រាជធានីភ្នំពេញ ៖ ការធ្វើដំណើរដែលតែងតែកកកុញស្ទះចរាចរណ៍ជាប្រចាំរួចទៅហើយនៅលើស្ពានព្រះមុនីវង្សនោះ លុះពេលនេះ ក៏កាន់តែស្ទះថែមទៀត ខណៈដែលតែក្រុមមន្ត្រីជំនាញធ្វើការជួសជុលស្ពានព្រះមុនីវង្សចាស់ ។ ជាក់ស្តែង នាព្រឹកថ្ងៃទី៨ ខែកុម្ភៈ…
រាជធានីភ្នំពេញ ៖ ការធ្វើដំណើរដែលតែងតែកកកុញស្ទះចរាចរណ៍ជាប្រចាំរួចទៅហើយនៅលើស្ពានព្រះមុនីវង្សនោះ លុះពេលនេះ ក៏កាន់តែស្ទះថែមទៀត ខណៈដែលតែក្រុមមន្ត្រីជំនាញធ្វើការជួសជុលស្ពានព្រះមុនីវង្សចាស់ ។
ជាក់ស្តែង នាព្រឹកថ្ងៃទី៨ ខែកុម្ភៈ ឆ្នាំ២០២១ស្ថានភាពចរាចរណ៍ផ្លូវជាតិលេខ១ (ចំណុចត្រើយខាងកើតគល់ស្ពានព្រះមុនីវង្ស) បានកកស្ទះណែនណាន់តាន់តាប់ខុសប្រក្រតីគឺណែនប៉ែស ។ ខណៈនោះ គេឃើញវត្តមានរបស់លោក ចេង មុនីរ៉ា អភិបាលខណ្ឌច្បារអំពៅ បានទៅដល់ទីនោះផ្ទាល់ ដើម្បីបញ្ជាដល់កម្លាំងសណ្តាប់ធ្នាប់ខណ្ឌ និងនគរបាលចរាចរណ៍ ក្នុងការសម្រួលនិងរំដោះការកកស្ទះ ព្រោះវាស្ទះប្លែកពីរាល់ថ្ងៃ ។
ការកកស្ទះនាព្រឹកថ្ងៃនោះ គឺមានចម្ងាយប្រមាណ៣គីឡូម៉ែត្រ ចាប់តាំងពីបុរីប៉េង ហួត បឹងស្នោ រហូតដល់គល់ស្ពានព្រះមុនីវង្សចាស់-ថ្មីក្នុងខណ្ឌច្បារអំពៅ ។ លោក ចេង មុនីរ៉ា ថ្លែងថា មូលហេតុនៃការកកស្ទះនេះ គឺដោយសារក្រុមការងារជំនាញកំពុងជួសជុលបង្កាន់ដៃ និងកន្លែងថ្មើរជើងនៃស្ពានព្រះមុនីវង្សចាស់ ដែលខូចខាត។ ការជួសជុលនោះ គឺត្រូវជួសជុលប្រវែង៣ម៉ែត្រសងខាង ប៉ុន្តែជួសជុលត្រូវធ្វើម្តងម្ខាង ដែលកត្តានេះហើយធ្វើឱ្យស្ថានភាពចរាចរណ៍នៅលើស្ពានមានភាពចង្អៀត និងបណ្តាលឱ្យមានការកកស្ទះនៅបែ៉កខាងច្បារអំពៅ ។
ខណៈមានការជួសជុលនោះ លោកអភិបាលខណ្ឌក៏បានដាក់កម្លាំងនគរបាល និងកម្លាំងសណ្តាប់ធ្នាប់សង្កាត់ខណ្ឌជាច្រើននាក់ ដើម្បីជួយសម្រួលចរាចរណ៍ជាប្រចាំផងដែរ នៅតាមគោលដៅសំខាន់ៗ ពិសេសចំណុចស្តុបផ្សារច្បារអំពៅ និងនៅលើស្ពានព្រះមុនីវង្សចាស់ជាដើម ។
លោកអភិបាលខណ្ឌ បានស្នើដល់អ្នកដំណើរទាំងឡាយដែលធ្វើដំណើរតាមផ្លូវជាតិលេខ១ ត្រង់ចំណុចដែលតែងតែកកស្ទះខាងលើ សូមមានការអធ្យាស្រ័យនិងយោគយល់ខ្ពស់ផងចំពោះបញ្ហាកកស្ទះនេះ ដែលបានរំខានដល់ពេលវេលា និងកិច្ចការងាររបស់បងប្អូន ។ ក្នុងនាមថ្នាក់ដឹកនាំរដ្ឋបាលខណ្ឌ លោកនឹងខិតខំបន្តក្នុងការដាក់កម្លាំងពាក់ព័ន្ធ ជួយសម្រួលចរាចរណ៍ប្រចាំជានិច្ច ។
គួរបញ្ជាក់ថា នាពេលបច្ចុប្បន្ននេះ ប្រទេសជាតិកំពុងស្ថិតក្នុងការអភិវឌ្ឍទៅមុខ ធ្វើឱ្យហេដ្ឋារចនាសម្ព័ន្ធផ្សេងៗមានការរីកលូតលាស់ ពិសេសនោះកំណើនយានយន្ត និងយានជំនិះគ្រប់ប្រភេទ ក៏មានការកើនឡើងយ៉ាងសន្ធឹកសន្ធាប់ ស្របនឹងកំណើនប្រជាពលរដ្ឋបច្ចុប្បន្នក៏ច្រើនដែរ ។
កត្តានៃការកើនឡើងនៃចំនួនប្រជាពលរដ្ឋ និងយានយន្តនេះហើយ ក៏ជាផ្នែកមួយដែលបង្កឱ្យមានការកកស្ទះចរាចរណ៍នៅតាមដងផ្លូវដែរ ។ ពិសេសនោះ គឺការកកស្ទះពីម៉ោង៧ទៅម៉ាង៨ព្រឹកនិងពីម៉ោង៥ទៅម៉ោង៦ល្ងាច ជាពេលវេលាដែលបងប្អូនចេញទៅឬមកពីធ្វើការងារ ទៅរកស៊ីនិងទៅរៀនទៅសូត្រជាដើម ៕
ចែករំលែកព័តមាននេះ