ខេត្តបាត់ដំបង៖ លោកឧត្តមេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង អនុប្រធានក្រុមការងារថ្នាក់ជាតិចុះជួយស្រុកមោងឫស្សី និងជាប្រធានក្រុមការងារថ្នាក់ជាតិ ចុះជួយឃុំរបស់មង្គល បានអញ្ជើញចូលរួម ក្នុងពិធីចែកអំណោយដល់ប្រជាពលរដ្ឋចំនួន…
ខេត្តបាត់ដំបង៖ លោកឧត្តមេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង អនុប្រធានក្រុមការងារថ្នាក់ជាតិចុះជួយស្រុកមោងឫស្សី និងជាប្រធានក្រុមការងារថ្នាក់ជាតិ ចុះជួយឃុំរបស់មង្គល បានអញ្ជើញចូលរួម ក្នុងពិធីចែកអំណោយដល់ប្រជាពលរដ្ឋចំនួន ៤៣៩គ្រួសារ ដែលរងគ្រោះដោយទឹកជំនន់ នាពេលកន្លងទៅ។
ពិធីជួបជុំនេះ បានធ្វើឡើង នៅព្រឹកថ្ងៃទី១០ ខែកុម្ភ: ឆ្នាំ២០២១ ក្នុងបរិវេណវត្តអន្លង់ត្រាច ស្ថិតក្នុងភូមិអន្លង់ត្រាច ឃុំរបស់មង្គល ស្រុកមោងឫស្សី ខេត្តបាត់ដំបង។ អំណោយទាំងនេះ ទទួលបានតាមរយៈអង្គការប្រតិបត្តិការកុមារកម្ពុជា ដែលមានលោកស្រី ទិត្យ សាដារី ជានាយិការរបស់អង្គការនេះ។
លោកឧត្តមេនីយ៍ទោ សាត គឹមសាន បាននាំនូវការផ្តាំផ្ញើសាកសួរសុខទុក្ខពីសំណាក់សម្តេចក្រឡាហោម ស ខេង ឧបនាយករដ្ឋមន្រ្តីរដ្ឋមន្រ្តីក្រសួងមហាផ្ទៃ ឯកឧត្តម នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ ឯកឧត្តម ងួន រតនៈ អភិបាលនៃគណៈអភិបាលខេត្តបាត់ដំបង ព្រមទាំងឯកឧត្តម ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ ដែលឯកឧត្តម ធ្លាប់ទទួលភារកិច្ចជាប្រធានក្រុមការងារថ្នាក់ជាតិ ចុះជួយឃុំរបស់មង្គល ស្រុកមោងឫស្សី ខេត្តបាត់ដំបង នាពេលកន្លងទៅ។
លោកឧត្តមសេនីយ៍ទោស្នងការ បានអំពាវនាវដល់ប្រជាពលរដ្ឋ សូមចូលរួមអនុវត្តនូវគោលនយោបាយ ស្តីពី ភូមិ ឃុំសង្កាត់មានសុវត្ថិភាព ដែលក្នុងនោះ ផ្តោតសំខាន់បញ្ហាគ្រឿងញៀន ដែលក្រុមគ្រួសារនីមួយៗ ត្រូវអប់រំណែនាំសមាជិកគ្រួសាររបស់ខ្លួន ឱ្យចៀសឆ្ងាយពីគ្រឿងញៀន។ ជាមួយនេះ សូមចូលរួមគោរព និងអនុវត្តឱ្យបានទាំងអស់គ្នានូវច្បាប់ចរាចរណ៍ផ្លូវគោក ពិសេសបងប្អូន ដែលប្រើប្រាស់ផ្លូវ។
ដោយឡែកបញ្ហាគ្រោះអគ្គិភ័យ ក៏លោកស្នងការ សូមឲ្យប្រជាពលរដ្ឋ ប្រុងប្រយ័ត្ន ដោយសាររដូវនះ ជារដូវប្រាំងហួតហែង។ ដូច្នេះសូមមេត្តាប្រុងប្រយ័ត្នខ្ពស់ចំពោះគ្រោះអគ្គិភ័យដែលអាចកើតឡើង តាមលំនៅដ្ឋាន ទាំងភ្លើងចង្ក្រាន្ត ភ្លើងទៀនធូប ចរន្តអគ្គិសនី ឬភ្លើងព្រៃ ដែលអាចឆាបឆេះរាលដាល ដល់លំនៅដ្ឋាន។
លោក បានបន្ថែមទៀតថា នេះជាលើកទី២ ដែលកាលពីថ្ងៃទី៨ ខែកុម្ភៈ ឆ្នាំ២០២១ ប្រជាពលរដ្ឋចំនួន ១១ភូមិ ក្នុងឃុំរបស់មង្គល ស្រុកមោងឫស្សី ចំនួន ៦៦៩គ្រួសារ បានទទួលអំណោយពីអង្គការខាងលើនេះរួចហើយ តែដោយសារស្ថានភាពផ្លូវលំបាកក្នុងការធ្វើដំណើរទើប ថ្ងៃនេះប្រជាពលដ្ឋនៅភូមិអន្លង់ត្រាច ដែលនៅឆ្ងាយជាងគេ ទទួលបានជំនួយ នៅក្នុងពេលនេះ។
ជាមួយនេះ លោកក៏បានអំពាវនាវដល់ប្រជាពលរដ្ឋទាំងអស់ សូមចូលរួមបង្ការទប់ស្កាត់ និងការពារខ្លួនពីបញ្ហាជំងឺឆ្លង COVID-19 សូមប្រជាពលរដ្ឋអនុវត្តឱ្យបានតាមការណែនាំរបស់ក្រសួងសុខាភិបាល ការធ្វើអនាម័យជាប់ជាប្រចាំ។
គ្រួសារ ដែលត្រូវទទួលអំណោយ នៅពេលនេះ គឺមួយគ្រួសារៗ ទទួលបាន៖ អង្ករចំនួន ២៥គីឡូក្រាម មីចំនួន០១កេសតូច ត្រីខកំប៉ុងចំនួន០១យួរ ទឹកត្រីចំនួន០១យួរ ទឹកសីអីវចំនួន ០១យួរ អំបិលអនាម័យចំនួន ០១គីឡូក្រាម ស្ករសចំនួន ០១គីឡូក្រាម និងប្រេងឆាចំនួន ០១ដប៕ ដោយ៖ ហួត សុងហាក់
ចែករំលែកព័តមាននេះ