សេពគប់អ្នករកស៊ីនឹងចេះរកស៊ី សេពគប់អ្នកផឹកស្រានឹងចេះផឹកស្រា !
- ភ្នំពេញ
ភាគទី ២ រាជធានីភ្នំពេញ ៖ នៅក្នុងភាគទី ១ នៃជីវិតជាក់ស្តែងស្តីពី «តើលុយ ១០០ដុល្លារកែប្រែជីវិតខ្ញុំរបៀបណា ?»…
ភាគទី ២
រាជធានីភ្នំពេញ ៖ នៅក្នុងភាគទី ១ នៃជីវិតជាក់ស្តែងស្តីពី «តើលុយ ១០០ដុល្លារកែប្រែជីវិតខ្ញុំរបៀបណា ?» ខ្ញុំបានលើកឡើងរួចមកហើយថា មនុស្សត្រូវមានក្តីស្រមៃ ហើយរៀបចំផែនការសម្រាប់ការសម្រេចក្តីស្រមៃនោះ ដើម្បីគិតចេញជាមុខរបរមួយដែលនឹងអាចជួយយើងរកលុយអោយបានច្រើនល្មមរស់នៅបានសមរម្យនៅក្នុងសង្គម ។
នៅថ្ងៃនេះ ខ្ញុំនឹងនាំអ្នកទាំងអស់គ្នាទៅកាន់ចំណុចមួយផ្សេងទៀតគឺ តើមានអ្វីជំរុញខ្ញុំអោយបង្កើត វេបសាយសុខភាព (health.com.kh) ដើម្បីបម្រើមហាជន និងរកចំណូលសម្រាប់ខ្លួនឯងដោយផ្តើមចេញពីលុយតែ ១០០ដុល្លារក្នុងមួយខែ ។ ហេតុការណ៍ពីរបានជំរុញអោយខ្ញុំចាប់ផ្តើមគិតពីការបង្កើតមុខរបរមួយសម្រាប់ខ្លួនជាជាងការបន្តធ្វើការអោយគេអស់មួយជីវិត ។
ហេតុការណ៍ទីមួយ គឺខ្ញុំបានស្គាល់ឧកញ៉ា ហៃ លីអ៊ាង ។ គាត់ គឺជាប្រធានសហគ្រាសផលិតឱសថ ប៉េ ប៉េ អឹម ដែលជាសហគ្រាសផលិតឱសថធំជាងគេនៅកម្ពុជា និងបាននាំចេញឱសថជាច្រើនមុខទៅលក់នៅប្រទេសជាច្រើនក្នុងពិភពលោក ។ ក្នុងការសន្ទនាមួយ គាត់ គាត់បានប្រាប់ខ្ញុំថា ខ្ញុំមិនត្រូវធ្វើការងារអោយគេអស់មួយជីវិតទេ ហើយគាត់ពន្យល់ថា មនុស្សយើងបើដល់អាយុ ៤០ឆ្នាំហើយមិនមានអ្វីទេ គឺចប់ហើយ ។ សម្តីរបស់គាត់បានធ្វើអោយខ្ញុំភ្ញាក់ក្រញ៉ាង ដោយសារតែខ្ញុំរវល់ខ្លាំងពេកនឹងធ្វើការងារ ហើយមិនបានគិតឡើយថា តើត្រូវបង្កើតមុខរបរអ្វីសម្រាប់ខ្លួនឯង ។ ចាប់ពីពេលនោះមក ខ្ញុំក៏តាំងចិត្តថា ត្រូវគិតបង្កើតមុខរបរមួយសម្រាប់ខ្ួនឯង នៅពេលចាស់ទៅ។ ខ្ញុំតាំងចិត្តថាខ្ញុំមិនត្រូវធ្វើការអោយ គេអស់មួយជីវិតឡើយ។
ហេតុការណ៍ទីពីរ គឺខ្ញុំបានធ្វើដំណើរទៅកាន់ប្រទេសឥណ្ឌា ។ ជាទូទៅនៅពេលខ្ញុំធ្វើដំណើរទៅក្រៅប្រទេស ខ្ញុំចូលចិត្តទៅកាន់ហាងសៀវភៅដើម្បីរកទិញសៀវភៅសម្រាប់អានពេលត្រឡប់មកប្រទេសវិញ ។ នៅហាងសៀវភៅក្នុងទីក្រុងញូវដេលី ខ្ញុំមានការចាប់អារម្មណ៍ជាខ្លាំងនឹងទស្សនាវដ្តីសុខភាពរបស់ឥណ្ឌា ដែលមានអត្ថបទល្អៗជាច្រើន ។ ពេលកំពុងអានសៀវភៅនោះគំនិតមួយបានលេចឡើងក្នុងខួរក្បាល ខ្ញុំ ។ នោះគឺ ខ្ញុំ គួរតែប្រើជំនាញសារព័ត៌មាន និងជំនាញពេទ្យរបស់ខ្ញុំបង្កើតវេបសាយសុខភាពជំនួសអោយការធ្វើទស្សនាវដ្តីដែលចំណាយលុយច្រើន ។ ខ្ញុំប្រាកដក្នុងចិត្តថា ខ្លួនអាចធ្វើបានផ្អែកលើចំណេះដឹងហើយ ខ្ញុំក៏ប្រាកដដែរថា ខ្ញុំនឹងអាចរកលុយបានពីវេបសាយនេះដោយសារខ្ញុំមានបណ្តាញច្រើនផ្នែកពេទ្យ ។
សម្តីប៉ុន្មានម៉ាត់ពីឧកញ៉ា ហៃ លីអ៊ាង និងដំណើរទស្សកិច្ចនៅឥណ្ឌាបាននាំផ្លូវខ្ញុំឆ្ពោះទៅកាន់ការសម្រេចចិត្តបង្កើតវេបសាយសុខភាពដំបូងនៅកម្ពុជា ។ រហូតមកដល់ពេលនេះ ខ្ញុំគិតថា នោះគឺជាការសម្រេចចិត្តដ៏ត្រឹមត្រូង និងមានប្រយោជន៍ទាំងសម្រាប់ខ្ញុំ និងប្រជាជនដែលត្រូវការព័ត៌មានសុខភាព ។
តើអ្នកទាំងអស់គ្នាអាចទាញប្រយោជន៍អ្វីខ្លះពីបទពិសោធន៍ជីវិតជាក់ស្តែងនេះរបស់ ខ្ញុំ ? ខ្ញុំគិតថា ការសេពគប់មនុស្សត្រូវនឹងនាំយើងដើរផ្លូវត្រូវ ការសេពគប់មនុស្សខុសនឹងនាំយើងដើរផ្លូវខុស ។ បើសិនជាយើងចង់រកលុយបានច្រើន យើងត្រូវស្គាល់អ្នកជំនួញជោគ ជ័យអោយបានច្រើនហើយឈ្វេងយល់ពីភាគជោគជ័យរបស់ពួកគេ និងទទូលយកយោបល់របស់គេមកពិចារណា ។ ក្នុងករណីរបស់ខ្ញុំ គឺសម្តីរបស់លោក ឧកញ៉ា ហៃ លីអ៊ាង បានកែប្រែជីវិតរបស់ខ្ញុំ ។ ទន្ទឹមនោះការធ្វើដំណើរទៅក្រៅប្រទេសក៏ជួយយើងអោយបើកភ្នែកមើលឃើញឱកាសជាច្រើននៃមុខរបរដែលអាចយកមករកស៊ីក្នុងប្រទេសរបស់យើង ។
សូមប្រិយមិត្តរង់ចាំតាមដានអានបន្តទៀតទាក់ទងនឹងការចែករំលែកបទពិសោធន៍ជីវិតរបស់ខ្ញុំថា«តើលុយ ១០០ដុល្លារកែប្រែជីវិតខ្ញុំរបៀបណា ?» ។ ចំណែកប្រិយមិត្តដែលចង់ចែករំលែកបទពិសោធន៍ទាក់ទងនឹងការរកលុយដល់មហាជនក៏អាចទាក់ទងគម្រោង «លុយ» របស់សារព័ត៌មាន «កោះសន្តិភាព» ផងដែរ ។ យើងរីករាយនឹងធ្វើការផ្សព្វផ្សាយជូន ដើម្បីជាការចែករំលែកចំណេះដឹងជាក់ស្តែងពិតៗទាក់ទងនឹងការរកលុយ ការសន្សំលុយ និងការគ្រប់គ្រងលុយ ៕
ចែករំលែកព័តមាននេះ