទើបជ្រុលរេចង្កូតទៅបុកផ្នូរវីរជន និងខឿនសួនច្បារវិមានឯករាជ្យ បណ្តាលឱ្យរងការខូចខាត ចំណែករថយន្តបានរងការខូចខាតយ៉ាងដំណំ ។
ហេតុការណ៍ខាងលើនេះបានកើតឡើងកាលពីវេលាម៉ោង4ទៀបភ្លឺថ្ងៃទី15 ខែកុម្ភៈ ឆ្នាំ2021 នៅចំណុចវិមានឯករាជ្យ តាមបណ្តោយផ្លូវព្រះសុរាម្រិត ស្ថិតក្នុងសង្កាត់ចតុមុខ ខណ្ឌដូនពេញ រាជធានីភ្នំពេញ ។
រថយន្តបង្កមួយគ្រឿងខាងលើនេះម៉ាកព្រូស ពណ៌ស ស៊េរីឆ្នាំ២០១០ ពណ៌ស ពាក់ស្លាកលេខ ភ្នំពេញ 2BB-1315 អ្នកបើកបរមិនស្គាល់អត្តសញ្ញាណ ។
តាមប្រភពព័ត៌មានពីសមត្ថកិច្ចមូលដ្ឋានបានអោយដឹងថា មុនពេលកើតហេតុ គេឃើញរថយន្តមួយគ្រឿងម៉ាកព្រូស ដោយមានមនុស្ស២ទៅ៣នាក់ជិះក្នុងរថយន្តនោះ ធ្វើដំណើរតាមបណ្តោយផ្លូវព្រះនរោត្តមក្នុងទិសដៅពីជើងទៅត្បូង និងបើកបរក្នុងល្បឿនយ៉ាងលឿនដូចហោះ លុះមកដល់ផ្លូវកោងត្រង់វិមានឯករាជ្យ អត់បានបន្ថយល្បឿននោះទេ ក៏ទាញចង្កូតមិនទាន់ ទើបជ្រុលទៅបុកមុនដំបូងគឺផ្នូរវីរជនចំនួន២ និងបុកខឿនសួនច្បារវិមានឯករាជ្យ បណ្តាលឱ្យរងការខូចខាត ចំណែករថយន្តម៉ាកព្រូសបានកល់ជាប់ទៅមុខលែងរួច រងការខូចខាតខ្ទេចមួយកំណាត់ខាងមុខស្ទើរទាំងស្រុង និងផ្ទុះពោងទាំងសងខាងទៅមុខលែង ដោយឡែកអ្នកបើកបរមិនមានរងគ្រោះថ្នាក់នោះទេ គ្រាន់តែខូចខាតទ្រព្យសម្បត្តិរបស់រដ្ឋ និងរថយន្តមួយគ្រឿងតែប៉ុណ្ណោះ ។
តាមប្រភពដដែលបានបន្តថា ភ្លាមៗនោះដែរ សមត្ថកិច្ចខាងផ្នែកចរាចរណ៍ផ្លូវក៏បានមកដល់ធ្វើការឃាត់យកអ្នកបើកបរយកទៅសួរនាំនៅការិយាល័យ ហើយហេតុការណ៍គ្រោះថ្នាក់ខាងលើនេះគឺមិនបង្កអោយអ្នកដទៃណាម្នាក់រងគ្រោះថ្នាក់នោះឡើយ ដោយសារតែខ្វះការប្រុងប្រយ័ត្នទើបជ្រុលអោយបុកផ្នូរវីរជន និងខឿនសួនច្បារវិមានឯករាជ្យបែបនេះតែម្តង ។
ក្រោយពេលកើតហេតុខាងលើនេះរថយន្តបង្កត្រូវបានសមត្ថកិច្ចធ្វើការវាសវែងយកទៅរក្សាទុកនៅការិយាល័យចរាចរណ៍ផ្លូវគោកដើម្បីធ្វើការផាក់ពិន័យទៅតាមនិតិវិធី ៕
ចែករំលែកព័តមាននេះ