ខេត្តបាត់ដំបង ៖ មន្ទីរពេទ្យអង្គការ «HANDA-EMERGENCY» ដែលមានទីតាំងនៅជាប់ផ្លូវជាតិលេខ៥ ក្នុងសង្កាត់រតនះ ក្រុងបាត់ដំបង កំពុងរងការរិះគន់យ៉ាងខ្លាំងពីសំណាក់មហាជនទូទៅ ដោយសារតែមន្ទីរពេទ្យនេះទាមទារសេវាព្យាបាលខ្ពស់លើសពីគ្លីនិកឯកជននានា និងមន្ទីរពេទ្យរដ្ឋ ថែមទាំងមានការរើសអើងចំពោះអ្នកជំងឺ ដែលខ្សត់ខ្យោយលុយកាក់ ឬបដិសេធមិនទទូល
ខេត្តបាត់ដំបង ៖ មន្ទីរពេទ្យអង្គការ «HANDA-EMERGENCY» ដែលមានទីតាំងនៅជាប់ផ្លូវជាតិលេខ៥ ក្នុងសង្កាត់រតនះ ក្រុងបាត់ដំបង កំពុងរងការរិះគន់យ៉ាងខ្លាំងពីសំណាក់មហាជនទូទៅ ដោយសារតែមន្ទីរពេទ្យនេះទាមទារសេវាព្យាបាលខ្ពស់លើសពីគ្លីនិកឯកជននានា និងមន្ទីរពេទ្យរដ្ឋ ថែមទាំងមានការរើសអើងចំពោះអ្នកជំងឺ ដែលខ្សត់ខ្យោយលុយកាក់ ឬបដិសេធមិនទទូលព្យាបាល ជនរងគ្រោះដែលជួបគ្រោះថ្នាក់ចរាចរណ៍នៅពេលយប់ទៀតផង បើទោះជារថយន្តសង្គ្រោះរបស់មន្ត្រីចរាចរណ៍ដឹកជនរងគ្រោះចូលដល់ក្នុងមន្ទីពេទ្យហើយក្ដី ។
ជាក់ស្ដែង កាលពីវេលាម៉ោងប្រហែល១១យប់ថ្ងៃទី១១ សីហា រថយន្តសង្គ្រោះរបស់សមត្ថកិច្ចចរាចរណ៍ខេត្ត បានដឹកបុរសម្នាក់ដែលត្រូវរថយន្តបុកបាក់ជើងម្ខាង និងរបួសបែកក្បាលជាទម្ងន់ចូលទៅក្នុងមន្ទីរពេទ្យនេះ ដើម្បីសង្គ្រោះបន្ទាន់ តែត្រូវគ្រួពេទ្យប្រចាំការបដិសេធមិនទទូលព្យាបាលឡើយ។ ហើយថែមទាំងបណ្ដេញឱ្យសមត្ថកិច្ចដឹកជនរងគ្រោះទៅកាន់មន្ទីរពេទ្យខេត្តទាំងកណ្ដាលអាធ្រាត្រទៀត បើទោះជាសមត្ថកិច្ចដឹកចូលដល់ស្នើឲ្យជួយសង្គ្រោះបន្ទាន់បណ្ដោះអាសន្នសិនក្ដី។
មន្ត្រីចរាចរណ៏ខេត្តបាននិយាយថា បុគ្គលិកពេទ្យនេះបានសួររកសាច់ញាតិជនរងគ្រោះ ពេលដឹកជនរងគ្រោះទាំងសន្លប់ស្ដូកជោកជាំទៅដោយឈាមចូលដល់មន្ទីរពេទ្យភ្លាម ខណៈសមត្ថកិច្ចមិនទាន់ទាំងស្គាល់អត្តសញ្ញាណជនរងគ្រោះផង។ មន្ត្រីដដែលបន្តថា គ្រូពេទ្យបាននិយាយថា បើគ្មានសាច់ញាតិជនរងគ្រោះមកជាមួយទេ ពួកគេមិនអាចទទូលព្យាបាលអ្នករបួសឡើយ។ នៅពេលមន្ត្រីចរាចរណ៏ស្នើរសុំឲ្យគ្រួពេទ្យជួយសង្គ្រោះបន្ទាន់ បែរជាគ្រួពេទ្យនោះនិយាយមកកាន់សមត្ថកិច្ចវិញថា«បើចង់ឲ្យអ្នករបួសសំរាកព្យាបាល ទាល់តែសមត្ថកិច្ចដេកកំដរ» ហើយបណ្ដេញឲ្យមន្ត្រីចរារចណ៏ដឹកអ្នករបួសនោះទៅកាន់មន្ទីរពេទ្យបង្អែកខេត្តតែម្ដង។ មន្ត្រីចរាចរណ៏បញ្ជាក់ថា សមត្ថកិច្ចមិនទាន់ស្គាល់ជនរងគ្រោះនោះទេភ្លាមៗនោះ។ ជនរងគ្រោះត្រូវរថយន្តមិនស្គាល់ម៉ាកបុកបាក់ជើងខាងស្ដាំចេញឆ្អឹង និងបែកក្បាលរបួសធ្ងន់ធ្ងរសន្លប់មិនដឹងខ្លួន ទើបសមត្ថកិច្ចបញ្ជូនទៅសង្គ្រោះបន្ទាន់នៅមន្ទីរពេទ្យនេះ បែរជាបុគ្គលិកពេទ្យនេះមិនទទូលព្យាបាលទៅវិញ? ករណីបែបនេះកើតមានច្រើនលើកហើយ។
កោះសន្តិភាពមិនអាចស្វែងរកការបំភ្លឺណាមួយពីអ្នកគ្រប់គ្រង ឬ ផ្នែករដ្ធបាលនៃមន្ទីរពេទ្យអង្គការនេះបានទេ នៅរសៀលថ្ងៃទី១២សីហា២០១៥។ ប៉ុន្តែប្រធានមន្ទីរសុខាភិបាលខេត្តលោកវឿង ប៊ុនរ៉េត បានបញ្ជាក់ប្រាប់កោះសន្តិភាពអំពីបញ្ហានេះថា ពិតជាមានបញ្ហាខ្លះៗកើតមាននៅក្នុងមន្ទីរពេទ្យអង្គការមួយនេះមែន។ លោកថា លោកកំពុងចាប់អារម្មណ៏ចំពោះតំលៃសេវ៉ាព្យាបាលរបស់មន្ទីរពេទ្យនេះ ព្រោះលោកក៏ទទូលបានអំពីការរិះគន់ទាំងនេះដែរ។
លោកវឿង ប៊ុនរ៉េត បានថ្លែងថា មន្ទីរពេទ្យនេះជាមន្ទីរពេទ្យអង្គការ ហើយដំបូងឈ្មោះថា មន្ទីរពេទ្យ«EMERGENCY» ដែលមានគ្រួពេទ្យជំនាញខ្លាំងៗមកពីបរទេសគ្រប់ជាតិសាសន៏បំរើការ។ ប៉ុន្តែដោយសារផុតគម្រោងចាស់ មន្ទីរពេទ្យនេះក៏ទទូលបានគម្រោងថ្មី ដែលផ្ដល់ដោយជនជាតិជប៉ុន ហើយប្ដូរឈ្មោះថ្មីជាមន្ទីរពេទ្យ«HANDA-EMERGENCY»វិញ តែជាមន្ទីរពេទ្យអង្គការដដែល។
លោកប្រធានមន្ទីរបានបញ្ជាក់ថា ភាពមិនប្រក្រតីនៃមន្ទីរពេទ្យនេះបានលេចឮយូរដែរហើយ ជាពិសេសតំលៃសេវ៉ាព្យាបាល ហើយលោកក៏បានជួបពិភាក្សាជាមួយអ្នកគ្រប់គ្រងមន្ទីរពេទ្យនេះខ្លះៗហើយដែរ។ ប៉ុន្តែលោកនឹងអញ្ជើញអ្នកគ្រប់គ្រង ឬ មន្ត្រីទទូលខុសត្រូវនៃមន្ទីរពេទ្យអង្គកានេះ មកពិភាក្សាជាបន្តទៀតអំពីបញ្ហាសេវាព្យាបាលនេះ ដើម្បីរៀបចំឲ្យមានភាពជាក់លាក់ ចៀសវាងកុំឲ្យមានការលេចឮនូវភាពមិនប្រក្រតិគ្រប់បែបយ៉ាងបែបនេះទៀត ។
ចែករំលែកព័តមាននេះ