ថ្ងៃចូលឆ្នាំថ្មីប្រពៃណីជនជាតិចិននិងវៀតណាមកាន់តែខិតជិតមកដល់ ទោះបីនេះជាទំនៀបទម្លាប់ជាតិសាសន៍ដទៃក្តី តែនៅកម្ពុជាទម្លាប់សែនព្រេននិងការរៀបចំប្រារព្ធពិធីនេះ មិនតូចតាចនោះទេ។ពលរដ្ឋខ្មែដែលមានសែស្រឡាយកាត់ចិន កាត់វៀតណាមបានរៀបចំពិធីសែនព្រេនមិនចាញ់ជនជាតិចិនឬជនជាតិវៀតណាមនៅក្នុងប្រទេសគេនោះឡើយ ។
ថ្ងៃសែននិងចូលឆ្នាំថ្មីតាមប្រពៃណីជនជាតិចិន កាន់តែខិតជិតមកដល់ការលក់ដូររបស់របរសម្រាប់ពិធីសែន ហាក់កំពុងមានភាពមមាញឹកឡើង ទាំងការលក់ដូររបស់របរសម្រាប់តុបតែងគេហដ្ឋាន មានគោម ផ្កាភ្ញី គ្រឿងសម្រាប់ដុតសែនកុងមា ដូចជាក្រដាសប្រាក់ដុល្លារ ដុំមាស រថយន្ត និងគ្រឿងទេសសម្រាប់ធ្វើម្ហូបអាហារ ជ្រូកខ្វៃ ផ្កាអង្គាសីល ជាដើមនោះ។អ្នកលក់ដូរតាមផ្សារ តាមដងផ្លូវបាននិយាយថានៅឆ្នាំនេះពួកគាត់លក់ហាក់កាកកបជាងឆ្នាំកន្លងទៅ។ ឆ្នាំ២០២០កន្លងទៅចំថ្ងៃសែន គឺចំពេលផ្ទុះជំងឺកូវីដ១៩ខ្លំាងតែម្តង ធ្វើការលក់ដូររបស់ពយកគាត់មិនដាច់នោះទេសម្រាប់ដែលទំនិញទំាងអស់នោះភាគច្រើនអាចទុកលក់នៅឆ្នាំនេះបានទៀត។
អ្នកដូរទំនិញសែនម្នាក់ នៅផ្សារអូរឡំាពិក បាននិយាយទំនិញសម្រាប់សែនភាគច្រើនយកមកពីប្រទេសវៀតណាម ពុំមានរបស់ផលិតនៅក្នុងស្រុកទេ។ របស់ក្នុងស្រុកដែលបម្រើដល់ពិធីសែនចូលឆ្នាំចិននេះ មានតែសាច់មាន់ សាច់ជ្រូក និងផ្កាអង្គការសីលតែប៉ុណ្ណោះ ក្រៅពីនោះសុទ្ធសឹងជារបស់នាំចូលពីប្រទេសវៀតណាម។ អាជីវករខាងលើបាននិយាយថាឆ្នាំនេះ គាត់មាននាំចូលទំនិញតិចតូចមកលក់ទេ ដោយសារត្រូវលក់ទំនិញដែលសល់កាលពីឆ្នាំទៅ។ ទំនិញសម្រាប់ចូលឆ្នាំចិន ជារបស់របរសែន បានឡើងថ្លៃបន្តិចបន្តូចប៉ុណ្ណោះ ប៉ុន្តែចំណីអាហារ ជ្រូកខ្វៃជាដើមនោះបានឡើងថ្លៃខ្លំាង។ ជ្រូកខ្វៃមួយក្បាលអាចតម្លៃពី២០០ដុល្លារឡើងទៅ។នេះបើតាមការបញ្ជាក់របស់អាជីវករខាងលើ។
ចំណែកអាជីវករលក់ផ្កាស្រស់នៅខេត្តតាកែវ អ្នកស្រី អ៊ួន ក្រពុំ បានឱ្យដឹងនៅថ្ងៃទី៩ កុម្ភៈនេះថា ការលក់ផ្កាសម្រាប់តុបតែង ផ្តើមដាច់ពីបីថ្ងៃមកហើយ ហើយវានឹងដាច់រហូតដល់ថ្ងៃដែលគេត្រូវសែនតែម្តង។ ចូលឆ្នំាចិនឆ្នំានេះការលក់បន្លែមិនសូវដាច់នោះទេ ប៉ុន្តែលក់ផ្កាស្រស់ដាច់គួសម។ អ្នកស្រីឲ្យដឹងថា«ខ្ញុំបាន កុម្ម៉ង់ផ្កាពីប្រទេសវៀតណាមមួយថ្ងៃប្រមាណ១០០ថូ មកលក់ក្នុងនោះមានដូចជាស្ពៃរឿង ផ្កានាំសំណាង ផ្កាលីលី និងផ្កាអង្គាសិល ហើយនៅក្នុងចំណោមផ្កាទំាងនោះ ផ្កាដែលលក់ដាច់ជាងគេ គឺផ្កាលីលី ព្រោះវាទុកបានយូរហើយវាមានក្លិនក្រហូប»។
ផ្កាដាក់ថូ ដែលអ្នកស្រីក្រពុំលក់មានតម្លៃពី ១២ ០០០រៀលឡើងទៅ។ ក្រៅទិញផ្កាពីប្រទេសវៀតណាមយកទៅតុបតែងតំាងលម្អនៅក្នុងគេហដ្ឋាន ពិសីចូលឆ្នាំចិននៅកម្ពុជាគេមិនដែលចោលផ្កាអង្គាសីលនោះទេ។ ផ្កាអង្គាសីលជាទំនិញនៅក្នុងស្រុកដែលភាគច្រើនគេនាំមកពីខេត្តពោធ៍សាត់និងបាត់ដំបង។ ផ្សាអង្គាសីលឆ្នាំនេះមានតម្លៃពី១០ដុល្លារទៅដល់៣០០ដុល្លារ។
អ្នកលក់ផ្កាអង្គាសីលអះអាងថាពួកគាត់បានចំណាយដើមពី១ពាន់ទៅ៣ពាន់ដុល្លារក្នុងការទិញដើមអង្គាសីលមកលក់។ ការលក់ដើមអង្កសីលមិនខុសពីទំនិញផ្សេងៗនោះទេ នៅឆ្នាំនេះដាច់គួរសមតែអ្នកលក់ថាមិនទាន់ដឹងចំណេញឬខាតនោះទេ ។ គេចាំមើលរហូតដល់ថ្ងៃសែន តែម្តងទើបដឹង ៕ រាយការបន្ថែមដោយ ៖ ឡុង សារេត
ចែករំលែកព័តមាននេះ