ភាគទី ១ រាជធានីភ្នំពេញ ៖ ខ្ញុំគិតថាទាំងអស់គ្នាសុទ្ឋតែមានក្តីស្រមៃមួយចង់មានលុយចាយពេញ ដៃ ដើម្បីឱ្យមានជីវិតមួយដ៏សប្បាយរីករាយ និងប្រកបដោយសុភមង្គល ។ យើងមិនចង់មានលុយចាយព្រឹកខ្វះល្ងាច…
ភាគទី ១
រាជធានីភ្នំពេញ ៖ ខ្ញុំគិតថាទាំងអស់គ្នាសុទ្ឋតែមានក្តីស្រមៃមួយចង់មានលុយចាយពេញ ដៃ ដើម្បីឱ្យមានជីវិតមួយដ៏សប្បាយរីករាយ និងប្រកបដោយសុភមង្គល ។ យើងមិនចង់មានលុយចាយព្រឹកខ្វះល្ងាច ហើយយប់ឡើងដេកមិនលក់ដោយសារតែខ្វល់ខ្វាយតែពីរឿងរកលុយនោះឡើយ ។
តើធ្វើដូចម្តេចទៅដើម្បីមានលុយចាយគ្រប់គ្រាន់សម្រាប់ជីវិត ហើយរស់នៅសមរម្យក្នុងសង្គម ។ ថ្ងៃនេះ ខ្ញុំ វេជ្ជបណ្ឌិត ងួន សេរ័ត្ន ស្ថាបនិករបស់វេបសាយ សុខភាព (health.com.kh) និងជាអគ្គនាយរង សារព័ត៌មាន «កោះសន្តិភាព» ព្រមទាំងជាសាស្ត្រាចារ្យ ផ្នែកទំនាក់ទំនងសាធារណៈនៅសាកលវិទ្យាល័យ ខេមរភូមិន្ទ នឹងលើកយកបទពិសោធន៍ជីវិតជាក់ស្តែងទាក់ទងនឹង «លុយ» ទាំងភាពជោគជ័យ និងបរាជ័យដើម្បីជូនប្រិយមិត្តទាំងអស់ពិចារណាថា តើបទពិសាធន៍ទាំងនេះនឹងអាចជួយលោកអ្នកដូចម្តេចនៅក្នុងបញ្ហាលុយកាក់នេះ ។
ខ្ញុំគិតថា ជីវភាពរបស់ខ្ញុំនឹងមិនបានសមរម្យឡើយដោយមានឡានមួយសម្រាប់ជិះធ្វើការ មានផ្ទះរស់នៅសមរម្យ និងមានលទ្ឋភាពចង់ធ្វើនូវអ្វីដែលខ្លួនចង់ធ្វើដូចជាទទួលទានអាហារឆ្ងាញ់ៗជាដើម ។ ខ្ញុំខ្លួនឯងគ្រាន់តែអាចនិយាយថា មានសេរីភាពខាងផ្នែកហិរញ្ញវត្ថុ ។ ខ្ញុំគិតថា ការមានលុយរស់នៅក្នុងសង្គមបានសមរម្យ គឺគ្រប់គ្រាន់ហើយសម្រាប់ខ្ញុំ ។ ខ្ញុំមិនប្រាថ្នាក្លាយជាមហាសេដ្ឋីឡើយ ។ ខ្ញុំយល់ថា មនុស្សគ្រប់គ្នាមិនគួរដាក់គោលដៅក្លាយជាមហាសេដ្ឋីឡើយ ។ គោលដៅនៃជីវិតគួរតែមានជីវិត សប្បាយរីករាយ និងមានតម្លៃក្នុងសង្គម គឺគ្រប់គ្រាន់ហើយ ។ នៅចុងបញ្ចប់នៃជីវិត គឺមនុស្សយើងមិនអាចយកអ្វីទៅជាមួយបានឡើយ ។ ដូច្នេះផែនការជីវិត គឺមានលុយចាយគ្រប់គ្រាន់ដើម្បីរស់នៅសប្បាយរីករាយ និងមានតម្លៃក្នុងសង្គម ។
ខ្ញុំគិតថា ជីវិតខ្ញុំចាប់ផ្តើមកែប្រែដោយសារតែខ្ញុំបានធ្វើការសម្រេចចិត្តដ៏ត្រឹមត្រូវមួយ ។ នោះគឺការចំណាយលុយ ១០០ ដុល្លារ ក្នុងមួយខែសម្រាប់ការចាប់ផ្តើមដំណើរការវេបសាយសុខភាព health.com.kh កាលពីឆ្នាំ ២០១១ ។ ខ្ញុំបានចាយលុយ ១០០ ដុល្លារសម្រាប់បើកប្រាក់ខែទៅឱ្យអ្នកបច្ចេកវិទ្យាព័ត៌មាន ធ្វើវេបសាយ health.com.kh ឱ្យខ្ញុំនិងជួយគ្រប់គ្រងវេបសាយនេះ ។ ចំណែករូបខ្ញុំផ្ទាល់ ប្រើប្រាស់ជំនាញពេទ្យរបស់ខ្ញុំគួបផ្សំនិងជំនាញសារព័ត៌មានរបស់ខ្ញុំដែលបានធ្វើការនៅកាសែតរស្មីកម្ពុជា ដើម្បីសរសេរអត្ថបទទាក់ទងនឹងសុខភាព ។ នៅពេលនោះ ខ្ញុំធ្វើការឱ្យកាសែតរស្មីកម្ពុជាក្នុង នាមជាប្រធានផ្នែកនយោបាយ និងក្លឹបអ្នកកាសែតកម្ពុជា ក្នុងតួនាទីជានាយកប្រតិបត្តិ ដើម្បីរកចំណូលចិញ្ចឹមជីវិតនៅពេលថ្ងៃ ។ ចំណែកពេលយប់ ខ្ញុំប្រឹងធ្វើអត្ថបទសុខភាពតែម្នាក់ឯងដើម្បីដំណើរការវេបសាយ សុខភាព ។
បទពិសោធន៍នៃជីវិតទាក់ទងលុយកាក់ដែលខ្ញុំចង់ចែករំលែកនៅថ្ងៃនេះ គឺមនុស្សត្រូវ មានក្តីស្រមៃចង់រំដោះខ្លួនចេញពីការងារធ្វើឱ្យគេ ហើយរៀបចំផែនការរកស៊ីដ៏ច្បាស់ លាស់ដោយផ្អែកលើជំនាញដែលខ្លួនមាននៅពេលដែលឱកាសបានមកដល់ ។ អ្នកទាំងអស់គ្នាប្រាកដជាអាចធ្វើបាន ។
សូមរង់ចាំភាគទីពីរបន្តទៀតទាក់ទងនឹងបទពិសោធន៍ជីវិតនៃការរកលុយដែលខ្ញុំនឹងសរសេរឡើងដោយផ្អែកលើបទពិសោធន៍ជាក់ស្តែងនៃជីវិតខ្ញុំផ្ទាល់គួបផ្សំជាមួយទ្រឹស្តីដែលដកស្រង់ចេញពីសៀវភៅល្បីៗនៅលើពិភពលោកដែលនិយាយអំពីបញ្ហា «លុយ» ។
លោកអ្នកដែលមានបំណងចង់ចែករំលែកបទពិសោធន៍ជាក់ស្តែងរបស់ខ្លួនទាក់ទងនឹងការរកលុយក៏អាចសរសេរមកកាន់គម្រោង «លុយ» របស់សារព័ត៌មាន «កោះសន្តិភាព»ផងដែរ ។ យើងរីករាយនឹងធ្វើការផ្សព្វផ្សាយជូន ៕
ចែករំលែកព័តមាននេះ