ខេត្តប៉ៃលិន ៖ ក្រោយពីព្រះរាជអាជ្ញារង នៃសាលដំបូងខេត្តប៉ៃលិន (ប្តី) និងចៅក្រមជំនុំជម្រះក្តី (ប្រពន្ធ) បានចេញសាលក្រមចំនួន៣ដងខុសៗគ្នាត្រឡប់ត្រឡិន ហើយត្រូវបានសម្រេចឱ្យលោកបង់ប្រាក់ចំនួន៦លានរៀល និងជាប់ពន្ធនាគារចំនួន២ឆ្នាំ(ព្យួរ)…
ខេត្តប៉ៃលិន ៖ ក្រោយពីព្រះរាជអាជ្ញារង នៃសាលដំបូងខេត្តប៉ៃលិន (ប្តី) និងចៅក្រមជំនុំជម្រះក្តី (ប្រពន្ធ) បានចេញសាលក្រមចំនួន៣ដងខុសៗគ្នាត្រឡប់ត្រឡិន ហើយត្រូវបានសម្រេចឱ្យលោកបង់ប្រាក់ចំនួន៦លានរៀល និងជាប់ពន្ធនាគារចំនួន២ឆ្នាំ(ព្យួរ) បន្ទាប់ពីលោកបានផ្ញើសារទៅលោក លីម វាសនា ប្រធានពន្ធនាគារពាក់ព័ន្ធនឹងករណីបងប្អូនអ្នកទោសរអ៊ូរទាំរឿងរ៉ាវមិនប្រក្រតីធ្វើបាបអ្នកទោសក្នុងនោះក៏ត្រូវគេប្តឹងទៅតុលាការខេត្តតែម្តង។
ទើបរហូតមកដល់ពេលនេះ លោក ទឹម ស៊ីថន កើតទុក្ខមិនសុខចិត្ត ក៏ដាក់ពាក្យបណ្តឹងទៅឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ និងប្តឹងទៅលោកជំទាវ ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនង ជាមួយរដ្ឋសភាព្រឹទ្ធសភា និងអធិការកិច្ច។ បើតាមប្រភពព័ត៌មានពីលោក ទឹម ស៊ីថន អនុប្រធានទំនាក់ទំនងរដ្ឋសភា ព្រឹទ្ធសភា និងអធិការកិច្ចខេត្តប៉ៃលិន បានរៀបរាប់ឱ្យដឹងកាលពីរសៀលថ្ងៃទី១០ ខែកុម្ភៈ ឆ្នាំ២០២១នេះថា ៖
នៅក្នុងពាក្យបណ្តឹងលោក គឺសុំឱ្យមានការចាត់តាំងប្រតិភូអធិការកិច្ច របស់ក្រសួង សម្រាប់ការចុះតាមដានការអនុវត្តច្បាប់លើសំនុំរឿងព្រហ្មទណ្ឌលេខ៤១ ចុះថ្ងៃទី២០ ខែកុម្ភៈ ឆ្នាំ២០២០ ដែលមានភាពមិនប្រក្រតី និងមានព្រសនកម្ម ព្រមទាំងពិនិត្យភាពចាំបាច់ ក្នុងការចុះធ្វើអធិការកិច្ច លើភាពមិនប្រក្រតីនានា នៅក្នុងពន្ធនាគារខេត្តប៉ៃលិន។ លោកបន្តទៀតថា សូមឱ្យក្រសួងធ្វើតាមការចាំបាច់ សម្រាប់ការរកយុត្តិធម៌តាមច្បាប់ ធានាតម្លាភាព និងប្រសិទ្ធភាព ក្នុងរដ្ឋបាលសាធារណៈ ដោយលោកបាន និងកំពុងជួបនូវរឿងអយុត្តិធម៌មួយ ពីតុលាការខេត្តប៉ៃលិន ព្រមទាំងមានការគាបសង្កត់ការរំលោភដោយអំណាចពីអ្នកមានឥទ្ធិពលមួយចំនួននៅទីនោះផងដែរ។
លោកបញ្ជាក់ថា លោកតែងតែមានការទទួលខុសត្រូវជានិច្ច ទាំងតាមផ្លូវច្បាប់ ផ្លូវរដ្ឋបាល និងក្នុងជីវិតឯកជន មិនដែលប្រព្រឹត្តអ្វីខុសច្បាប់ ខុសគោលការណ៍ណែនាំនោះទេ។ ប៉ុន្តែកន្លងមកមានការចោទប្រកាន់រូបលោក តាមផ្លូវតុលាការ ចោទដោយបំពាន ខុសពីការពិត ដោយគោលបំណងជំរិតយកប្រយោជន៍ និងបំបាក់ផ្នែកសា្មរតី ជាលក្ខណ:បុគ្គល និងដល់អង្គភាព ជាមន្ត្រីអធិការកិច្ចផងដែរ។ លោកបញ្ជាក់បន្ថែមទៀតថា ភាពមិនប្រក្រតីរបស់ព្រះរាជអាជ្ញារងឈ្មោះ ជា សា (ប្តី) និងចៅក្រមជំនុំជម្រះក្តី ឈ្មោះ តាន់ គឹមហៀក (ប្រពន្ធ) ត្រូវជាមិត្តភក្តិជាមួយនឹងលោកប្រធានពន្ធនាគារខេត្តប៉ៃលិនឈ្មោះ លីម វាសនា។
នៅព្រឹកមុនពេលកើតហេតុ ខណៈពេលលោកទៅហូបកាហ្វេនៅក្នុងហាងមួយកន្លែងឈ្មោះ ប៉ៃលិនស៊ីធី ស្រាប់តែមានស្ត្រីម្នាក់ បានមកប្រាប់លោកថា គាត់មានបងប្អូនម្នាក់ជាប់នៅក្នុងពន្ធនាគារខេត្តប៉ៃលិន ត្រូវបានខាងប្រធានពន្ធនាគារធ្វើបាប ដោយទារឱ្យបង់លុយចំនួន៣លានរៀល ទើបឱ្យដេកសម្រាកនៅក្នុងបន្ទប់ទូលាយ បើមិនព្រមទេគឺឱ្យដេកក្នុងបន្ទប់ដែលចង្អៀត ២ម៉ែត្រ៤ជ្រុង អ្នកទោសចំនួន៨នាក់។ ពេលនោះបងប្អូនអ្នកជាប់គុកនោះក៏បានសុំអង្វរឱ្យលោកជួយអន្តរាគមន៍ គឺសុំលោក លីម វាសនា ប្រធានពន្ធនាគារឱ្យជួយសម្រួលផង។ លើសពីនេះក៏មានបញ្ហាផឹកស៊ីជាមួយអ្នកទោស និងអំពើពុករលួយក្នុងពន្ធនាគារ ក៏ដូចជាករណីគ្រឿងញៀនជាដើម។
គ្រាន់តែទទួលបានព័ត៌មាននេះ លោកដែលធ្លាប់រាប់អានលោកប្រធានពន្ធនាគារក៏បានសរសេរសារតាមទូរស័ព្ទឆាតជាលក្ខណៈរាប់អានគ្នាទៅលោក លឹមវាសនាថា «សួស្តីប្អូនស្នា! សូមប្អូនពិនិត្យ និងអាចមេត្តាផ្តល់លក្ខណៈអនុគ្រោះណាមួយ ដល់ឈ្មោះ យ៉េត ចន្ធូ តាមដែលអាចធ្វើទៅបានផង ព្រោះបើមិនចឹងទេមានការពង្រីកព័ត៌មានបែកធ្លាយ ពីសកម្មភាពគ្រឿងញៀន និងការប្រព្រឹត្តអំពើពុករលួយ ក្នុងពន្ធនាគារប៉ៃលិន ដែលចង់មិនចង់ ពិតមិនពិត តែវាជារងើកភ្លើងនាំទៅដល់អន្តរាយជាអគ្គិភ័យបាន។ បំណងល្អ ! » ។
លុះមិនព្រមដោះស្រាយសម្រួលដល់អ្នកទោស ស្រាប់តែមានករណីបងប្អូនអ្នកទោសធ្វើឱ្យបែកធ្លាយមែន ទើបគេដាក់ពាក្យ បណ្តឹងលោកតែម្តង។ ពាក់ព័ន្ធនឹងបញ្ហានេះ ខាងលេខាធិការដ្ឋាន នៃសាលាដំបូងខេត្តប៉ៃលិន បានបញ្ជាក់ឱ្យដឹងថា ៖ បើសិនជាលោក ទឹម ស៊ីថន អនុប្រធានទំនាក់ទំនាងរដ្ឋសភា ព្រឹទ្ធសភា យល់ថា សាលក្រមខាងលើ ដែលចេញដោយព្រះរាជអាជ្ញារង និងចៅក្រមជំនុំជម្រះក្តី មិនយុត្តិធម៌ គឺអាចដាក់ពាក្យបណ្តឹងទៅថ្នាក់លើបន្តទៀត ឬក៏អាចតវ៉ាចំពោះសាលក្រមនោះឡើងវិញ។ ប្រភពបន្តទៀតថា លោក ជា សា ព្រះរាជអាជ្ញារង និងលោកស្រី តាន់ គឹមហៀក គឺពិតជាប្តីប្រពន្ធនឹងគ្នាមែន ហើយកាន់សំនុំរឿងនេះផងដែរ៕ ដោយ ៖ នី យ៉ា
ចែករំលែកព័តមាននេះ