ប្រទេសមីយ៉ាន់ម៉ា ៖ បាតុកម្មធំៗនៅបន្តក្នុងប្រទេសមីយ៉ាន់ម៉ា កាលពីថ្ងៃទី៨ ខែកុម្ភៈ ឆ្នាំ២០២១ ក្នុងទីក្រុងជាច្រើន ដើម្បីបរិហាររដ្ឋប្រហាររបស់កងយោធា កាលពីថ្ងៃទី១កុម្ភៈ និងទាមទារឲ្យដោះលែង…
ប្រទេសមីយ៉ាន់ម៉ា ៖ បាតុកម្មធំៗនៅបន្តក្នុងប្រទេសមីយ៉ាន់ម៉ា កាលពីថ្ងៃទី៨ ខែកុម្ភៈ ឆ្នាំ២០២១ ក្នុងទីក្រុងជាច្រើន ដើម្បីបរិហាររដ្ឋប្រហាររបស់កងយោធា កាលពីថ្ងៃទី១កុម្ភៈ និងទាមទារឲ្យដោះលែង មេដឹកនាំប្រទេសលោកស្រីអ៊ួង សាន់ស៊ូជី នាំឲ្យកងទ័ពបន្តឹងសំឡេង ហើយច្បាប់អាជ្ញាសឹកត្រូវបានប្រកាសនាថ្ងៃនោះ ក្នុងទីក្រុងជាច្រើន។
បណ្ដាឧត្ដមសេនីយជាលើកដំបូង បានគំរាមពីការសងសឹក ប្រឆាំងពួកបាតុករដែលលើកគ្នាដែរហែក្បួនច្រើនរយពាន់នាក់ នៅតាមដងវិថីនានាប្រឆាំងរដ្ឋប្រហារ។
បាតុកម្មទាំងនោះពិតជាធំ ពុំធ្លាប់មានចាប់តាំងពីបដិវត្តន៍ឆ្នាំ២០០៧របស់ព្រះសង្ឃ ដែលត្រូវបង្ក្រាប។ អគ្គមេបញ្ចាការកងទ័ពឧត្ដមសេនីយ៍ MIN AUNG HLAING បានចេញមុខជាលើកដំបូង ថ្លែងតាមទូរទស្សន៍កាលពីយប់ថ្ងៃទី៨កុម្ភៈ ដោយលើកជាថ្មី ពីការក្លែងបន្លំក្នុងការបោះឆ្នោតខែវិច្ឆិកា ដែលជាមូលហេតុនៃរដ្ឋប្រហារ។
តាមទូរទស្សន៍កងទ័ព MYAWADDY TV ឧត្ដមសេនីយរូបនោះថ្លែងថា យើងស៊ើបអង្កេតលើពួកអ្នកទទួលខុសត្រូវ ចំពោះភាពមិនប្រក្រតីនៃការបោះឆ្នោត។ លោកសន្យាពីការបោះឆ្នោតដោយសេរីនិងយុត្តិធម៌ ក្រោយបញ្ចប់ការប្រកាសអាសន្នរយៈពេល១ឆ្នាំ និងសន្យាពីការបង្កើតរបបយោធាមួយដែលខុសពីរបបយោធាមុនៗ។ មីយ៉ាន់ម៉ាធ្លាប់ស្ថិតក្រោមនឹមយោធាជិត៥០ឆ្នាំ ចាប់តាំងពីទទួលបានឯករាជ្យពីឆ្នាំ១៩៤៨មក ហើយរដ្ឋប្រហារយោធាថ្ងៃទី១កុម្ភៈ បានបញ្ចប់របបប្រជាធិបតេយ្យដែលមានអាយុកាលទើបបាន១០ឆ្នាំ។
ច្បាប់អាជ្ញាសឹកត្រូវបានប្រកាសក្នុងសង្កាត់ជាច្រើននៃទីក្រុងរ៉ង់ហ្គូន រដ្ឋធានីសេដ្ឋកិច្ចរបស់ប្រទេស ក្នុងទីក្រុងម៉ាន់ដាឡៃទីក្រុងធំទី២របស់ប្រទេស ព្រមទាំងនៅកន្លែងដទៃៗទៀត។ បាតុកម្ម និងការប្រមូលផ្ដុំមនុស្សលើសពី៥នាក់ទៅត្រូវហាមឃាត់ និងបម្រាមគោចរណ៍ត្រូវបានដាក់ចាប់ពីម៉ោង២០ដល់ម៉ោង៤ភ្លឺ។ កងទ័ពលើកពីការគំំរាមសងសឹក ប្រឆាំងពួកបាតុករស្និទ្ធប្រជាធិបតេយ្យដែលនៅបន្ត។
ក្នុងសុន្ទរកថាតាមទូរទស្សន៍ឧត្ដមសេនីយ៍ MIN AUNG HLAING លើកឡើងថា របបយោធានឹងបង្កើតលទ្ធិប្រជាធិបតេយ្យមួយដែលអាចត្រួតពិនិត្យបាននិងមានវិន័យ ដោយថា គណៈកម្មាធិការបោះឆ្នោតនឹងត្រូវកែទម្រង់។ លោកអះអាងទៀតថា កងទ័ពមិនមានបំណងដឹកនាំប្រទេស ដូចក្នុងរបបផ្ដាច់ការយោធាជាច្រើនដែលមីយ៉ាន់ម៉ាធ្លាប់ជួបប្រទះ ចាប់តាំងពីទទួលបានឯករាជ្យមកឡើយ។
នយោបាយការបរទេសនឹងនៅដដែល ដោយមិនមានការផ្លាស់ប្ដូរ ហើយប្រទេសទាំងឡាយត្រូវបានលើកទឹកចិត្ត ឲ្យមកវិនិយោគនៅមីយ៉ាន់ម៉ា។ ឧត្ដមសេនីយរូបនោះមិនបានលើកពីឈ្មោះរបស់លោកស្រីអ៊ួងសាន់ស៊ូជីឡើយ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ