ខេត្តមណ្ឌលគិរី៖ ផ្លូវប្រវត្តិសាស្ត្រក្រវ៉ាត់ព្រំដែនខេត្តមណ្ឌលគិរី ត្រូវបាន​កម្លាំងវិស្វកម្មស្ថាបនារួចរាល់ ប្រមាណពី ៦០​ ទៅ ៧០ ភាគរយ។ នេះ​គឺជាផ្លូវ​យុទ្ធសាស្ត្ររបស់រាជរដ្ឋាភិបាលក្រោមការដឹកនាំរបស់សម្ដេចអគ្គមហាសេនាបតីតេជោ ហ៊ុន សែន ដែលបានជួយ​សម្រួលកងកម្លាំងឈរជើងការពារព្រំដែន​ងាយស្រួល ចូលទៅគ្រប់គ្រង និងការពារបូរណភាពទឹកដីការពារជាតិមាតុភូមិ។

ឯកឧត្តម ស្វាយ សំអ៊ាង អភិបាលខេត្តមណ្ឌលគិរី កាលពីថ្ងៃទី ១៣ ខែកុម្ភៈ ឆ្នាំ ២០២១ បានដឹកនាំកងកម្លាំងប្រដាប់អាវុធទាំងបីប្រភេទ និងមន្ទីរជុំវិញខេត្ត ចុះសាកសួរសុខទុក្ខ នគរបាលការពារព្រំដែនគោក ចំនួន​ប្រាំបីគោលដៅ យោធាការពារព្រំដែន ចំនួន​ដប់គោលដៅ និង​កម្លាំងវិស្វកម្មពីរគោលដៅ។

ដើម្បីលើកទឹកចិត្ត និងឧបត្ថម្ភគាំទ្រដល់​កម្លាំង​ស្ថាបនា​ផ្លូវ​ព្រំដែន​ អាជ្ញាធរខេត្ត បាននាំ​នូវ​គ្រឿងបរិភោគ និងថវិកាមួយចំនួន ដល់កងកម្លាំង ដែលបានលះបង់ កម្លាំងកាយចិត្ត​ក្នុងការកសាងស្ថាបនាផ្លូវខ្សែក្រវ៉ាត់ព្រំដែន និងកម្លាំងឈរជើងប្រចាំការការពារ​បូរណភាពទឹកដីកម្ពុជា។

ឯកឧត្តម ស្វាយ សំអ៊ាង មានប្រសាសន៍បន្តថា ផ្លូវក្រាលគ្រួសក្រហមទំ ហំ៨ម៉ែត្រ ប្រវែង៣១៤ គីឡូម៉ែត្រ ដែល​កំពុងលូនកាត់លាតសន្ធឹងតាមបណ្ដោយបន្ទាត់​ព្រំដែនកម្ពុជា-វៀតណាម លើទឹកដីខេត្តមណ្ឌលគិរី ចាប់ពីចំណុច​ព្រំប្រទល់ស្រុកកែវសីមា ឆ្លងកាត់ស្រុកអូររាំង និងបញ្ចប់ត្រឹមស្រុកកោះញែក គឺជាសក្ខីភាពថ្មីមួយ សម្រាប់ប្រជាជនកម្ពុជា ដែលជាផ្លូវយុទ្ធសាស្ត្ររបស់​រាជរដ្ឋាភិបាល ក្នុងការការពារទឹកដី និងជាផ្លូវចិត្តកិច្ចថ្មី សម្រាប់ប្រជាពលរដ្ឋ រស់នៅក្នុងតំបន់ ក៏ដូចជាក្នុងប្រទេសកម្ពុជា មិនត្រឹមតែប៉ុណ្ណោះផ្លូវមួយខ្សែនេះ បានជួយសម្រួលដល់​បណ្ដាកងកម្លាំង ដែលមានតួនាទីការពារនៅតាម​គោលដៅសំខាន់ៗ និងជាការបិទបញ្ចប់នូវបញ្ហាជម្លោះព្រំដែនផងដែរ។

ឯកឧត្តម លើកឡើងថា បើទោះបីជាកម្ពុជានៅមានការខ្វះខាតនូវធនធាន​មួយចំនួន​ក៏ដោយ រាជរដ្ឋាភិបាលកម្ពុជាបានយកចិត្តទុកដាក់យ៉ាងខ្លាំង ចំពោះការជំរុញ ដល់ការងារការពារជាតិ ជាពិសេសការពារទឹកដី។

ឯកឧត្តមអភិបាលខេត្ត ក៏បានជំរុញដល់បណ្តាកងកម្លាំងឈរជើងតាមបន្ទាត់ព្រំដែន ត្រូវបង្កើនការយកចិត្តទុកដាក់ និងរឹតបន្តឹងលើការឆ្លងដែនខុសច្បាប់ ខណៈកម្ពុជា កំពុងប្រយុទ្ធ​ប្រឆាំងយ៉ាងខ្លាំងក្លាពីការឆ្លងរីករាលដាលនៃជំងឺកូវីដ១៩ ជៀសវាងមានប្រជាពលរដ្ឋឆ្លងដែនគេចពីការត្រួតពិនិត្យសុខាភិបាល អាចនាំហានិភ័យចម្លងជំងឺ ចូលក្នុងសហគមន៍៕ ដោយ៖ សាយ ករុណា