ខេត្តបន្ទាយមានជ័យ ៖ សត្វជ្រូករស់ដែលឈ្មួញលួចដឹកតាមប្រករបៀងចំនួន៣០ក្បាលដែលនាំចូលពីប្រទេសថៃនោះ ត្រូវបានមន្ទីរពិសោធន៍ពិនិត្យរកឃើញថា មានជំងឺប៉េស្តអាហ្វ្រិច ហើយត្រូវបានមន្ត្រីជំនាញយកទៅធ្វើការដុតកំទេចចោលអស់ហើយ នៅព្រឹកថ្ងៃទី១២ ខែកុម្ភៈ ឆ្នាំ២០២១នេះ នៅចំណុច…
ខេត្តបន្ទាយមានជ័យ ៖ សត្វជ្រូករស់ដែលឈ្មួញលួចដឹកតាមប្រករបៀងចំនួន៣០ក្បាលដែលនាំចូលពីប្រទេសថៃនោះ ត្រូវបានមន្ទីរពិសោធន៍ពិនិត្យរកឃើញថា មានជំងឺប៉េស្តអាហ្វ្រិច ហើយត្រូវបានមន្ត្រីជំនាញយកទៅធ្វើការដុតកំទេចចោលអស់ហើយ នៅព្រឹកថ្ងៃទី១២ ខែកុម្ភៈ ឆ្នាំ២០២១នេះ នៅចំណុច ភូមិខ្លាកូនថ្មី សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ។
ពិធីខាងលើនេះក៏មានការពីចូលរួមលោក ហ៊ុន សារ៉ាត់ ប្រធានក្រុមការងារត្រួតពិនិត្យ និងបង្ក្រាបបទល្មើសចលនាសត្វ លោកហ៊ុយ ទូច ប្រធានការិយាល័យបសុពេទ្យ លោកតេង សាម៉ៃ ព្រះរាជអាជ្ញារងខេត្តបន្ទាយមានជ័យ និងមន្ត្រីពាក់ព័ន្ធជាច្រើនរូបទៀត។
គួរបញ្ជាក់ផងដែរថា នៅយប់ថ្ងៃទី៧ ខែកុម្ភៈ កន្លងទៅនេះ ក្រុមការងារអន្តរាគមន៍បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ ក្រសួងកសិកម្ម រុក្ខាប្រមាញ់ និងនេសាទ សហការជាមួយការិយាល័យផលិតកម្ម និងបសុព្យាបាលនៃមន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ ព្រមទាំងកម្លាំងអធិការដ្ឋាននគរបាល ស្រុកស្វាយចេក និងនគរបាលប្រឆាំងបទល្មើសសេដ្ឋកិច្ចនៃស្នងការដ្ឋានខេត្តបន្ទាយមានជ័យ បានចុះឆ្មក់ស្ទាក់ចាប់បទល្មើសផលិតកម្មសត្វបាន២ករណី ៖
ករណីទី១- បង្ក្រាបរថយន្តម៉ាកសាំងយ៉ុងពណ៌ទឹកប្រាក់ ជាប្រភេទរថយន្តដឹកអ្នកដំណើ១៥កៅអី ពាក់ស្លាកលេខភ្នំពេញ 2Q-2123 ដឹកសត្វជ្រូករស់ចំនួន២០ក្បាល។ដែលរថយន្តខាងលើនេះ បាននាំចូលសត្វជ្រូករស់មកពីប្រទេសថៃ តាមច្រករបៀងអូរបីជាន់ ឃុំអូរបីជាន់ស្រុកអូរជ្រៅ ខេត្តបន្ទាយមានជ័យ ។ ការនាំចូលសត្វជ្រូក និងការដឹកជញ្ជូននោះ គ្មានលិខិតអនុញ្ញាតអ្វីទាំងអស់ ។
ចំណែកករណីទី២- កាលពីម៉ោង៧និង៣២នាទីព្រឹកថ្ងៃទី៧ ខែកុម្ភៈ ឆ្នាំ២០២១ សមត្ថកិច្ចបានឃាត់គោយន្ត១គ្រឿងដឹកសត្វជ្រូករស់ចំនួន១០ក្បាលបាននាំចូលសត្វជ្រូករស់មកពីប្រទេសថៃ តាមច្រករបៀងចំការគ ក្នុងភូមិចម្ការគ ឃុំចម្ការគ ស្រុកស្វាយចេក ខេត្តបន្ទាយមានជ័យ ដោយគ្មានលិខិតអនុញ្ញាតអ្វីទាំងអស់។
បទល្មើសទាំង២ករណីខាងលើនេះ សមត្ថកិច្ចបានយកទៅរក្សាទុកនៅទីតាំងចត្តាឡីស័កសត្វនៃមន្ទីរកសិកម្ម រុក្ខាប្រមាញ់ និងនេសាទ ខេត្តបន្ទាយមានជ័យ ដើម្បីចាត់ការទៅតាមនីតិវិធីច្បាប់។
បន្ទាប់ពីមន្ត្រីជំនាញយកសំណាកឈាមជ្រូកទៅពិនិត្យនៅវិទ្យាស្ថានជាតិស្រាវជ្រាវសុខភាពសត្វនិងផលិតកម្មនៃអគ្គនាយកដ្ឋានសុខភាព និងផលិតកម្មសត្វនោះ ជាលទ្ធផលនៅថ្ងៃទី៩ ខែកុម្ភៈ ឆ្នាំ២០២១ រកឃើញថា វិជ្ជមានជំងឺប៉េស្តជ្រូកអាហ្វ្រិច ។
ករណីខាងលើនេះ អគ្គនាយកដ្ឋានសូមជម្រាបជូនដល់សាធារណជន អ្នកចិញ្ចឹមសត្វ ជាពិសេសអ្នកចិញ្ចឹមជ្រូក និងអ្នកពិឃាតសត្វនូវវិធានការបន្ទាន់ដូចខាងក្រោម ៖
១/-អគ្គនាយកដ្ឋានសុខភាព និងផលិតកម្មសត្វនឹងចុះសហការជាមួយសមត្ថកិច្ចពាក់ព័ន្ធ ដើម្បីកម្ទេចវត្ថុតាងបទល្មើសជាក់ស្តែងទៅតាមវិធានបសុព្យបាល។
២/-ការិយាល័យផលិតកម្ម និងបសុព្យាបាលរាជធានី-ខេត្ត ត្រូវពង្រឹងការគ្រប់គ្រងត្រួតពិនិត្យ និងបង្ក្រាបបទល្មើសចលនាសត្វខុសច្បាប់ឱ្យមានប្រសិទ្ធខ្ពស់
៣/-កសិករ ពាណិជ្ជករ ជាអ្នកចិញ្ចឹមជ្រូកត្រូវមានវិធានការជីវសុវត្ថិភាពកន្លែងចិញ្ចឹមសត្វជាប្រចាំដើម្បីជៀសវាងការចម្លងជំងឺប៉េស្តជ្រូកអាហ្វ្រិច និងជំងឺផ្សេងទៀត ។
៤/-គ្រប់សត្តឃាតដ្ឋានរាជធានី-ខេត្តត្រូវសហការជាមួយមន្ត្រីមានសមត្ថកិច្ចធ្វើជីវសុវត្ថិភាពជាប្រចាំ និងត្រូវទិញជ្រូករស់ពីក្រុមហ៊ុនស្របច្បាប់ដែលចេញដោយក្រសួងកសិកម្មមកធ្វើពិឃាត។
៥/-អាជីវករ ពណិជ្ជករ ឬក្រុមហ៊ុននាំចូលសត្វរស់ទាំងអស់ត្រូវគោរពឲ្យបាខ្ជាប់ខ្ជួនននូវគោលការណ៍ណែនាំ និងវិធានការអនាម័យសត្វរបស់អគ្គនាយកដ្ឋាននូវគោលការណ៍បច្ចេកទេស១២ចំណុចសម្រាប់អ្នកនាំចូល និងនាំឆ្លងកាត់ ជាពិសេសចំណុចទី១២ ដែលតម្រូវឱ្យក្រុមហ៊ុនមានទីតាំងធ្វើចត្តាឡីស័កនៅចុងទីនៃប្រទេសនាំចេញ ដើម្បីងាយស្រួលដល់មន្ត្រីបច្ចេកទេសត្រួតពិនិត្យមុននាំចូល ឬនាំឆ្លងកាត់ទៅប្រទេសផ្សេងទៀត ដែលបច្ចុប្បន្នមានតែក្រុមហ៊ុនមួយចំនួនប៉ុណ្ណោះ ដែលបានបំពេញលក្ខខណ្ឌនេះ។
លក្ខខណ្ឌទាំងអស់នេះ គឺដើម្បីជៀសវាងនូវការនាំជំងឺសត្វឆ្លងដែនមកបំផ្លាញសេដ្ឋកិច្ចជាតិ និងសេដ្ឋកិច្ចគ្រួសារ ក៏ដូចជាសហគមន៍អ្នកចិញ្ចឹមសត្វនៅក្នុងព្រះរាជាណាចក្រកម្ពុជា ។
៦/-ប្រសិនបើសាធារណជនបានដឹង ឬបានឃើញជាក់ស្តែងនូវការនាំចូលសត្វខុសច្បាប់ សូមជូនដំណឹងមកលោក ហ៊ុន សារ៉ាត់ ប្រធានក្រុមការងារត្រួតពិនិត្យ និងបង្ក្រាបបទល្មើសចលនាសត្វតាមរយៈទូរស័ព្ទ ០១២ ៨២៨ ២០៩ ៕
ចែករំលែកព័តមាននេះ