ចាយលុយបែបណាដែលប្រកបដោយភាពវៃឆ្លាត និងចំគោលដៅ !
រាជធានីភ្នំពេញ ៖ យោងតាមអ្នកជំនាញ លោកគ្រូ អួន សារ៉ាត់ ជាអ្នកបណ្តុះបណ្តាលម្នាក់នៅក្នុងក្លិបអ្នកជំនួញឆ្លាត បានចែករំលែក ៣ចំណុច ដែលជាគន្លឹះសម្រាប់បងប្អូនយុវវ័យ…
រាជធានីភ្នំពេញ ៖ យោងតាមអ្នកជំនាញ លោកគ្រូ អួន សារ៉ាត់ ជាអ្នកបណ្តុះបណ្តាលម្នាក់នៅក្នុងក្លិបអ្នកជំនួញឆ្លាត បានចែករំលែក ៣ចំណុច ដែលជាគន្លឹះសម្រាប់បងប្អូនយុវវ័យ ជាពិសេសអ្នកមិនទាន់មានប្រាក់ចំណូលច្រើនជាងប្រាក់ចំណាយ។ ខាងក្រោមនេះជាចំណុចទាំង ៣ ៖
ចំណុចទី១)- ការចាយលុយ គឺយើងត្រូវចាយឱ្យប្រាកដប្រជា និងចាយប្រកបដោយភាពវៃឆ្លាត៖ ចាយប្រកបដោយភាពវៃឆ្លាត គឺចាយឱ្យចំ ចាយឱ្យចូល និងការចាយឱ្យចំណេញ ។ ចាយឱ្យចំមានន័យថា គឺយើងចាយទៅលើអ្វីដែលចាំបាច់បានហើយ អ្វីដែលមិនចាំបាច់កុំចាយ ។ របស់ដែលចាំបាច់ជាច្រើន ដែលយើងមិនបានរកនឹក ប៉ុន្តែបែជាចាយទៅលើរបស់មិនចាំបាច់ជាច្រើន របស់ដែលមិនចាំនោះ មានន័យថាបើអត់ក៏បានដែរ ឆ្លងមួយថ្ងៃផុតគឺផុត ឬពេលខ្លះចំណាយដល់ទៅ ១០ ប៉ុន្តែចំណូលបានតែមួយនោះក៏គេហៅថាមិនចាំបាច់ដែរ ។ យើងក្រឡេកមើលទូរស័ព្ទដែលយើងប្រើ ប្រសិនជាទូរស័ព្ទមួយតម្លៃ ៥០០ ដុល្លារអាមេរិក មួយទៀតតម្លៃ ៣០០ ដុល្លារ ហើយយើងប្រើបានដូចគ្នា អញ្ចឹងយើងមិនទាន់មានលទ្ធភាព យើងប្រើ ៣០០ដុល្លារសិនទៅ។ ម៉ូតូដែលយើងជិះ វានៅប្រើបាន ហើយមិនទាន់អីចាស់ទ្រុឌទ្រោមណា ចាំបាច់អ្វីត្រូវដូរសារ៉ី ទោះដូរទៅដល់ណាក៏មិនអាចហោះបានដែរ ការចង់ដូរសារ៉ីនឹងគ្រាន់តែជាអារម្មណ៍កូនក្មេងតើ។ ប៉ុន្តែប្រសិនបើម៉ូតូយើងមានបញ្ហាខ្លាំង ចាស់ទ្រុឌទ្រោម នោះយើងអាចធ្វើការគិតពិចារណាទិញថ្មីបាន ប៉ុន្តែចាំបាច់ត្រូវគិត ប្រសិនថ្មី ៣០០០ដុល្លារ ហើយម៉ូតូល្មមៗត្រឹមតែ ១២០០ ទៅ ១៥០០ដុល្លារ យើងអាចប្រើបានដូចគ្នា នោះយើងគួរប្រើរបស់ថោកៗសិន ។
រីឯសំលៀកបំពាក់វិញ ខ្លះមានតម្លៃរហូតដល់ ១០០ ដុល្លារ ចុះតម្លៃ១០ដុល្លារក៏អាចប្រើបានដែរ អញ្ចឹងមានហេតុផលអ្វីយើងត្រូវចំណាយលុយយ៉ាងច្រើនទៅលើវា យើងត្រូវមើលខ្លួនយើងថាយើងជាមនុស្សប្រ៊េនហើយឬនៅ ជាមនុស្សល្បីល្បាញ ត្រូវចេញមុខជាសាធារណៈហើយឬនៅ (ជាមនុស្សដែលត្រូវគេយកទៅថត ជាមនុស្សដែលគេយកទៅផ្សព្វផ្សាយ) និយាយរួមសួរថាយើងរកលុយបានច្រើនជាងប្រាក់ចំណាយខ្លាំងដែរឬទេ? យើងប្រើរបស់ទាំងអស់នឹងវាមិនបង្កើនគុណតម្លៃអ្វីផង ដូចនេះមានថាវាមិនចាំបាច់ទេ។ ហើយប្រសិនជាយើងនៅតែបន្តទិញអ្វីដែលមិនចាំបាច់ យើងនឹងបាត់បង់អ្វីដែលចាំបាច់នៅថ្ងៃអនាគត។ យើងគួររៀនស្គាល់ខ្លួនឯងឱ្យបានច្បាស់ ស្គាល់ពេលវេលាច្បាស់ កាលៈទេសៈច្បាស់ ស្គាល់មនុស្សដែលត្រូវជួបច្បាស់ មានកិច្ចការងារខ្លួនច្បាស់ ទិញរបស់របរទាំងឡាយណាដែលធ្វើទៅមិនចំណេញ មិនកើនលុយមិនកើនចំណូលអត់ទិញ ។
ចំណុចទី២)- ចំណាយឱ្យចូល៖ ចំណុចនេះមានន័យថាទិញតែអ្វី ដែលជាមុខងារសម្រាប់រកលុយ។ ឧទាហរណ៍ថា ទិញទូរស័ព្ទមកលេង ដូចជាការលេងហ្គេមជាដើម ចុះបើយើងយកវាមករកស៊ីដូចជាការលក់ទំនិញតាមអ៉ីនធើណេត ឬឡ៊ាយលក់ទៅទំនិញ យកមករៀនសូត្រ នោះហើយជាការប្រើប្រាស់សម្ភារទទួលបានការចំណេញ។ មួយវិញទៀតទិញកុំព្យូទ័រអ្នកខ្លះយកមកតែដើម្បីតែលេងហ្គេម ចុះបើយើងប្រើវាក្នុងបង្កើតវេបសាយ និងប្រើប្រាស់ក្នុងដំណើរការងារអ៊នឡាញ នោះហើយជាការប្រើប្រាស់ដើម្បីទាញប្រយោជន៍មកវិញឬឱ្យចូលវិញ។ ការចំណាយអ្វីដែលនាំឱ្យយើង មានចំណូលគឺជារឿងសំខាន់ជាទីបំផុតដែលយើងត្រូវធ្វើ ទើបយើងអាចមានឳកាសនិងលទ្ធភាពបន្តដំណើរតទៅមុខ ។
ចំណុចទី៣)- ការចំណាយទាំងឡាយណាដែលនាំឱ្យចំណេញ ៖ ចាយលុយនាំឱ្យចំណេញ ឧទាហរណ៍ថា យើងកំពុងមានលុយ ១០,០០០ដុល្លារអាមេរិក ប៉ុន្តែគម្រោងទិញឡាន ហើយភ្លាមនោះមានគេលក់ដី (ដីទិញភ្លាមចំណេញបាន ១០០០ដុល្លារភ្លាម) នោះយើងគួរគិតថាត្រូវទិញសិនទៅល្អជាង។ នៅពេលដែលយើងមានលុយមួយបាច់ក្នុងដៃ ឬក៏យើងមានលុយក្នុងផ្ទះ នោះយើងគួរសំលឹងមើលជុំវិញខ្លួនយើង ថាតើអ្វីទាំងឡាយណាដែលយើងចាយទៅ វាបានចំណេញមកវិញភ្លាមៗ យើងចាយទាំងអស់នឹងសិន បើទោះបីចំណេញតិចតួចក៏ដោយ។ កុំទាន់ស្រឡាញ់អ្វីៗទាំងឡាយ ខណៈដែលយើងមិនទាន់មានប្រាក់ចំណូលដែលមានស្ថេរភាពឬសុវត្ថិភាព។ នៅពេលដែលយើងមានប្រភពប្រាក់ចំណូលដែលមានស្ថេរភាពឬសុវត្ថិភាពហើយ ពេលនោះយើងអាចប្តូររបៀបចាយលុយរបស់យើងបាន ប៉ុន្តែការផ្លាស់ប្តូរនោះត្រូវតែប្រកបដោយការប្រុងប្រយ័ត្ន បានសេចក្តីថាយើងអាចចាយលុយតាមអារម្មណ៍របស់យើងបាន ៕ ដោយ៖ ស្រី គំនិត
ចែករំលែកព័តមាននេះ