ភ្នំពេញ​៖ ក្នុងសារជាសំឡេង នៅយប់ថ្ងៃអាទិត្យ ទី១៤ ខែកុម្ភៈ ឆ្នាំ២០២១ សម្តេចតេជោ នាយករដ្ឋមន្ត្រី ហ៊ុន សែន បានដាក់ចេញបទបញ្ជាសាជាថ្មី ទៅកាន់អភិបាលខេត្ត​នៅជាប់ព្រំដែនថៃទាំងអស់ ត្រូវតែ​រឹតបន្តឹងតាមព្រំដែន​ឲ្យបានម៉ឺងម៉ាត់​ជាងមុន លើការឆ្លងដែន​របស់ពលករ​ខ្មែរ មកពីថៃ​។ បទបញ្ជារបស់សម្តេចដូច្នេះ ដោយសារតែ​សម្តេច លើកឡើងថា មានពលករខ្មែរ មកពីថៃ ជាង ១០នាក់ បាន​ធ្លា​យចូល​ដល់​ស្រុកកំណើត នៅខេត្តតាកែវ ហើយកំពុងធ្វើចត្តាឡីស័ក​។

សម្តេចតេជោ ក៏បានបញ្ជាឲ្យអាជ្ញាធរខេត្តតាកែវ សួរនាំក្រុមពលករទាំងនោះ ហើយស្វែងរក​មេក្លោង​ ដែលបាននាំពលករ​ទាំងនោះ ពីប្រទេសថៃ ចូល​មក​ដល់ខេត្តតាកែវ​។ វិធានការនេះ ដើម្បីទប់ស្កាត់​ កុំឲ្យពលករមកពីថៃ គេចពីការធ្វើ​ចត្តាឡីស័ក នៅតាមខេត្តជាប់ព្រំដែន​ថៃ ដែលនាំ​ឲ្យមានហានិភ័យ​ខ្ពស់​ក្នុងការឆ្លង​រាលដាលជំងឺកូវីដ១៩ នៅក្នុងប្រទេស​កម្ពុជាយើង​។

ក្នុងសារជាសំឡេង ដែលគេផ្សព្វផ្សាយនៅយប់ថ្ងៃទី១៤ ខែកុម្ភៈនេះ សម្តេចតេជោ ហ៊ុន សែន លើកឡើងថា «ខ្ញុំឃើញបញ្ហាកាន់តែច្រើនហើយ! ខេត្តតាកែវ បែរជាអ្នកមក​ពីវៀតណាម តិចជាងអ្នកមកពីថៃ! អីចឹងទេ ខ្ញុំសូមដាក់បទបញ្ជាសាជាថ្មីម្តងទៀត ទៅបណ្តាខេត្ត តាមព្រំដែន​កម្ពុជា-ថៃ មើលច្រក ដែលគេធ្លាប់មកហ្នឹង! គឺចាត់ចែង​រៀបចំ​​កម្លាំង ដើម្បីល្បាត ហើយចាប់​ឲ្យធ្វើចត្តាឡីស័ក នៅឯទល់ដែន!»។​

សម្តេចតេជោ ហ៊ុន សែន បន្ថែមថា «ធ្វើដំណើរ​ពីថៃ ធ្លាក់​រហូតដល់តាកែវ! ហើយមកធ្វើ​ចត្តាឡីស័ក​នៅនេះ! អីចឹងបើថា ពួកហ្នឹងមានវិជ្ជមានកូវីដ១៩ វាមិនធ្លាយ​សហគមន៍​ឆ្លងងាប់​អន្តរធាន​! អីចឹងសូម​ឲ្យយកចិត្តទុកដាក់​ឡើងវិញ! ឥឡូវ ដាក់បទបញ្ជាសាជាថ្មី ទៅតាមព្រំដែន​កម្ពុជា-ថៃ! ធើ​ឲ្យម៉ឹងម៉ាត់​មែនទែនមើល! កម្លាំងយើងមានគ្រប់គ្រាន់! ប៉ុន្តែ​ហេតុអ្វីបានជា​ឲ្យ​ធ្លាយមក​របៀបនេះ? អីចឹងទេ វាមានផ្លូវកាត់កន្លែងណា? ហើយជាពិសេសគឺខាងតាកែវ សួរចម្លើយ​អាពួកហ្នឹងមើល! នរណានាំផ្លូវ? ដើម្បីយើង​ចាត់ការពួក​អាមេក្លោង​នាំផ្លូវ​ហ្នឹង​ទៀត បាន បាន​! បើមិនអីចឹង មិនបានទេ! យើងឥឡូវ គឺថា ចាត់ការអាអ្នកនាំផ្លូវតែម្តង! ព្រោះអានេះ ចូលដល់ប៉ុន្មានដណ្តប់នាក់អីចឹង! អីចឹងមានអ្នកនាំផ្លូវហើយ! អីចឹងសូម​ឲ្យខាងតាកែវ សួរ សួរ​ចម្លើយ​ឲ្យបានច្បាស់! សួរសម្ភាសន៍​​ឲ្យបានច្បាស់! យើង​មិននេះទេ! ត្រូវធើ! លេងមកធ្វើចត្តាឡីស័ក​នៅតាកែវ ដោយឆ្លងកាត់តាំងពី​ព្រំដែន​ថៃ មកដល់តាកែវ! វាមិនងាប់អន្តរធានហើយ យ៉ាងនេះ!»​៕