រាជធានីភ្នំពេញ ៖ នារីវ័យក្មេងម្នាក់បានបើករថយន្តម៉ាកព្រុសមួយគ្រឿងទំនងជាមិនមានការប្រុងប្រយត្ន័ក៏បានរេចង្កូតទៅបុកចំជ្រុងក្បាលនាគថ្មពុះចែកទ្រូវផ្លូវមួយដែលត្រូវបានគេបុក ឬប៉ះពីមុនស្រាប់ហើយមិនបានដាក់ឲ្យបានត្រឹមត្រូវត្រង់ជួរដូចដើមវិញនោះ និងបណ្តាលឲ្យរថយន្តដាច់កាឡេកង់ម្ខាង និងក្រពឹតផ្នែងខាងមុខរងការខូចខាតយ៉ាងដំណំ ហើយត្រូវបានសមត្ថកិច្ចស្ទូចយកទៅកាន់ការិយាល័យនគរបាលចរាចរ៍ផ្លូវគោករាជធានី។
ហេតុការគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១១ និង៤៥នាទីព្រឹក ថ្ងៃទី១0 ខែកុម្ភៈ ឆ្នាំ២០២១ នៅចំណុចក្បែរស្តុបបូកគោ ផ្លូវព្រះមុនីវង្ស ក្នុងសង្កាត់ទន្លេបាសាក់ ខណ្ឌចំការមន។ តាមប្រភពព័ត៌មានបានប្រាប់ឱ្យដឹងថា រថយន្តបង្កម៉ាកតូយ៉ូតាព្រុស ពណ៌ខ្មៅ ពាក់ស្លាកលេខ ភ្នំពេញ ២BD-៧៨០៦ ដាច់កាឡេកង់ម្ខាង និងក្រពឹតផ្នែកចំហៀងខាងមុខរងការខូចខាតយ៉ាងដំណំខ្លួនឯង ចំណែកឯក្បាលនាគពុះចែកទ្រូវផ្លូវគ្រាន់តែកិលបន្ថែមចេញពីកន្លែងចាស់ដែលត្រូវគេបុក ឬប៉ះពីមុនមកបន្តិចប៉ុណ្ណោះ។
មុនពេលកើតហេតុ គេបានឃើញនារីវ័យក្មេងម្នាក់បានបើកបររថយន្តម៉ាកព្រុសមូយគ្រឿងខាងលើ តាមបណ្តោយផ្លូវព្រះមុនីវង្សក្នុងទិសដៅពីត្បូងមកស្តុបបូកគោ។ លុះមកដល់ចំណុចកើតហេតុខាងលើក៏បានរេចង្កូតទៅប៉ះនឹងជ្រុងក្បាលនាគពុះចែកទ្រូងផ្លូវខាងលើ ដែលទំនងជាមានរថយន្តផ្សេងគេប៉ះស្រាប់ហើយមិនបានរុញដាក់វិញឲ្យបានត្រឹមត្រូវដូចដើមវិញនោះ បណ្តាលឲ្យរថយន្តដាច់កាឡេកង់ និងក្រពឹតរងការខូចខាតតែម្តង។ ក្រោយពេលកើតហេតុ កម្លាំងមានសមត្ថកិច្ចមូលដ្ឋានខណ្ឌចំការមន បានចុះមកដល់ហើយប្រគល់ឲ្យខាងការិយាល័យនគរបាលចរាចរណ៍ផ្លូវគោករាជធានីភ្នំពេញហៅរថយន្តស្ទូចមកស្ទូចយកទៅរក្សាទុក ដើម្បីរង់ចាំធ្វើការដោះស្រាយផងដែរ៕ ដោយ ៖ ភី ផល
ចែករំលែកព័តមាននេះ