ភ្នំពេញ៖ បុរសម្នាក់ ជិះម៉ូតូលឿន មិនប្រយ័ត្ន បានបុករថយន្តកុងតឺន័រពីក្រោយ​ពេញទំហឹង បណ្តាលឲ្យជនរងគ្រោះ របួសធ្ងន់។ ចំណែកឯរថយន្តកុងតឺន័រនោះ ចត​នៅកៀនផ្លូវ ក្រោយកើតហេតុ អ្នកបើកបរ បានបើកចេញទៅបាត់។

ហេតុការណ៍នេះ បានកើតឡើង កាលពីវេលាម៉ោង ៩ និង ២០នាទី យប់ថ្ងៃទី១១ ខែកុម្ភៈ ឆ្នាំ២០២១ នៅតាមបណ្តោយ​មហាវិថីឈ្នះឈ្នះ ហៅផ្លូវ​ទំនប់កប់ស្រូវ ក្នុង​ភូមិជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ​។

ជនរងគ្រោះ មិនបានស្គាល់អត្តសញ្ញាណទេ ជិះម៉ូតូម៉ាក ហុងដាឌ្រីម ពណ៌ខ្មៅ ពាក់ស្លាកលេខ ភ្នំពេញ1GC- 8981 បើកក្នុងទិសដៅពីជើងទៅត្បូង។

ប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញរថយន្តកុងតឺន័រមួយគ្រឿង ក្បាលពណ៌ខៀវ ដោយមិនចាំស្លាកលេខ ​ឈប់ចត នៅតាមបណ្តោយមហាវិថីឈ្នះឈ្នះ ក្នុងទិសដៅពីជើងទៅត្បូង លុះបន្ទាប់មក ក៏ស្រាប់តែឃើញជនរងគ្រោះជិះម៉ូតូម៉ាកហុងដាឌ្រីម ស៊េរីឆ្នាំ​២០១៦ ក្នុងទិសដៅពីជើងទៅត្បូង ក្នុងល្បឿនយ៉ាងលឿនដោយមិនបានមើលមុខ បានបុករថយន្តកុងតឺន័រពីក្រោយ បណ្តាលឲ្យរងរបួសធ្ងន់ ឈាមហូរស្រោច​ពេញខ្លួន​។

ប្រភពព័ត៌មានបានបន្តទៀតថា ខណៈពេលភ្លាមៗនោះ រថយន្តកុងតឺន័រ ត្រូវបានអ្នកបើកបរ​ឡើងបើក ចេ​ញទៅបាត់ស្រមោល​។ ចំណែកជនរងគ្រោះ ត្រូវបានមន្ទីរពេទ្យឯកជនសម្ភពរស្មី បានដឹកយកទៅសង្គ្រោះភ្លាមៗ។ តែដោយសារតែជនរងគ្រោះរងរបួសធ្ងន់ពេកមន្ទីរពេទ្យឯកជននេះ បានបញ្ជូនជនរងគ្រោះទៅសង្គ្រោះបន្ទាន់នៅមន្ទីរពេទ្យព្រះកុសុមៈ​។

ចំណែក​នគរបាលប៉ុស្តិ៍ចោមចៅទី៣ បានទាក់ទងទៅផ្នែកជំនាញ​ចរាចរណ៍​ខណ្ឌពោធិ៍សែនជ័យ ​មកវាស់វែងនៅទីតាំងកន្លែងកើតហេតុ និងបាន​យកម៉ូតូជន​រងគ្រោះ ទៅរក្សាទុក ដើម្បីស៊ើបអង្កេតរករថយន្តកុងតឺន័រ ដែលឈប់ចត​ បណ្តាល​ឲ្យមានគ្រោះថ្នាក់នេះ ដើម្បី​ដោះស្រាយជាមួយភាគីរងគ្រោះ​៕ ដោយ៖ យឹម ឈឿន