ខេត្តកោះកុង ៖ ភ្នំ«តាមីន» គឺជាឈ្មោះភ្នំមួយដែលទើបនឹងដាក់ឈ្មោះថ្មី ។ ភ្នំនេះសព្វថ្ងៃស្ថិតនៅក្នុងឃុំខ្លងយ៉ៃ ស្រុកខ្លងយ៉ៃ ជាប់នឹងព្រំប្រទល់ខេត្តត្រាត ប្រទេសថៃ បន្តភ្ជាប់ដោយជួរភ្នំដ៏វែងអន្លាយនៅតាមបន្ទាត់ព្រំដែនកម្ពុជា-ថៃ…
ខេត្តកោះកុង ៖ ភ្នំ«តាមីន» គឺជាឈ្មោះភ្នំមួយដែលទើបនឹងដាក់ឈ្មោះថ្មី ។ ភ្នំនេះសព្វថ្ងៃស្ថិតនៅក្នុងឃុំខ្លងយ៉ៃ ស្រុកខ្លងយ៉ៃ ជាប់នឹងព្រំប្រទល់ខេត្តត្រាត ប្រទេសថៃ បន្តភ្ជាប់ដោយជួរភ្នំដ៏វែងអន្លាយនៅតាមបន្ទាត់ព្រំដែនកម្ពុជា-ថៃ ។ នេះបើតាមវរសេនីយ៍ត្រី ស៊ុម សាខន មេបញ្ជាការវរៈលេខ០៣ ឈរជើងនៅលើកំពូលភ្នំ៣២៩ តាមព្រំដែនកម្ពុជា-ថៃ ប្រាប់ឲ្យដឹង ។
បើយើងចង់ទៅកាន់ភ្នំតាមីន កាលពីមុនយើងអាចធ្វើដំណើរទៅបានតែតាមផ្លូវទឹកប៉ុណ្ណោះ គឺទៅតាមស្ទឹងមេទឹក តែឥឡូវនេះគេច្រើនតែធ្វើដំណើរតាមផ្លូវគោកវិញងាយស្រួលជាងផ្លូវទឹក ។ បើយើងចេញដំណើរពីក្រុងខេមរភូមិន្ទ (ទីរួមខេត្តកោះកុង) យើងត្រូវឆ្លងស្ពានកោះកុងដែលមានប្រវែង១.៩០០ម៉ែត្រ សំដៅទៅទិសខាងលិច រួចបន្តដំណើរទៅតាមផ្លូវលេខ៤៨ ទៅដល់ព្រំប្រទល់ច្រកទ្វារចាំយាម ត្រូវបត់ស្ដាំ ទៅតាមផ្លូវក្រួសក្រហមមួយខ្សែដែលជាផ្លូវទើបនឹងឈូសឆាយធ្វើថ្មីនៅឆ្នាំ២០០៩ ។
ផ្លូវនេះជាគំនិតផ្ដួចផ្ដើមរបស់នាយឧត្តមសេនីយ៍ យន្តមីន រដ្ឋលេខាធិការក្រសួងការពារជាតិ ដែលលោកគឺជាអតីតមេបញ្ជាការតំបន់ប្រតិបត្តិការសឹករងកោះកុង ដោយមានការគាំទ្រចង្អុល
បង្ហាញពីនាយឧត្តមសេនីយ៍ គន់ គីម ដែលកាលណោះជាអតីតជាគណៈពង្រឹងទិសសមរភូមិតាមបន្ទាត់ព្រំដែនកម្ពុជា-ថៃ និងការជួយឧបត្ថម្ភគាំទ្រពីឧកញ៉ា លី យ៉ុងផាត់ នូវប្រេងម៉ាស៊ូតចំនួន១០ម៉ឺនលីត្រ និងមានកិច្ចសហការជាមួយកងវិស្វកម្មអគ្គបញ្ជាការ ។ ផ្លូវនេះមានប្រវែង២២គីឡូម៉ែត្រ ចាប់ពីចំណុច y៨៨ ភូមិថ្មីចាំយាមរហូតទៅដល់ចំណុចY0៣ គីរីវង្សហើយធ្វើដំណើរបន្តឡើងទៅលើភ្នំតាមផ្លូវមួយខ្សែទៀត ដែលជាផ្លូវកសាងឡើងដោយឯកឧត្តម យន្ត មីន សហការជាមួយក្រសួងកសិកម្មរុក្ខាប្រមាញ់ និងនេសាទ ។
លោក សុ៊ម សាខន បានរំឭកថា ភ្នំ៣២៩ ឬហៅថា«ភ្នំតាមីន» ដែលកាលណោះវរសេនីយ៍ឯក យន្ត មីន ជាមេបញ្ជាការតំបន់ប្រតិបត្តិការសឹករងកោះកុង លោកបានឈ្វេងយល់ថា ភ្នំនេះគឺជាទីតាំងយុទ្ធសាស្ត្រមួយដ៏សំខាន់បំផុតសម្រាប់កងទ័ព ដូចនេះលោកបានចិញ្ចឹមចិត្តមួយថានឹងយកភ្នំនេះពីភាគីថៃមកវិញឲ្យទាល់តែបាន ទើបលោកមេបញ្ជាការបានខិតខំរិះរកគ្រប់យុទ្ធសាស្ត្រដើម្បីយកភ្នំនេះមកវិញ ព្រោះស្ថិតក្នុងបូរណភាពទឹកដីកម្ពុជា ។
លោកប្រធានវរៈលេខ០៣ បានរំឭកទៀតថា នៅចុងឆ្នាំ១៩៨៩ ដល់ឆ្នាំ២០០៤ មានទាហានថៃចំនួន៦នាក់ បានឡើងមកឈរជើងប្រចាំការនៅលើកំពូលភ្នំនេះ ដោយធ្វើជាផ្ទះស្នាក់នៅចំនួន២ខ្នង និងមានដាំដើមដូង ខ្នុរ និងដោតទង់ជាតិថៃនៅលើខ្នងភ្នំនោះតែម្ដង ។ ដោយមើលឃើញថា កងទព័ថៃឡើងមកប៉ងកាន់កាប់ និងបោះទីតាំងនៅទីនោះដោយខុសច្បាប់ ព្រោះទីតាំងនៅលើកំពូលភ្នំស្ថិតក្នុងផែនទីនៃទឹកដីព្រះរាជាណាចក្រកម្ពុជា និងសារៈសំខាន់នៃកំពូលភ្នំជាយុទ្ធសាស្ត្រទៅអនាគតនោះ ទើបវរសេនីយ៍ឯក យន្ត មីន ដែលកាលណោះលោកជាមេបញ្ជាការតំបន់ប្រតិបត្តិការសឹករងកោះកុង បានរាយការណ៍ជូនអភិបាលខេត្តកោះកុង លោក យុទ្ធ ភូថង ព្រមទាំងថ្នាក់ដឹកនាំកងយោធពលខេមរភូមិន្ទតាមឋានានុក្រម ដើម្បីធ្វើយ៉ាងណាយកភ្នំ៣២៩ មកកាន់កាប់វិញ ។
ពេលនោះថ្នាក់ដឹកនាំគ្រប់លំដាប់ថ្នាក់ បានប្រគល់ភារកិច្ចជូនវរសេនីយ៍ឯក យន្ត មីន មេបញ្ជាការតំបន់ប្រតិបត្តិការសឹករងកោះកុង ចរចាគ្រប់វិធីសាស្ត្រ ហើយលោកមេបញ្ជាការបានប្ដេជ្ញាចិត្តជាមួយឧត្តមសេនីយ៍ទោ ម៉ៅ ឆែន នាយសេនាធិការរងកងទ័ពជើងគោក ដែលបានចុះមកត្រួតពិនិត្យភូមិសាស្ត្រនាខែកុម្ភៈ ឆ្នាំ២០០៣ ថា ដើម្បីការពារភូមិសាស្ត្រទីរួមខេត្តកោះកុងនិងខ្សែបន្ទាត់ព្រំដែន យើងត្រូវរំដោះយកភ្នំ៣២៩ ពីភាគីកងទ័ពថៃមកកាន់កាប់ឲ្យបានចេញពីការគ្រប់គ្រងរបស់ថៃវិញ ។
ប្រភពខាងលើបានបន្តទៀតថា ពេលនោះវរសេនីយ៍ឯក យន្ត មីន ក៏បានទាក់ទងជាមួយភាគីកងទ័ពថៃតាមរយៈការទូតជាលក្ខណៈមិត្តភាពឯកជន រវាងថ្នាក់ដឹកនាំកងទ័ពថៃដែលកំពុងឈរជើងលើកំពូលភ្នំដើម្បីទាមទារយកភ្នំ៣២៩ នេះត្រឡប់មកគ្រប់គ្រងវិញ និងដោយមានការគិតគូរយ៉ាងហ្មត់ចត់ ព្យាយាមជាសម្ងាត់ជាលក្ខណៈចង្អៀតបំផុតរវាងវរសេនីយ៍ឯក យន្ត មីន និងមេដឹកនាំយោធាថៃឲ្យដកកងទ័ពចេញពីលើកំពូលភ្នំ៣២៩ ដែលពួកគេកំពុងឈរជើង ។ ការចរចាដោយសន្តិវិធីរបស់លោកមេបញ្ជាការតំបន់ប្រតិបត្តិការសឹករងកោះកុង(បច្ចុប្បន្នជានាយឧត្តមសេនីយ៍ យន្ត មីន) ទទួលបានលទ្ធផលជាផ្លែផ្កា ដោយមិនមានការប្រយុទ្ធគ្នា ឬការបង្ហូរឈាមគ្នាឡើយ ។
នាថ្ងៃទី១០ ខែកក្កដា ឆ្នាំ ២០០៤ វរសេនីយ៍ឯក យន្ត មីន និងវរសេនីយ៍ទោ ចំរើន សាខន មេបញ្ជាការវរសេនាតូចលេខ៣០៣ បានដឹកនាំកងទ័ពចំនួន៥០នាក់ទៅកាន់កាប់ឈរជើងបង្ហូតទង់ជាតិនៃព្រះរាជាណាចក្រកម្ពុជា នៅលើកំពូលភ្នំ កន្លែងដែលកងទ័ពថៃធ្លាប់ឈរជើងវិញម្តង ។ ចាប់តាំងពីពេលនោះមក ភ្នំ៣២៩ត្រូវបានបងប្អូនប្រជាពលរដ្ឋហៅតៗគ្នាថា«ភ្នំតាមីន» រហូតមកដល់សព្វថ្ងៃ ។
វរសេនីយ៍ត្រីយ៍ ស៊ុម សាខន បានបញ្ជាក់ដែរថា បច្ចុប្បន្ននេះនៅលើកំពូល«ភ្នំតាមីន» មាន២កងអនុសេនាតូចឈរជើងការពារតំបន់«ភ្នំតាមីន»ដោយឈរជើងទល់មុខជាមួយភាគីកងទ័ពថៃកងអនុសេនាធំលេខ៥៣៦ ឈុតខ្មៅមានចម្ងាយ១៥០ម៉ែត្រពីគ្នា ជាប់ភូមិហាតលិក ឃុំហាតលិក ស្រុកខ្លងយ៉ៃ ខេត្តត្រាត ប្រទេសថៃ។ លោកប្រធានវរៈលេខ០៣ បានបន្តទៀតថា ភ្នំតាមីននេះមានលក្ខណៈពិសេស ការពារបានតាំងពីសម័យខ្មែរក្រហមរហូតមកដល់បច្ចុប្បន្ន ។
ភ្នំ៣២៩ ឬភ្នំតាមីន មានស្រះទឹកមួយកន្លែងសម្រាប់ឲ្យកងទ័ពយើងដែលឈរជើងនៅលើកំពូលភ្នំអាចប្រើប្រាស់ទឹកបានទាំងប្រាំងទាំងវស្សា ជាលក្ខណៈមួយងាយស្រួលក្នុងការប្រើប្រាស់ដល់កងទ័ពមកដល់សព្វថ្ងៃនេះ ។ នៅលើកំពូលភ្នំតាមីនគេឃើញមានចារឹកឈ្មោះថា «ភ្នំតាមីន»សូមស្វាគមន៍ និងតម្កល់នូវរូបសំណាកលោកមេទ័ពមុខ៨ ដែលមានបារមីមហិទ្ធិឫទ្ធិខ្លាំងពូកែស័ក្តិសិទ្ធ ដើម្បីជួយការពារភ្នំនេះតាមខ្សែបន្ទាត់ព្រំដែនក្នុងការការពារបូរណភាពទឹកដី និងថែរក្សាកងទ័ពដែលឈរជើងនៅលើភ្នំនោះ មានភាពសុខក្សេមក្សាន្តរហូតដល់សព្វថ្ងៃនេះ ។
លោកក៏បានបញ្ជាក់ដែរថា ការទាមទារយកភ្នំ៣២៩បានមកវិញពីភាគីថៃ ហើយមានចារឹកអក្សរ«ភ្នំតាមីន» គឺជាសម្បត្តិជាតិយើង មិនមែនជាកម្មសិទ្ធិរបស់បុគ្គលឡើយ ។
វរសេនីយ៍ត្រី ស៊ុម សាខន ដែលដឹកនាំអង្គភាពឈរជើងនៅលើខ្នងភ្នំតាមីននៃជួរភ្នំតាមបន្ទាត់ព្រំដែនកម្ពុជា-ថៃ បានឲ្យដឹងជាចុងក្រោយថា បច្ចុប្បន្ននេះនៅលើកំពូលភ្នំតាមីន មាន២កងអនុសេនាតូចឈរជើង ដែលមានភារកិច្ចការពារតំបន់«ភ្នំតាមីន» ដោយឈរជើងទល់មុខជាមួយភាគីថៃកងអនុសេនាធំលេខ៥៣៦ឈុតខ្មៅមានចម្ងាយ១៥០ម៉ែត្រពីគ្នា ដើម្បីការពារអធិបតេយ្យ បូរណភាពទឹកដីនៃព្រះរាជាណាចក្រកម្ពុជាយើង សូម្បីតែមួយមីល្លីម៉ែត្រក៏មិនឲ្យបាត់បង់នោះឡើយ ៕
ចែករំលែកព័តមាននេះ