(ភ្នំពេញ)៖ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលកម្ពុជា នៅយប់ថ្ងៃទី១០កុម្ភៈនេះ បានប្រកាសពីចំនួនសរុបនៃអ្នកមកចាក់វ៉ាក់សាំងកូវីដ១៩ នៅថ្ងៃទី១០ ខែកុម្ភ: ឆ្នាំ២០២១ គឺមានចំនួន ៤២៥នាក់ ( ស្រី ១០៤នាក់ )។ ក្នុងនោះ អ្នកបានចាក់វ៉ាក់សាំងរួច ចំនួន ៣៣៩នាក់ (ស្រី ៧៥នាក់)។ រីឯអ្នក ដែលគ្រូពេទ្យ មិនអនុញ្ញាតឲ្យចាក់ មានចំនួន ៨៦នាក់ (ស្រី ២៩នាក់ )។
យុទ្ធនាការចាក់វ៉ាក់សាំងកូវីដ១៩ ដល់ឥស្សរជន និងអ្នកមិនទាន់ចាក់វ៉ាក់សាំង ដែលក្រសួងបានប្រកាស កាលពីថ្ងៃទី៨កុម្ភៈ នឹងបន្តធ្វើនៅថ្ងៃទី១១កុម្ភៈ នៅតាមមន្ទីរពេទ្យរដ្ឋ ចំនួន ៤កន្លែងដដេល គឺនៅមន្ទីរពេទ្យកាល់ម៉ែត្រ មន្ទីរពេទ្យព្រះអង្គឌួង មន្ទីរពេទ្យមិត្តភាពខ្មែរ-សូវៀត និងមន្ទីរពេទ្យកុមារជាតិ។
នៅយប់ថ្ងៃទី១០កុម្ភៈ ក្រសួងសុខាភិបាល ក៏បានប្រកាសពីក្រុមច្រើនទៀត ដែលមានអាយុ ១៨ឆ្នាំ ដល់ ៥៩ឆ្នាំ សូមអញ្ជើញទៅចាក់វ៉ាក់សាំងកូវីដ១៩ នៅថ្ងៃទី១១ ខែកុម្ភៈ ឆ្នាំ២០២១ រួមមាន៖ គ្រូពេទ្យនៅមន្ទីរពេទ្យរដ្ឋ សមាជិកព្រឹទ្ធសភា រដ្ឋសភា និងអង្គរក្សថ្នាក់ដឹកនាំកំពូលៗ បុគ្គលិកមន្ត្រីរាជការព្រឹទ្ធសភា រដ្ឋសភា ទីស្តីការគណៈរដ្ឋមន្ត្រី ប៉ូលិសនៅក្រសួងមហាផ្ទៃ និងនៅរាជធានីភ្នំពេញ។
កម្មវិធីចាក់វ៉ាក់សាំងកូវីដ១៩នេះ នឹងបន្តធ្វើរៀងរាល់ថ្ងៃ នៅមន្ទីរពេទ្យកុមារជាតិ មន្ទីរពេទ្យកាល់ម៉ែត្រ មន្ទីរពេទ្យព្រះអង្គឌួង និងនៅមន្ទីរពេទ្យមិត្តភាពខ្មែរ-សូវៀត៕
ចែករំលែកព័តមាននេះ