ខេត្តកំពង់ចាម ៖ បើតាមសេចក្តីរាយការណ៍បានឱ្យដឹងថា បុរសជាសន្តិសុខឯកជនម្នាក់បែកគំនិតលួចយករថយន្តសេរីទំនើបម៉ាក BMW មួយគ្រឿងចេញពីរាជធានីភ្នំពេញ រួចបើកគេចខ្លួនចូលមកទឹកដីខេត្តកំពង់ចាម។ ប៉ុន្តែនៅទីបំផុត ក៏ត្រូវអស់លក្ខណ៍ដោយកម្លាំងសមត្ថកិច្ចដាក់ពង្រាយកម្លាំងតាមដងផ្លូវបណ្ដាក់គ្នាដូចខ្យង រួចក៏ចាប់ខ្លួនបានក្នុងទឹកដីស្រុកជើងព្រៃ និងបានបញ្ជូនមកកាន់ស្នងការដ្ឋាននគរបាលខេត្ត លុះពេលសួរនាំ ក៏ស្រាប់តែបែកធ្លាយករណីមនុស្ស.ឃា.ត.គិតទុកជាមុនទៀត ដែលប្រព្រឹត្តនៅក្នុងស្រុកព្រែកប្រសព្វ ខេត្តក្រចេះ។
លោកវរសេនីយ៍ឯកប្រាក់ សុគុណ អធិការនគរបាលស្រុកជើងព្រៃ បានប្រាប់ឲ្យដឹងនៅរសៀលថ្ងៃទី១៤ ខែកុម្ភៈ ឆ្នាំ២០២១នេះថា នៅវេលាម៉ោង១២ថ្ងៃត្រង់ ថ្ងៃទី១៣ ខែកុម្ភៈ ឆ្នាំ២០២១ ដោយទទួលពាក្យបណ្ដឹងពីឈ្មោះ កែវ ចក្រី ភេទប្រុស អាយុ៣៧ឆ្នាំ មានទីលំនៅ ផ្ទះលេខ៣៤ ផ្លូវព្រះសីហនុ ក្នុងភូមិបី សង្កាត់ទន្លេបាសាក់ ខណ្ឌចំការមន រាជធានីភ្នំពេញ ថា នៅវេលាម៉ោង១១.០០នាទី ថ្ងៃទី១៣ ខែកុម្ភៈ ឆ្នាំ២០២១ មានករណីចោរកម្ម ដោយលួចយករថយន្តរបស់គាត់១គ្រឿង ម៉ាក BMW x5 ស្លាកលេខ 2AO1944 ភ្នំពេញ ដោយរថយន្តនោះបានភ្ជាប់ប្រព័ន្ធ GPS ហើយបានបើកគេចទៅតាមផ្លូវជាតិលេខ6A ឆ្ពោះចូលមកទឹកដីខេត្តកំពង់ចាម ។
អធិការនគរបាលស្រុកជើងព្រៃ ប្រាប់បន្តថា ពេលទទួលពាក្យបណ្ដឹងខាងលើភ្លាម លោក ឧត្តមសេនីយ៍ទោ ឯម កុសល ស្នងការខេត្តកំពង់ចាម បានបញ្ជាឲ្យកម្លាំងជំនាញអធិការដ្ឋានស្រុកជើងព្រៃ ដឹកនាំបញ្ជាដោយលោកផ្ទាល់សហការជាមួយអធិការដ្ឋាននគរបាលស្រុកបាធាយ ដឹកនាំដោយលោកវរសេនីយ៍ឯក សំណាល ចេញប្រតិបត្តិការ រហូតដល់វេលាម៉ោង១២និង៣០នាទីរសៀល នាថ្ងៃទី១៣ ខែកុម្ភៈ ទើបស្ទាក់ចាប់ឃាត់ខ្លួនជនសង្ស័យម្នាក់ឈ្មោះ មេត សុខណាក់ ភេទប្រុស ជនជាតិខ្មែរ អាយុ៣៣ឆ្នាំ មុខរបរសន្តិសុខឯកជន មានទីលំនៅភូមិកំពង់គោ ឃុំកំពង់គោ ស្រុកព្រែកប្រសព្វ ខេត្តក្រចេះ និងដកហូត រថយន្ត១គ្រឿងម៉ាក BMW x5 ស្លាកលេខភ្នំពេញ 2AO 1944 នៅចំណុចលើផ្លូវជាតិលេខ6A ស្ថិតក្នុងភូមិតាសែន ឃុំសូទិព្វ ខេត្តកំពង់ចាម ។
អធិការនគរបាលស្រុកជើងព្រៃ ប្រាប់បន្តទៀតថា ជននេះនៅពេលដែលកម្លាំងនគរបាលចរាចរណ៍ស្រុកបាធាយដែលជាគោលដៅទី១ ស្របពេលដែលឃើញរថយន្តនេះបើកតាមដងផ្លូវជាតិលេខ៦ ក៏បានលើកសញ្ញាហៅឱ្យឈប់ដើម្បីសួរនាំ តែជននេះមិនបានឈប់នោះទេ គឺរឹតតែបន្ថែមល្បឿនបើករត់គេចឆ្ពោះមកខាងមុខទៀត។ បន្ទាប់មកកម្លាំងនគរបាលចរាចរណ៍ជាច្រើននាក់ ក៏បានបើករថយន្តដេញតាមពីក្រោយ និងបានបោះដៃមកកាន់ស្រុកជើងព្រៃ ដើម្បីឲ្យជួយចាំស្ទាក់ នៅទីបំផុតក៏ជាប់អន្ទាក់របស់សមត្ថកិច្ចតែម្តង។
លោកវរសេនីយ៍ឯក ប្រាក់ សុគុណ អធិការនគរបាលស្រុកជើងព្រៃ បញ្ជាក់ថា បន្ទាប់ពីបាននាំខ្លួនជននេះមកកាន់អធិការរដ្ឋាននគរបាលស្រុកជើងព្រៃសួរនាំ ក៏ស្រាប់តែបានបែកធ្លាយរឿងករណី.ឃា.ត.ក.ម្ម.មួយទៀត ដែលមានដីកាបង្គាប់ឱ្យចាប់ខ្លួនរបស់លោកតូច សារឿន ចៅក្រមស៊ើបសួរនៃសាលាដំបូងខេត្តក្រចេះ ដោយបានចោទប្រកាន់ឈ្មោះ ម៉េត សុខណាក់ ដែលមានទីលំនៅសព្វថ្ងៃភូមិជ្រោយស្នែងក្របីលើ ឃុំកំពងគ ស្រុកព្រែកប្រសព្វ ខេត្តក្រចេះ ពីបទមនុស្ស.ឃា.ត.គិតទុកជាមុន ប្រព្រឹត្តនៅភូមិវត្តដីដុះ ឃុំព្រែកប្រសព្វ ស្រុកព្រែកប្រសព្វ ខេត្តក្រចេះ កាលពីថ្ងៃទី១៩ ខែវិច្ឆិកា ឆ្នាំ២០០៥កន្លងទៅ៕
ចែករំលែកព័តមាននេះ